1925: cien watanam pasarishqa

SHUYARÄYANQANQA MANAM CUMPLIKARQANTSU

Bibliata Estudiaqkunaqa mëtsikaqmi shuyaräyarqan 1925 watachö kë Patsa, Shumaq Patsaman tikrananta. ¿Imanirtan tsëta shuyaräyarqan? Jehoväpa Testïgunkunata Pushaqkunapita Albert Schroeder jutiyoq wawqim kënö entienditsikurqan: “Tsë witsankunaqa Bibliata Estudiaqkuna pensayarqan, akrashqa kaqkuna ciëluta ëwayänampaq kaqta, y kë Patsachö kaqkunata dirigiyänampaqna Diosta sirwishqa unë nunakuna kawariyämunampaq kaqtam. Kawarimoqkunaqa kayänan karqan Abrahan, David y maskunam”. Peru shuyaräyanqanqa manam cumplikarqantsu, tsëmi wakin wawqikuna y panikunaqa alläpa cölerakuyarqan, llakikuyarqan y mana alli sientikuyarqan (Prov. 13:12).

Tsënö llakikuykarpis, wakinkunaqa Jehoväpita yachatsikurmi sïguiyarqan y ichikllapa ichikllapam entiendiyarqan Jehoväpita yachatsikuyta mas puntaman churayänampaq kaqta. Rikärishun Jehovä Diosnintsikpita radiupa imanö yachatsikuyanqanta.

MAS RADIUKUNATA PATSÄTSIYAN

1924 watachö WBBR radiuwan yachatsikuyanqan alli yarqushqa kaptinmi, Bibliata Estudiaqkunaqa Illinoischö këkaq Chicägu markapa amänunchö juk radiu masta patsätsiyarqan. Tsë radiuqa mas karu sitiukunamanmi chänan karqan y jutintaqa WORD nirmi churayarqan. Tsë radiuta patsätsiyanqanchö yanapakushqa Ralph Leffler jutiyoq ingeniërum kënö nin: “Nunakunaqa karu markakunachömi tsë radiuta wiyayaq y masqa alalanqan hörakuna y paqaskunapa juntakëkurmi wiyakuyaq”. Y rasunmi, tsë radiutaqa 5 mil kilömetruspitapis mas karuchö këkaq markakunachömi wiyakuyta puëdiyaq. Tsëmi juk kutiqa Alaskachö këkaq Pilot Station markachö juk familia Jehoväpita yachatsikuyanqanta wiyakuyarqan. Y wiyakuyta usharirmi alläpa agradecikurnin radiupa yachatsikoqkunaman cartakuyarqan.

1925 wata 1 de diciembripaq yarqamoq The Watch Tower revistachömi willakurqan, WORD radiutaqa mëtsëchö wiyayanqanta y kënömi nirqan: “Tsë radiu potenti kaptinmi entëru Estädus Unïduschö, Cübachö y Alaskapa norti kaq lädunchöpis wiyëta puëdiyan. Diospita imëpis mana wiyashqa nunakunam kananqa Bibliapita maslla musyëta munayan”.

1925 watallam Canadä nacionchöpis, radiupa Diospita yachatsikuyta munayarqan. Tsëmi CHUC jutiyoq radiuta la Sociedad Watch Tower rantirqan, y tsëpitanam Regent Building jutiyoq unë teatruta rantiskir tsëman tsë radiuta churayarqan. Tsë radiutaqa 1924 watachömi Saskatchewan provinciachö këkaq Saskatoon markachö Bibliata Estudiaqkuna patsätsishqana kayarqan. Y Canadächöqa tsë radium Diospita yachatsikuyänampaq punta kaq radiu kashqa karqan.

Tsë radiupa yachatsikuyaptinmi Saskatchewan provinciapa mas karu kaq markankunachö täkoq nunakuna Diosnintsikpita yachakuyarqan. Tsëmi pasarqan juk warmiwan. Tsë warmiqa karu markachömi täkurqan. Pëmi Diosnintsikpita radiupa wiyakurnin publicacionkunata mañakurnin cartakurqan. Tsë cartakunqampaq parlarmi George Naish jutiyoq wawqi kënö nirqan: “Cartanta leyirqa, alläpa urgenti munanqantam sientiyarqä. Tsëmi Estudios de las Escrituras neq publicacionta apatsiyarqä”. Tsëpita ichik tiempullatanam tsë warmiqa mas karu markakunachöna Diosnintsikpita yachatsikur qallëkurqan.

CREIYANQANKUNATA JUKNÖPANA ENTIENDIYAN

1925 wata 1 de marzupaq yarqamoq The Watch Tower revistachömi juk shumaq yachatsikuy yarqamurqan, tïtulunqa “Juk nacion patsakärin” nirqanmi. ¿Imanirtan tsëqa alläpa alli karqan? Bibliata Estudiaqkunaqa, unëpitanam entiendishqa kayarqan Satanasqa demoniukunapa mandaqnin kanqanta y mana alli religionkunata, negociu asuntukunata y polïtica asuntukunata controlanqanta. Peru tsë revistachömi “confiakuypaq sirwipakoq” entienditsikurqan Jehoväpa sirweqninkunapis ciëluchö y Patsachö kaqpis unïdu kayanqanta y Satanaspa contran këkäyanqanta (Mat. 24:45). Tsënöllam entienditsikurqan 1914 watachö Diospa Gobiernun ciëluchö patsakärishqa kanqanta, tsënöpa ciëluchö guërra kashqa kanqanta y Satanastawan demoniunkunata kë Patsaman jitamushqa kayanqanta (Apoc. 12:7-9).

Bibliata Estudiaqkunaqa wakinqa manam tsë revista yachatsikunqanwan acuerdutsu kayarqan. Tsëmi tsë revistalla kënö nirqan: “Kë revistata leyeqkuna mëqëkipis këchö yachatsikunqanwan mana acuerdu karqa, ama yarpachakuyëtsu. Tsëpa rantinqa, pacienciakoq kayë, Señorman confiakuyë y sirwirnin sïguiyë”.

Gran Bretäña nacionpita Tom Eyre jutiyoq colportormi (kananqa precursor nirmi reqintsik) entienditsikurqan Bibliata Estudiaqkuna tsë revistata leyir imanö sientikuyanqanta. Kënömi nirqan: “Mëtsikaq wawqi panikunam alläpa kushikuyarqan Apocalipsis librupa 12 kaq capïtulunta entienditsikayämunqanta leyirnin. Diospa Gobiernun ciëluchö gobernar qallëkunqantana musyarirqa, pïmë nunakunatam willar qallëkuyarqä. Tsëmi yanapayämarqan maslla yachatsikuyänäpaq y sirweqninkunata Jehovä dirigikanqanta mas cläru rikäyänäpaq”.

JEHOVÄPITA YACHATSIKUYÄNAMPAQ KAQTA ENTIENDIYAN

Jehoväpa testïgunkunaqa kananqa allim entiendintsik Isaïas 43:10 textu ninqanta. Kënömi nin: “Qamkunam noqapa testïgükuna kayanki. Awmi, qamkunam sirwimaqnïkuna y noqa akranqä nunakuna kayanki”. Unëqa kë textuta manam alläpatsu entienditsikayämurqan. Peru 1925 watapitaqa Isaïas 43:10 y 12 textutaqa ingles idiömachömi 11 revistakunachö alli entienditsikayämurqan.

1925 wata agostu killa ushëkaptinnam, Bibliata Estudiaqkunaqa Indiänachö këkaq Indianäpolis markachö asamblëata rurayarqan. Y tsë asamblëapaq progrämachömi wawqi Joseph Rutherford kënö ninqan qellqarëkarqan: “Kë asamblëamanqa shamurquntsik [...] Señornintsikpita yachakur mas kallpayoq tikranapaqmi, tsënöpam markantsikkunata kutirqa Jehoväpita maslla yachatsikushun”. Tsë asamblëaqa öchu junaqkunapam karqan y llapankunatam animarqan Jehoväpita maslla yachatsikuyänampaq.

Säbadu 29 de agostum wawqi Rutherford discursunchö llapankunata nirqan Jehoväpita maslla yachatsikuyänampaq. Kënömi nirqan: “Jehovämi kënö niyäshunki: ‘Qamkunaqa testïgükuna[m] kayanki y noqam Dios kä’”. Y tsëpitanam kënö nirqan: “Nunakuna rikäyänampaq juk señalta jawiyë” (Is. 43:12; 62:10). Tsëpitanam kënö entienditsikurqan: “Kë Patsachöqa juk señalta rikätsikuyta puëdiyan o Jehoväpita yachatsikuyta puëdiyan santu espïritunwan Señor yanapanqan nunakunallam”.

Tsëpitanam discursunta ushaskir wawqi Rutherford juk documentuta leyirqan, tïtulunqa “Mensaje de esperanza” nirqanmi. Tsë documentuchöqa nirqan, “nunakuna yamë kawakuyänampaq alli saludyoq kayänampaq, mana wanurna kawakuyänampaq, libri kayänampaq y imëpis kushishqa kayänampaqqa” Diospa Gobiernunlla yanapanampaq kaqtam. Tsë leyinqanta wiyarirmi asamblëachö këkaqkunaqa alläpa kushikuyarqan. Tiempuwannam tsë documentuchö ninqanta atska idiömakunaman traduciyarqan y yachatsikuyänampaqmi imprimiyarqan. Y 40 millontanömi nunakunata dejapuyarqan.

Bibliata Estudiaqkunaqa Jehoväpa testïgunkuna neq jutita manaraq churakushqa karpis, allinam entiendiyarqan Jehoväpita yachatsikuyta mas puntaman churayänampaq kaqta.

YACHAKUYTA MUNAQKUNAMAN KUTIYAN

Bibliata Estudiaqkunaqa mëtsë nacionkunachömi mas mirayarqan, tsëmi Bibliata Estudiaqkunata dirigeqkunaqa animayarqan, alli noticiakunata wiyakushqa nunakunaman Diospita yachatseq kutiyänampaq. Asamblëachö wawqi Rutherford leyinqan “Mensaje de esperanza” neq documentupa copiankunata nunakunata dejapur ushariyaptinmi, Bulletina tratädu kënö nirqan: “Publicacionkunata mana dejapushqa karpis, tsë documentupa copiankunata chaskikushqa nunakunaman yachatseq kutiyänëkipaq tiempuykikunata patsätsiyë”.

1925 wata enëru killa kaq Bulletin tratäduchömi juk wawqi ninqan qellqarëkarqan. Tsë wawqiqa Texaschö këkaq Planu markapitam karqan. Kënömi nirqan: “Yachatsikoq atska kuti ëwayanqä markakunachömi Diospita yachakuyta munaqkunata mas tariyarqö. Juk markamanmi diez watachö pitsqa kutipa yachatsikoq ëwayarqä. [...] Y tsëllaraqmi tsë markaman juk paniwan mamänï kutiyashqa y mëtsika librutam nunakunata dejapuyashqa”.

Panamä nacionpita juk colportormi kënö nin: “Puntata visitayanqächö wiyakuyta mana munaq nunakunam, yapë kutiyaptïqa shumaq wiyakuyan. Kë wataqa yachakuyta munaq nunakunaman kutinäpaqmi maslla tiemputa rakirqö y wakin nunakunaqa allim yachakuykäyan”.

ATSKARAN TRABÄJU KAN

1925 wata ushëkaptinnam wawqi Rutherford colportorkunaman cartakurqan, y tsëchömi nirqan tsë watachö imakunata rurashqa kayanqanta y shamoq watachö rurayänampaq atska trabäjuraq kanqanta. Kënömi nirqan: “Kë wataqa llakishqa këkaq nunakunata consolarmi allipa yanapakuyarqunki. Y tsënöpam qamkunapis kushishqa këkäyanki. [...] Shamoq watachöpis Jehoväpita y Gobiernumpitam kushishqa yachatsikurnin sïguiyanki y llapan nunakuna rikäyänampaq juk señalta churareq cuentam Jehoväpita yachatsikur sïguiyanki. […] Llapantsik juntu Jehovä Diosnintsikpita y Gobiernumpita nunakunata willar sïguishun”.

1925 wata ushananchömi wawqikunaqa patsëkätsiyarqanna Nueva Yorkchö këkaq Brooklyn Betelta mas jatunta rurayänampaq. Y tsë trabäjutaqa 1926 watachömi rurar qallëkuyänan karqan.