Jehovä kuyashunqëkitam següru kanëki

1. ¿Imanirtan Jehovällatana sirwinëkipaq änikurqëki? (Fötukunata rikäri).

¿IMANIRTAN Jehovällatana sirwinëkipaq änikurqëki? Alli reqirnin y alläpa kuyarninchi. Tsëchi imëpis pë munanqanllata ruranëkipaq y llapan shonquykiwan, kawënikiwan, kallpëkiwan y pensënikiwan sirwinëkipaq änikurqëki (Mar. 12:30). Peru tsë tiempupita kananyaqqa, masnachi Jehoväta kuyanki. Tsëqa, “¿rasumpaku Jehoväta kuyanki?” nir tapuriyäshuptikiqa, ¿ima ninkimanraq? Capaz kënö contestankiman: “¡Rasumpam kuyä! Pëta kuyanqänöqa manam ni imata ni pitapis kuyätsu”.

2, 3. ¿Imapita següru kanatataq Jehovä munan? (Jeremïas 31:3). ¿Imatataq këchö yachakushun?

² Peru “¿Jehoväqa kuyashunkitsuraq?” nir tapuriyäshuptikiqa, ¿ima ninkimanraq? Capazchi kuyashunqëkita mana següru karqa ima nitapis puëdinkimantsu. Wamra kanqampita alläpa sufrishqa panim kënö nin: “Noqaqa rasumpam llapan shonqüwan Jehoväta kuyä. Tsënö kuyarpis pë kuyamanqantaqa manam segürutsu kä”. Peru Jehoväqa, ¿rasumpatsuraq kuyashunki?

³ Jehoväqa munan kuyashunqëkita següru kanëkitam (leyi Jeremïas 31:3). Jehoväqa kuyashurnikim amïgun kanëkita y sirweqnin kanëkita permitishurqunki. Y pëllatana sirwinëkipaq änikuriptiki y bautizakuriptikiqa masran kuyashurqëki. Pëpana kaptikim imëpis läduykichö këkaqnö këkan y manam imëpis dejashunkitsu (Mal. 3:17). Jehoväqa munan kuyashunqëkita apostol Pablunö següru kanëkitam. Pablum kënö nirqan: “Segürum këkä wanuy o wañuy ni kawë ni angelkuna ni gobiernukuna, ni kanan pasëkanqankuna ni shamoq tiempuchö pasakunampaq kaqkuna, ni ima poder, ni altu kaq ni ruri kaq, ni ima kamashqa kaqpis Señornintsik Cristu Jesuschö këkaq Teyta Dios kuyamanqantsikpita mana rakimänapaq kaqta” (Rom. 8:38, 39). Peru ¿imanirtan següru kanantsik Jehovä kuyamanqantsikta? Y ¿imatan yanapamäshun Jehovä kuyamanqantsikta següru kanapaq? Tsëkunata yachakurishun.

¿IMANIRTAN SEGÜRU KANANTSIK JEHOVÄ KUYAMANQANTSIKTA?

4. ¿Imatataq Satanasqa creitsimënintsikta munan, y imatataq rurashwan trampanman mana ishkinapaq?

⁴ Jehovä kuyamanqantsikta següru karqa, manam Satanaspa trampanman ishkishuntsu (Efes. 6:11). ¿Imatataq Satanasqa creitsimënintsikta munan? Jehovä mana kuyamanqantsiktam. Satanasqa imëkatam ruranqa Jehoväpita rakimänapaq. Tsëmi Bibliachöqa Satanaspaq nin juk leonnö kanqanta (1 Pëd. 5:8, 9). Juk leonqa qeshyëkaq o defendikuyta mana puëdeq animalkunatam masqa wanutsin. Tsënöllam Satanaspis mana allikunata ruranqantsikpita llakikunqantsik hörata, problëmakunapa pasëkanqantsik hörata o shamoq tiempupaq yarpachakunqantsik hörata provechanqa Jehoväpita rakimänapaq (Prov. 24:10). Satanaspa trampanman mana ishkinapaqqa contranmi churakänantsik, y Diosnintsik kuyamanqantsiktam següru kanantsik (Sant. 4:7).

5. ¿Imanötan yanapamantsik Jehovä kuyamanqantsikta y valoramanqantsikta musyanqantsik?

⁵ Jehovä kuyamanqantsikta següru karqa, masmi kuyashun. Jehovä Diosnintsikqa kamamarquntsik pitapis kuyanapaq y kuyashqa sientikunapaqmi. Këllaman pensarishun: ¿manaku pipis kuyamashqaqa noqantsikpis maslla kuyantsik? Tsënöllam Jehovä kuyamanqantsikta y valoramanqantsikta següru karqa, pëta mas kuyashun (1 Juan 4:19). Y mas kuyashqaqa, pëpis masmi kuyamäshun. Palabran Bibliachömi kënö nin: “Teyta Diosman witiyë, y pëqa qamkunamanmi witimunqa” (Sant. 4:8). Peru ¿imatataq ruranantsik Jehovä Diosnintsik rasumpa kuyamanqantsikta següru kanapaq? Yachakurishun.

¿IMATAN YANAPASHUNKI JEHOVÄ KUYASHUNQËKITA SEGÜRU KANËKIPAQ?

6. Jehovä kuyashunqëkita mana següru karqa, ¿imatataq rurankiman?

⁶ Imanir kuyashunqëkita entiendinëkipaq Jehoväman kutin kutin mañakuy (Lüc. 18:1; Rom. 12:12). Tsëpaqqa capaz juk junaqchö atska kutiraq mañakunkiman. Y tsënö mañakurpis Jehovä kuyashunqëkita mana següru karqa, yarpänëkim Jehovä Diosnintsikqa shonquykipitapis mas puëdeq kanqanta (1 Juan 3:19, 20). Jehovä Diosqa Kamamaqnintsik karmi imanö kanqantsikta alli musyan (1 Sam. 16:7; 2 Crön. 6:30). Tsëmi imanö sientikunqëkita llapanta willanëki y kuyashunqëkita següru kanëkipaqmi yanapëkushunëkipaq mañakunëki (Sal. 62:8). Y mañakurirqa, ¿imatataq rurankiman? Yachakurishun.

7, 8. ¿Imanötan leyinqantsik Salmus textukuna yanapamantsik Jehovä kuyamanqantsikta següru kanapaq?

⁷ Jehovä ninqankunaman llapan shonquykiwan crei. Jehoväqa imanö kanqanta qellqayänampaqmi santu espïritunwan sirweqninkunata yanaparqan. Këllaman pensarishun: juk kutim gobernanti David kënö nirqan: “Teyta Jehoväqa alläpa llakishqa këkaqkunapa lädunchömi këkan. Llakishqa kar ima rurëtapis mana puëdeqkunatam yanapan” (Sal. 34:18). Alläpa llakishqa karninqa, capazchi pensankiman pipis mana entiendishunqëkita y yanapashuynikita mana puëdinqanta. Peru Jehovä Diosnintsikqa allim musyan imanö sientikunqëkita y mas wananqëki höram läduykichö këkan. Juk kutichönam David kënö nirqan: “Qarapita poronguykiman weqilläta winëkullë” (Sal. 56:8). Unë witsan viajërukunaqa qarapita poronguta utilizäyaq wallkalla yakutapis mana perditsiyänampaqmi. Juk viajëru nunapaqqa, juk göta yakullapis alläpam väleq. Tsënöllam Jehoväpis, waqaptiki weqikita poronguman churaq cuenta qampaq alläpa yarpachakun. Sufreqta rikäshurnikiqa alläpam llakikun y läduykichömi këkan. Y juk kutichönam David kënö nirqan: “Imata ruranqätapis llapantam musyanki” (Sal. 139:3). Jehoväqa llapan ruranqëkitam musyëkan y allikunata ruranqëkitaqa alläpam valoran (Heb. 6:10). Jehoväqa alläpam kushikun pë munanqanta ruraptiki.a

⁸ Tsë textukunawanmi Teyta Jehoväqa nikäshunki alläpa kuyashunqëkita y qampaq alläpa yarpachakunqanta. Peru Satanasqa munan Jehovä mana kuyashunqëkita creinëkitam. Tsëqa, ¿imatataq rurankiman Jehovä kuyashunqëkita mana següru karqa? Kënömi pensanëki: “¿Pitataq cäsushaq? ¿‘Ulikoqkunapa o llullakoqkunapa teytan’ Diablutaku? O ¿‘rasumpa kaqllata’ parlakoq Teyta Jehovätaku?” (Juan 8:44; Sal. 31:5).

9. ¿Imatataq Jehoväqa sirweqninkunata änishqa? (Exodu 20:6).

⁹ Sirweqninkunata Jehovä kuyanqanman pensë. Pensarishun Moisesta y israelïtakunata ninqanllaman (leyi Exodu 20:6). Jehoväqa, pëta kuyaqkunataqa alläpam kuyan y imëpis mana dejanampaqmi änikushqa. Pëqa sirweqninkunata kuyarmi imëpis dejanqatsu (Neh. 1:5). Tsëmi imëllapis Jehovä mana kuyashunqëkita pensarqa, yarpänëki Jehoväta llapan shonquykiwan kuyanqëkita y munanqannö kawakunqëkita. Y Jehoväta tsënö kuyarqa, segürum kanëki qamtapis alläpa kuyashunqëkita (Dan. 9:4; 1 Cor. 8:3). Jehoväta kuyanqëkita següru karqa, segürum kanëki qamtapis Jehovä kuyashunqëkita y imëpis mana dejashunëkipaq kaqta.

10, 11. ¿Imatataq Jehovä rurashqa alläpa kuyashurniki? (Gälatas 2:20).

¹⁰ Jesus imanir wanunqanman pensë. Jehovä Diosnintsikqa nunakunata alläpa kuyarmi Tsurin wanunanta permitirqan (Juan 3:16). Peru llapan nunakunapaq wanunanta permitirpis, Teyta Diosqa kuyashurnikim qampaqpis wanunanta permitirqan. Pensarishun apostol Pabluman. Pëqa manaraq cristiänu karqa imëka mana allikunatam rurarqan y cristiänuna karqa, mana allikunata mana ruranampaqmi alli cuidakunan karqan (Rom. 7:24, 25; 1 Tim. 1:12-14). Tsënö karpis, apostol Pabluqa entiendishqanam karqan pëpaqpis Jesus wanushqa kanqanta (leyi Gälatas 2:20). Diosnintsikmi permitirqan, Pablu tsënö pensanqanta Bibliaman qellqanampaq. ¿Imanirtan qellqananta permitirqan? Pablunö entiendinantsikta munarmi (Rom. 15:4). Teyta Diosqa munan, qamrëkur wanunampaq Jesusta mandamushqa kanqanta entiendinëkitam. Tsëta entiendirqa, segürum kanki Jehovä Diosnintsik alläpa kuyashunqëkita.

¹¹ Alläpam Teytantsik Jehoväta agradecikuntsik noqantsikrëkur Jesus wanunanta permitinqampita. Peru Jesusqa manam salvamänantsikllapaqtsu shamurqan, sinöqa Teytan Jehoväpita rasumpa kaqta yachatsikunampaq y sirweqninkunata Jehovä alläpa kuyanqanta entienditsikunampaqmi (Juan 18:37). Tsëtam kanan yachakurishun.

JESUSQA YACHATSIKURQAN JEHOVÄ KUYASHUNQËKITAM

12. ¿Imanirtan següru këkantsik Jehoväpaq Jesus yachatsikunqankunaqa rasumpa kanqanta?

¹² Jesustaqa alläpam gustaq Teytan Jehoväpita yachatsikuy (Lüc. 10:22). Peru ¿imanirtan següru kashwan Teytampaq yachatsikunqankunaqa rasumpa kanqanta? Jesusqa mëtsika millon watakunapam Papäninwan kawashqa, tsëmi Jehovätaqa pëlla alli reqin (Col. 1:15). Jesusqa rikashqam Jehovä Diosnintsik sirweqninkunata ciëluchö kaqta y Patsachö kaqtapis alläpa kuyanqanta. ¿Imanötan Jesus yachatsikunqan yanapamantsik Jehovä kuyamanqantsikta següru kanapaq? Yachakurishun.

13. ¿Imatataq Jesusqa Jehoväpaq entiendinantsikta munan?

¹³ Jesusqa munan Jehovä Diosnintsikta kuyakoq Teytatanö o Papätanö rikänëkitam. Jehoväpaq parlarmi Jesusqa Mateu, Marcus, Lücas y Juan librukunachö 160 kutipitapis mas “Teytä” nirqan. Y discïpulunkunata parlaparpis ‘Teytëkikuna’ nirqanmi (Mat. 5:16; 6:8). Kë Patsaman Jesus manaraq shamuptinqa, Diospa unë sirweqninkunaqa Jehoväman mañakurnin, “Llapanta Puëdeq”, “Llapanta Gobernaq” y “Kamakoq” niyaqmi. Peru Jesusqa manam tsënötsu nirqan, tsëpa rantinqa, Teyta o Teytëkikuna nirqanmi. Tsëwanmi Jesusqa entienditsimantsik, juk kuyakoq papä wamranta kuyanqannölla, Jehovä Diosnintsik kuyamanqantsikta. Yachakurishun Jesus ishkë kutichö Jehoväpaq “Teytëkikuna” o “Teyta” ninqampita.

14. ¿Ima ejemplukunawantan Jesus entienditsimarquntsik Jehovä alläpa kuyamanqantsikta? (Mateu 10:29-31; dibüjuta rikäri).

¹⁴ Puntataqa yachakurishun Mateu 10:29 a 31 (leyi) textuchö pichuysankakunapaq Jesus parlanqanta. Jesusqa nirqan, mana kuyëkäyaptin y mana sirwikäyaptimpis pichuysankakunata cada ünuta Teytantsik Jehovä cuidanqantam. Peru noqantsikqa Jehoväta kuyantsikmi y sirwintsikmi. Tsëqa, ¿manatsuraq pichuysankakunata cuidanqampitapis masraq noqantsikta cuidamäshun? Awmi. Y 30 kaq versïculuchönam Jesusqa nirqan, ‘aqtsantsiktapis yupashqata’ Diosnintsik katsinqanta. Aqtsantsiktapis yupashqata këkätsirqa, ¿manatsuraq noqantsikpaqqa yarpachakunman? Awmi, Diosnintsikqa cada ünutam alläpa kuyamantsik. Tsëta següru kanantsiktam Jesusqa munan.

15. Juan 6:44 textuchö Jesus ninqanqa, ¿imatataq Jehoväpita yachatsishunki?

¹⁵ Juan 6:44 (leyi) textuchöpis Jesusqa Jehoväpaq parlarmi “Teyta” nirqan. Tsë textuchöqa nin Jehovä Diosnintsik alläpa kuyashurniki y shonquykichö imanö kanqëkita musyarnin sirweqnin kanëkita permitishunqëkitam (Hëch. 13:48). Juan 6:44 textuchö ninqanta parlarqa, Jesusqa capazchi pensëkarqan Jeremïas libruchö sirweqninkunata Jehovä kënö ninqanman: “Qamkunata alläpa kuyar[mi], noqaman witiyämunëkita permitirqä” (Jer. 31:3; igualaratsi Osëas 11:4 textutawan). Tsë textuchö ninqannöpis Jehoväqa alläpam kuyashunki, tsëmi allikunata ruranqëkitaqa imë hörapis rikëkämun.

16. (1) ¿Imapita següru kanëkitataq Jesus munan, y imanirtan ninqanta creinkiman? (2) ¿Imaraq yanapamäshun Jehovä Teytantsik kanqanta següru kanapaq? (Leyi “Jehovällam mas alli kaq Papänintsikqa” neq recuadruta).

¹⁶ Tsëqa, ¿imapita següru kanëkitataq Jesus munan? Pëqa entiendinëkita munan, Jehoväqa pëpa Teytanlla mana kanqantam sinöqa qampa Teytëkipis kanqantam. Jesusqa munan Jehovä Diosnintsik alläpa kuyashunqëkita y qampaq yarpachakunqanta següru kanëkitam. Tsëmi Jehovä mana kuyashunqëkita pensarqa, Jesus ninqanta creinëki. Pëqa imëpis rasumpa kaqllatam parlan y Jehovätapis allim reqin (1 Pëd. 2:22).

JEHOVÄ KUYASHUNQËKITA SEGÜRU KANËKIPAQ KALLPACHAKUY

17. ¿Imanirtan cada junaq kallpachakunantsik Jehovä kuyamanqantsikta següru kanantsikpaq?

¹⁷ Satanasqa imëkatam ruranqa Jehoväpita rakimänantsikpaq, y juknöpaqa rakimënintsikta munan Jehovä mana kuyamanqantsikta creitsimarnintsikmi. ¡Ama Satanas ninqanta creishuntsu! (Job 27:5). Cada junaq kallpachakushun Jehovä kuyamanqantsikta següru kanantsikpaq.

18. ¿Imakunatan yanapashunki Jehovä Diosnintsik kuyashunqëkita següru kanëkipaq?

¹⁸ ¿Imakunatan yanapashunki Jehovä Diosnintsik kuyashunqëkita següru kanëkipaq? Këchö yachakunqantsiknöpis Jehovä imanir kuyashunqëkita entiendinëkipaq pëman mañakuy y sirweqninkunata kuyanqanta willakoq textukunaman pensë. Yarpë, pëta kuyaqkunata Diosnintsik imëpis mana dejanqanta, qamrëkur Jesus wanushqa kanqanta y Jehoväqa Teytëki o Papäniki kanqanta. Kananqa pensari: “¿Jehoväqa kuyashunkitsuraq?” nir tapuriyäshuptikiqa, ¿ima ninkimanraq? Kënöchi ninkiman: “Awmi, ¡rasumpam kuyaman! Tsëmi noqapis pë munanqannö cada junaq kawakunäpaq kallpachakü”.