Jehovämi alli aguantanapaq yanapamantsik

1. ¿Imakunapatan pasantsik, y pitan aguantanapaq yanapamantsik? (1 Pëdru 5:10).

ALLÄPA mana alli tiempukunachömi kawantsik, tsëmi imëka problëmakunapa pasantsik. Wakinkunaqa qeshyapäkuyan, wakinkunapanam familiankuna wanukuyashqa, wakinkunatanam Jehoväta sirwiyanqanrëkur familiankuna y gobiernukunapis chikiyan (Mat. 10:18, 36, 37). Peru Jehovämi yanapamantsik alli aguantanapaq; pëqa llapantsiktam yanapamantsik (leyi 1 Pëdru 5:10).

2. ¿Imanirtan imëka problëmakunapa pasarpis alli aguantantsik?

² Nunakuna chikimashqapis, imëka problëmakunapa pasarpis o tentacionkunapa pasarpis, Jehovä Diosnintsikman confiakur y kushishqa sirwirqa allim aguantëkantsik. Peru ¿kikintsikllapitatsuraq tsënö aguantëta puëdishwan? Manam, Jehovä Diosnintsik poderninwan yanapamashqallam (2 Cor. 4:7). Tsëmi këchöqa chuskullata yachakurishun alli aguantanapaq Jehovä Diosnintsik imanö yanapamanqantsikta y tsë yanapamanqantsikta imanö provechanapaq kaqta.

DIOSNINTSIKMANMI MAÑAKUYTA PUËDINTSIK

3. ¿Imanirtan Jehoväman mañakunqantsikqa alläpa shumaq?

³ ¿Imanötan Jehovä Diosnintsikqa alli aguantanapaq yanapamantsik? Jutsasapa kashqapis pëman mañakunantsikta permitimarnintsikmi (Heb. 4:16). Tsëmi Jehovä Diosnintsiktaqa munanqantsik höra, ima idiömachöpis, o carcelchö këkarpis llapan yarpachakunqantsikkunata willëta puëdintsik (Jon. 2:1, 2; Hëch. 16:25, 26). Jehovä Diosnintsikqa entiendimantsikmi alläpa yarpachakurnin ima nita mana puëdishqapis (Rom. 8:26, 27). Mañakunantsikta Diosnintsik permitimanqantsikpitaqa ¡alläpam agradecikuntsik!

4. Mana allikunapa pasarnin aguantanapaq mañakushqaqa, ¿Jehovä wiyamantsiktsuraq?

⁴ Bibliachömi Jehoväpaq kënö nimantsik: “Munanqanmannö imatapis mañakushqaqa, pëqa wiyamantsikmi” (1 Juan 5:14). Peru ¿mana allikunapa pasarnin aguantanapaq mañakunantsiktaqa Jehovä munantsuraq? Awmi, tsëta ruranatam Jehoväqa munan. Mana allikunapa pasarnin alli aguantashqaqa, manam Satanaspis Jehoväpita burlakuyta puëdinqatsu (Prov. 27:11). Y Bibliachöqa kënöpis ninmi: “Llapan shonqunkunawan sirwiyaptinqa [Jehovä] yanapanmi” (2 Crön. 16:9). Segürum këkantsik mana allikunapa pasarnin aguantanapaq mañakushqaqa, Jehovä yanapamänapaq kaqta (Is. 30:18; 41:10; Lüc. 11:13).

5. ¿Imanötan Diosnintsikman mañakunqantsik yanapamantsik? (Isaïas 26:3).

⁵ Bibliachöqa nimantsik yarpachakunqantsikkunapaq Diosnintsikman mañakunapaqmi. Y ¿imanötan Diosnintsikqa yanapamantsik mañakushqa? Palabranchömi kënö nimantsik: “Nunakuna mana entiendita puëdiyanqan, Teyta Diospita chaskiyanqëki yamë këmi, shonquykikunata y pensënikikunata Cristu Jesusrëkur cuidanqa” (Filip. 4:7). ¡Alläpam agradecikuntsik tsënö yanapamanqantsikta! Jehoväta mana sirweq nunakunaqa problëmankunata qonqëta munar y alli sientikuyta munarmi imëkata rurayan. Peru tsë rurayanqankunaqa wakinqa peligrösum kanman. Tsëtam Satanasqa provecharinman mana allikunaman ishkitsinampaq (igualaratsi Mateu 12:43-45 textutawan). Tsë nunakuna juk rätulla tranquïlu sientikuyanqanqa manam igualantsu, Diosnintsikman mañakurnin tranquïlu sientikunqantsikwan. Noqantsikqa llapan shonquntsikwanmi Jehoväman confiakuntsik, pëmi shonquntsikta y pensënintsikta cuidan y yamë kanapaq yanapamantsik (leyi Isaïas 26:3). Y ¿imanötan yanapamantsik? Leyinqantsik textukunawanmi yarpätsimantsik alläpa kuyamanqantsikta y yanapamënintsikta munanqanta (Sal. 62:1, 2).

6. Mana allikunapa pasarqa, ¿imakunapaqtan mañakunantsik? (Fötuta rikäri).

⁶ ¿Imatataq ruranantsik? Mana allikunapa pasarqa, Jehovämanmi mañakunantsik. Llapan yarpachakunqantsikkunatam Jehoväpa makinchö dejarinantsik, tsënöllam tranquïlu sientikunapaq y imatapis alli pensëkur ruranantsikpaq yanapëkamänapaq mañakunantsik (Sal. 55:22; Prov. 2:10, 11). Peru aguantanantsikpaq mañakurpis, manam agradecikuytaqa qonqanantsiktsu (Filip. 4:6). Alkäbum këkänantsik mana allikunapa pasanqantsik hörakuna imanö yanapëkämanqantsikta y tsë yanapamanqantsikpitam agradecikunantsik. Alläpa problëmakunapa pasarpis, Diosnintsik yanapëkämanqantsiktaqa manam qonqanantsiktsu (Sal. 16:5, 6).

PALABRAN BIBLIAWANMI YANAPAMANTSIK

7. ¿Imanötan Bibliata alli yachakunqantsik yanapamantsik?

⁷ Mana allikunapa pasashqa alli aguantanapaqmi Jehoväqa Palabranwan yanapamantsik. Bibliachömi nimantsik Jehovä yanapëkämanqantsikta. Këllaman pensarishun: Mateu 6:8 textuchömi Jesus kënö nirqan: “Teytëkikunaqa imata wanayanqëkitapis manaraq mañakuyaptikim musyëkanna”. Tsënöqa Jesus nirqan Teytanta alli reqirmi. Tsëmi mana allikunapa pasarninqa confiakunantsik Jehovä yanapamänapaq kaqman. Diosnintsikqa Palabran Bibliachömi nimantsik llapan problëmakunata ushakätsinampaq kaqta. Tsëta musyarmi mana allikunapa pasarqa, alli aguantantsik (Sal. 94:19).

8. (1) ¿Imanötan Bibliachö këkaq consëjukuna yanapamantsik? Juk ejempluwan willakaramuy. (2) ¿Imatan yanapamäshun mas wananqantsik hörakuna Bibliachö këkaq consëjukunata yarpänapaq?

⁸ Tsënöllam Bibliachöqa mana allikunapa pasarnin alli aguantanantsikpaq consëjukunata tarintsik. Tsë consëjukunata cäsukurqa, imatapis alli pensëkurmi rurashun (Prov. 2:6, 7). Këllaman pensarishun: Bibliachömi nimantsik shamoq tiempuchö ima pasakunampaq kaqkunaman alläpa mana yarpachakunapaq, tsëpa rantinqa cada junaqllapaq yarpachakunapaq (Mat. 6:34). Bibliata seguïdu leyir y leyinqantsikkunaman alli pensarqa, ima problëmapa pasarpis tsë consëjukunaman pensëkurmi imatapis rurashun.

9. Sirweqninkunata Jehovä imanö yanapanqanta musyanqantsikqa, ¿imanötan yanapamantsik?

⁹ Bibliachöqa Jehoväman confiakoq nunakunapaq y pëkunata Jehovä imanö yanapanqampaqpis willakunmi (Heb. 11:32-34; Sant. 5:17). Tsë nunakunapaq Biblia willakunqankunaman pensarqa, segürum kashun Jehovä yanapëkämanqantsikta. Palabranchömi kënö nin: “Teyta Diosmi imëkapita tsapämantsik y kallpayoqta tikratsimantsik. Pëqa imëka mana allikunapa pasashqapis yanapamänapaq[mi] imëpis listu këkan” (Sal. 46:1). Tsë nunakuna Jehoväman confiakuyanqanta y imëkapa pasarpis alli aguantayanqanta musyarqa, pëkunanömi këta munashun (Sant. 5:10, 11).

10. ¿Imatataq ruranantsik Biblia yanapamänapaq?

¹⁰ ¿Imatataq ruranantsik? Cada junaqmi Bibliantsikta leyinantsik y mas gustamanqantsik textukunatam apuntanantsik. Wakin wawqi panikunataqa yanapashqa Llapan junaqkuna Bibliapita yachakunapaq neq follëtuta cada junaq leyiyanqanmi. Tsëmi yanaparqan Mariea jutiyoq panintsiktapis. Pëpaqa papäninwan mamäninmi cancer qeshyawan qeshyayarqan, tsëmi wanukuyanqanyaq cuidarqan. ¿Imatan Marieta yanaparqan alli aguantanampaq? Kikinmi kënö nin: “Llapan junaqkuna Bibliapita yachakunapaq neq follëtutam cada junaq leyeq kä y leyinqäkunamanmi pensaq kä. Tsëmi yanapamarqan pasëkanqäkunaman pensanäpa rantin, Jehoväman y Palabran Biblia ninqankunaman maslla pensanäpaq” (Sal. 61:2).

WAWQI PANIKUNAWANMI YANAPAMANTSIK

11. ¿Imanötan yanapamantsik imëka mana allikunapa pasarpis wawqi panikuna aguantayanqanta musyanqantsik?

¹¹ Jehovä Diosnintsikqa wawqi panikunawanmi yanapamantsik. Wawqi panintsikkunapis noqantsiknömi imëka mana allikunapa pasëkäyan y allim aguantëkäyan (1 Pëd. 5:9). Tsëta musyanqantsikmi yanapamantsik imëka mana allikunapa pasarpis pëkunanölla aguantanantsikpaq (Hëch. 14:22).

12. ¿Imanötan wawqi panintsikkuna yanapamantsik y imanötan pëkunata yanapashwan? (2 Corintius 1:3, 4).

¹² Wawqi panikunaqa shumaq parlapämarnintsik y imallatapis noqantsikpaq rurarmi yanapamantsik. Tsënöllam apostol Pablutapis yanapayarqan. Pëtaqa wayinchö prësu këkaptinmi wawqi panikuna tukuynöpa yanapayarqan. Tsëmi apostol Pabluqa animayanqampita y consolayanqampita cartankunachö jutipa jutipa agradecikurqan (Filip. 2:25, 29, 30; Col. 4:10, 11). Mana allikunapa pasanqantsik hörakunam wawqi panikunaqa alli aguantanantsikpaq yanapamantsik, tsëmi noqantsikpis pëkunata yanapanantsik (leyi 2 Corintius 1:3, 4).

13. ¿Imatan panintsik Mäyata yanaparqan pasëkanqan problëmata alli aguantanampaq?

¹³ Rusia nacionpita Mäya jutiyoq panintsik pasanqanta rikärishun. 2020 watachömi panintsik Mäyapa wayinman guardiakuna yëkuyarqan y imëkakunata ashipakuyarqan. Tsëpitanam panintsik Mäyaqa, Diosnintsikpita nunakunata parlapanqampita juiciuchö karqan. ¿Imanötan wawqi panikuna yanapayarqan? Kikinmi kënö nin: “Juk kutim llapan pasëkanqäkunaman yarpachakurnin imanö këtapis puëdirqätsu. Tsë höram turi nanakuna telëfunupa qayayämarqan, cartakunata mandayämarqan y alläpa kuyayämanqanta niyämarqan”. Tsëpitanam kënö nin: “Imëpis musyarqämi Diospa sirweqninkunaqa alläpa kuyakoq kayanqanta, peru 2020 watachö pasamanqampitaqa masran cuentata qokurqö alläpa kuyakoq familiachö kanqäta”.

14. ¿Imatataq ruranantsik mana allikunapa pasarqa? (Fötuta rikäri).

¹⁴ ¿Imatataq ruranantsik? Imëka mana allikunapa pasarninqa, wawqi panikunawan juntu kanapaqmi kallpachakunantsik y anciänukunatam willanantsik yanapamänantsikpaq. Pëkunaqa “fuerti vientupita y fuerti tamyapita tsapakoq machënö[mi]” kayan (Is. 32:2). Peru ¿noqantsikllaku problëmakunapa pasantsik? Manam, wawqi panintsikkunapis problëmakunapaqa pasayanmi y yanapanantsiktam wanayan. Pëkunata yanaparqa, manam alläpaqa problëmantsikkunaman yarparäshuntsu y allim aguantashun (Hëch. 20:35).

JEHOVÄ ÄNIMANQANTSIKKUNAMAN PENSANQANTSIKMI YANAPAMANTSIK

15. ¿Imanötan Jesusta yanaparqan Diosnintsik änikunqankunaman yarparanqan, y imanötan noqantsiktapis yanapamantsik? (Hebrëus 12:2).

¹⁵ Jehovä Diosnintsikqa änimarquntsik shamoq tiempuchö shumaq kawakunantsikpaqmi. Tsëman yarparanqantsikmi yanapamantsik imëkapa pasarpis alli aguantanantsikpaq (Rom. 15:13). Tsëmi Jesustapis yanaparqan wanutsiyänan kaptimpis alli aguantanampaq (leyi Hebrëus 12:2). Pëqa musyarqanmi pasëkanqankunata alli aguantaptinqa, Jehoväpa jutin respetashqa kanampaq kaqta. Tsënöllam Papäninwan ciëluchö juntu kanampaq kaqman y qateqninkunawan kë Patsaman gobernamunampaq kaqman yarpararqan. Tsënöllam noqantsiktapis, alli kawakunantsikpaq Diosnintsik änimanqantsikkunaman yarparanqantsik mana allikunapa pasanqantsik hörakuna aguantanapaq yanapamäshun.

16. ¿Imanötan juk panita yanaparqan Diosnintsik änikunqanman yarparanqan, y imatataq tsëpita yachakuntsik?

¹⁶ Shumaq Patsachö kawakunantsikpaq Diosnintsik änikunqanman pensanqanmi Rusia nacionpita Alla jutiyoq panintsiktapis yanaparqan. Pëpa qowantaqa o runantaqa prësuyarqanmi. Panintsikmi kënö nin: “Diosnintsikman mañakunqä y änikunqankunaman pensanqämi alli aguantanäpaq yanapamarqan. Musyämi kë pasëkanqäkunaqa juk tiempullapa kanampaq kaqta. Jehoväqa chikeqninkunatam ushakätsinqa, y noqantsiktaqa bendicimäshunmi”.

17. ¿Imatataq rurashwan Diosnintsik änimanqantsikkunata valorarqa? (Fötuta rikäri).

¹⁷ ¿Imatataq ruranantsik? Diosnintsik änikunqankunaman pensanapaqmi tiempuntsikta rakinantsik. Shumaq Patsachöna kawëkanqantsiktam pensanantsik. Tsëta rurashqaqa, problëmantsikkunaqa rasllam pasarinqa y manam alläpaqa llakikushuntsu (2 Cor. 4:17). Tsënöllam Diosnintsik änikunqankunapita jukkunata yachatsinapaqpis kallpachakunantsik. Wakin nunakunaqa Diosnintsik änikunqankunata mana musyarmi imëka mana allikunapa pasarqa alläpa sufriyan. Tsëmi parlapanqantsikqa yanaparinqa Jehoväpita yachakur qallayänampaq.

18. ¿Imanirtan confiakunantsik Jehovä Diosnintsik änikunqankunaman?

¹⁸ Jobqa imëka mana allikunapam pasarqan y allim aguantarqan. Tsë llapanta pasarirmi Jehoväta kënö nirqan: “Kananqa musyämi imëkapis makikillachö këkanqanta y llapan pensanqëkita rurëta puëdinqëkita” (Job 42:2). Tsënöqa Job nirqan llapan änikunqankunata Jehovä cumplita puëdinqanta entiendishqa karmi. Tsëta entiendinqantsikmi noqantsiktapis yanapamäshun mana allikunapa pasarnin alli aguantanantsikpaq. Maslla entiendinapaq këman pensarishun: juk warmi alläpa qeshyarnin atskaq doctorkunaman ëwanman, peru mëqampis alliyätsita puëdinmantsu. ¿Imanöraq tsë warmi sientikunqa? Alläpa llakishqachi. Peru tsënö këkarnin juk alli doctorta taririnman, y tsë doctorqa nirinman imapita qeshyëkanqanta y imanö jampinampaq kaqta. Kananqa, ¿imanöraq tsë warmi sientikunqa? Jinan höra mana alliyarpis, alliyänampaq kaqta musyarmi mas tranquïlu sientikunqa y imëka nanëtapis aguantanqa. Tsënöllam änimanqantsik Shumaq Patsata Diosnintsik cumplimunampaq kaqta següru karqa, imëkapa pasarpis alli aguantëta puëdishun.

19. ¿Imakunatan yanapamäshun imëka mana allikunapa pasarpis alli aguantanapaq?

¹⁹ Yachakurinqantsiknöpis, Jehovä Diosnintsikqa alli aguantanapaq yanapamantsik pëman mañakunata permitimarnintsikmi. Tsënöllam yanapamantsik Palabran Bibliawan, wawqi panikunawan y shamoq tiempupaq änimanqantsikkunawan. Këchö yachakunqantsikkunata rurashqaqa, Jehovä Diosnintsikmi imëkapa pasashqapis alli aguantanapaq yanapamäshun. Ichikllachönam Satanasqa kë munduchö gobernanqanatsu y imëka problëmantsikkunapis ushakärinqanam (Filip. 4:13).