Ama qonqashuntsu wakinkunapaq mañakuyta

1. ¿Imanirtan nintsik mañakunqantsiktaqa Jehovä Diosnintsik alläpa valoranqanta?

JEHOVÄ Diosnintsik, pëman mañakunantsikta permitimanqantsikqa alläpa shumaqmi. Këllaman pensarishun: Jehoväqa angelkunata y Tsurin Jesustapis imëkachö yanapakuyänampaqmi churashqa (Sal. 91:11; Mat. 28:18). Peru mañakunqantsikta wiyanampaqqa, ¿pitataq churashqa? Manam pitapis churashqatsu. Pëqa mañakunqantsikta kikinmi wiyëta munan (Sal. 65:2).

2. ¿Imatataq apostol Pablupita yachakuntsik?

² Jehovä Diosnintsiktaqa llapan yarpachakunqantsiktam willëta puëdintsik. Tsënö kaptimpis, jukkunapaqpis mañakuyta puëdintsikmi. Tsëtam apostol Pablupis rurarqan. Ëfesu congregacionchö cristiänukunatam kënö nirqan: “Qamkunapaqmi imëpis mañakü” (Efes. 1:16). Pabluqa atskaqpaq y cada ünupaqpis mañakoqmi. Timoteutam kënö nirqan: “Teyta Diostam agradecikü, y paqasta junaqta rogakunqächömi qamta imëpis yarpaq” (2 Tim. 1:3). Rikärinqantsiknöpis apostol Pabluqa manam kikinllapaqtsu mañakurqan, sinöqa jukkunapaq mañakunampaqpis tiempuntam rakirqan (2 Cor. 11:23; 12:7, 8).

3. ¿Imanirtan höraqa wakinkunapaq mañakuyta qonqëkushwan?

³ Capazchi höraqa wakinkunapaq mañakuyta qonqarishwan. ¿Imanirtan tsë pasamashwan? Sabrïnaa jutiyoq panintsikmi kënö cuentakun: “Kanan tiempuqa alläpa ocupädum kantsik. Tsëmi problëmantsikllaman yarparnin kikintsikllapaq mañakurishwan y wakinkunapaqqa yarpashwantsu”. Tsë pasamashqaqa, këchö yachakunqantsikmi yanapamäshun imanir wakinkunapaq mañakunapaq kaqta y imanö mañakunapaq kaqta.

¿IMANIRTAN WAKINKUNAPAQPIS MAÑAKUSHWAN?

4, 5. ¿Imanirtan nintsik wakinkunapaq mañakunqantsikqa ‘alläpa poderyoq’ kanqanta? (Santiägu 5:16).

⁴ Jukkunapaq mañakunqantsikqa “alläpa poderyoqmi” (leyi Santiägu 5:16). ¿Peru rasumpaku yanapakun jukkunapaq mañakunqantsik? Awmi. Tsëtam Jesusqa alli musyarqan. Tsëmi neganampaq kaqta musyarnin apostol Pëdruta kënö nirqan: “Noqaqa markäkoq o yärakoq këta mana dejanëkipaqmi qampaq rogakurqö” (Lüc. 22:32). Tsënöllam apostol Pablupis alli musyarqan jukkunapaq mañakunqantsikqa yanapakunqanta. Röma markachö juk wayillachö prësuranqan witsanmi Filemonman kënö cartakurqan: “Noqapaq mañakuyanqëkirëkurmi qamkunaman kutitsiyämänanta shuyarä” (Filem. 22). Y rasumpam, Pabluqa ichik tiempullachönam libri quedarirqan y yapëmi yachatsikur qallëkurqan.

⁵ Mañakurpis, manam Jehovä Diosnintsiktaqa mañakunqantsiknö ruramunampaq obliguëkantsiktsu. Peru pëqa jukkunapaq yarpachakunqantsiktam cuentachö katsin, tsëmi höraqa mañakunqantsikta ruraramun. Tsëta musyarmi imëpis mana dejëpa mañakuntsik y mañakurirqa yanapanampaq kaqmanmi confiakuntsik (Sal. 37:5; Biblia de estudiuchö 2 Corintius 1:11 textuta y nötankunatapis leyi).

6. ¿Imanö nuna kanapaqtan jukkunapaq mañakunqantsik yanapamantsik? (1 Pëdru 3:8).

⁶ Jukkunapaq mañakurqa, mas ‘llakipäkoq’ këtam yachakuntsik (leyi 1 Pëdru 3:8). Llakipäkoq nunaqa wakinkuna imakunapa pasayanqantam alkäbu këkan y yanapakunampaqmi listu këkan (Mar. 1:40, 41). Michael jutiyoq anciänum kënö nin: “Wakinkuna wanayanqankunapaq mañakurqa, masmi imakunapa pasëkäyanqanta cuentachö katsï, tsëmi pëkunataqa maslla kuyä. Pëkuna mana musyayaptimpis, mas amïgunkuna kanqätam sientï”. Richard jutiyoq anciänunam kënö nin: “Wakinkunapaq mañakurqa, masllam yanapëta munä. Y mañakunqäta Jehovä contestamurqa, noqallatam utilizäman yanapanäpaq”.

7. ¿Imanötan wakinkunapaq mañakunqantsikqa yanapamantsik? (Filipensis 2:3, 4; fötukunata rikäri).

⁷ Wakinkunapaq mañakurqa, manam alläpaqa problëmantsikkunaman yarparäshuntsu (leyi Filipensis 2:3, 4). Musyanqantsiknöpis kanan witsanqa Diablum kë munduta gobernëkan, y imëka sufrimientupam pasantsik (1 Juan 5:19; Apoc. 12:12). Tsëmi wakinkunapaq mañakurqa, cuentachö katsintsik “entëru patsachö wawqikuna y panikunapis” imëka sufrimientupa noqantsiknölla pasëkäyanqanta (1 Pëd. 5:9). Katherine jutiyoq precursöram kënö nin: “Wakinkunapaq mañakurqa, pëkunapis noqanölla problëmapa pasëkäyanqantam yarpärï. Tsëmi yanapaman problëmäkunallaman alläpa mana yarparänäpaq”.

¿PIKUNAPAQTAN MAÑAKUSHWAN?

8. ¿Pikunapaqtan mañakushwan?

⁸ Diosnintsikmanqa mañakuyta puëdintsik qeshyëkaqkunapaq, escuëlachö problëmakunapa pasëkaq jövinkunapaq, edäyëkaqkunapaq, Diosta sirwiyanqanrëkur familiankuna o autoridäkuna chikiyanqan wawqikunapaq y panikunapaq (Mat. 10:18, 36; Hëch. 12:5), o polïtica asuntu problëma kaptin o ima desgraciapis kaptin wayinkunata dejaskir ëwakushqa wawqikunapaq y panikunapaqmi. Tsë wawqikunata y panikunata mana reqirpis pëkunapaq mañakurqa, juknintsik juknintsik kuyanakunantsikpaq Jesus mandakunqantam cäsukuykantsik (Juan 13:34).

9. ¿Imanirtan imëka rurëchö yanapakoq wawqikunapaq y warminkunapaqpis mañakushwan?

⁹ Tsënöllam imëkachö yanapakoq wawqikunapaqpis mañakuyta puëdintsik. Mañakushwanmi Jehoväpa Testïgunkunata Pushaqkunapaq y yanapaqninkunapaq, Sucursalta rikaqkunapaq, Betel wayichö imëka trabäjuta rikaqkunapaq, congregacionkunata watukaqkunapaq, anciänukunapaq y siervu ministerialkunapaq. Pëkunapis imëka problëmakunapam pasayan (2 Cor. 12:15). Congregacionkunata watukaq Mark jutiyoq wawqim kënö nin: “Noqaqa papänïwan y mamänïwan mana juntu karmi alläpa yarpachakü. Pëkunaqa edänam kayan y qeshyapäkuyanmi. Musyämi panïwan qowan o runan alli atiendïkäyanqanta, peru noqapis masllam yanapakuyta munä y mana puëdirmi alläpa llakikü”. Tsë wawqikuna imakunapa pasëkäyanqanta mana musyarpis, pëkunapaqmi mañakuyta puëdintsik (1 Tes. 5:12, 13). Tsënöllam warminkunapaqpis mañakurishwan. Pëkunaqa qowankunatam yanapayan trabäjunkunata alli cumpliyänampaq.

10, 11. ¿Jehoväta gustantsuraq atskaq wawqikunapaq y panikunapaq mañakunqantsik?

¹⁰ Yachakurinqantsiknöpis, höraqa atskaq wawqikunapaq y panikunapaqmi mañakurintsik. Tsëmi cada ünupaq mana mañakurpis, carcelchö këkaqkunapaq o wanupakushqa wawqikunapaq y panikunapaq mañakurintsik. Donald jutiyoq anciänum kënö nin: “Mëtsikaq wawqikuna y panikunam imëka mana allikunapa pasayan, tsëmi llapankunapaq mañakurintsik”.

¹¹ Tsënö mañakunqantsikqa, ¿Jehoväta gustanku? ¡Awmi! Y rasumpa kaqchöqa, manam wawqintsikkuna y panintsikkuna cada ünu imakunapa pasëkäyanqantaqa musyantsiktsu. Tsëmi llapankunapaq mañakunqantsikqa allilla (Juan 17:20; Efes. 6:18). Tsënöqa mañakuntsik ‘wawqintsikkunata y panintsikkunata kuyarmi’ (1 Pëd. 2:17).

¿IMATATAQ RURASHWAN CADA ÜNUPAQ MAÑAKUNAPAQ?

12. ¿Imapaqtan yanapamantsik imakunapa pasëkäyanqanta alkäbu kanqantsik?

¹² Imakunapa pasëkäyanqanta alkäbu kashun. Llapan wawqikunapaq y panikunapaq mañakurpis, allim kanman cada ünupaqpis mañakunqantsik. Peru tsëpaqqa kënömi pensanantsik: “¿Congregacionnïchöqa mëqan wawqitan o panitan alläpa qeshyëkan? ¿Mëqan jövintan llakishqa këkan escuëlachö compañërunkuna burlakuyaptin? ¿Mëqan wawqitan o panitan wamranta japallan wätëkan y Jehoväpita yachëkätsin?” (Efes. 6:4). Imakunapa pasëkäyanqanta musyarqa yanapëtam munashun, y pëkunapaqmi Jehovä Diosnintsikman mañakushun (Rom. 12:15).b

13. ¿Mana reqinqantsik wawqintsikkunapaq y panintsikkunapaqqa mañakuyta puëdintsikku?

¹³ Pipaqpis mañakurqa, jutimpa mañakushun. Wawqintsikkunata o panintsikkunata mana reqirpis, jutinkunapaqa mañakuyta puëdintsikmi. Tsëmi alli kanman Crimëa, Eritrëa, Rusia y Singapur nacionkunachö carcelarëkaq wawqintsikkunapaq y panintsikkunapaqpis mañakunqantsik. Jutinkunataqa jw.org päginachömi tarishun.c Congregacionkunata watukaq Brian jutiyoq wawqintsikmi kënö nin: “Carcelchö këkaq wawqikunapa o panikunapa jutinkunatam qellqä y tsëpitam kutin kutin yachakü. Tsëmi yanapaman mañakunqä höra jutinkunata yarpänäpaq”.

14, 15. ¿Imatataq rurashwan wawqi panintsikkuna wanayanqampaq mañakunapaq?

¹⁴ Wanayanqankunaman alli pensëkur mañakushun. Seis kaq pärrafuchö parlanqantsik Michael jutiyoq wawqintsikmi kënö nin: “Carcelchö këkaq wawqikunapaq jw.org päginachö leyirqa, kënömi pensä: ‘Carcelchö noqa këkarqa, ¿imanöraq sientiküman? Warmïpaqchi alläpa yarpachaküman y imanö këkanqantachi musyëta munäman’. Tsënö alli pensanqämi yanapaman carcelchö këkaq casädu wawqikunapaq mañakunäpaq” (Heb. 13:3).

¹⁵ Carcelchö këkaqkuna cada junaq imakunapa pasayanqanman pensanqantsikmi yanapamäshun, wanayanqankunapaq Diosman mañakunapaq. Capazchi mañakurishwan guardiakuna shumaq tratayänampaq o Diosnintsikta adorayänanta autoridäkuna permitiyänampaq (1 Tim. 2:1, 2). Tsënöllam mañakushwan, carcelchö këkaq wawqikunata y panikunata rikarnin amänun congregacionkunachö wawqi panikuna Jehovä Diosnintsikta mana dejëpa sirwiyänampaq y mana Testïgu kaqkunapis yachakuyta munayänampaq (1 Pëd. 2:12). Manam carcelchö kaqkunallapaqtsu mañakunantsik, sinöqa llapan wawqintsikkunapaq y panintsikkunapaqmi. Tsëmi imakunapa pasëkäyanqanta alkäbu kanantsik, jutinkunapa mañakunantsik y wanayanqankunapaq mañakunantsik. Tsëta rurarqa, mas ‘kuyakoqmi’ kashun (1 Tes. 3:12).

MAÑAKUNQANTSIKTA MUNANQANTSIKNÖ RURAMUNANTA SHUYARÄSHUNTSU

16. ¿Imatataq cuentachö katsinantsik mañakunqantsik höra? (Mateu 6:8).

¹⁶ Yachakurinqantsiknömi, jukkunapaq mañakunqantsikqa alläpa poderyoq, y Diosnintsikqa mañakunqantsikta wiyarmi yanaparinman. Peru Diosnintsikman mañakurqa, ¿mana musyanqankunataku willëkantsik? Manam. Pëqa llapantam musyëkan. Tsëmi imata ruranampaq kaqta consejaqnöqa mañakunantsiktsu. Pëqa manaraqpis mañakushqam sirweqninkuna imakunapa pasëkäyanqanta y imata wanayanqanta musyanna (leyi Mateu 6:8). Peru tsënö musyëkaptinqa, ¿imanirtan jukkunapaq mañakuntsik? Këchö yachakunqantsiknöpis manam yanapananta o yanapamänata munarllatsu, sinöqa wawqintsikkunata y panintsikkunata kuyarmi. Jehoväqa pënö kuyakoq kanqantsikta rikämarnintsikmi alläpa kushikun.

17, 18. ¿Imanirtan nintsik mañakunqantsikkunata Jehovä Diosnintsik cuentachö katsinqanta? Juk ejempluwan willakaramuy.

¹⁷ Jehovä Diosnintsikqa, mañakunqantsiknö mana yanaparpis alläpam kushikun wawqintsikkunata y panintsikkunata alläpa kuyarnin pëkunapaq mañakushqa. Këta entiendirinapaq këllaman pensarishun: juk nunapa ishkë wamrankuna kanman. Mayor kaq ollqu wamran qeshyarinman, tsëna menor kaq warmi wamranqa papäninta kënö nir roganman: “Papä, turïta jampïkullë, alläpam qeshyëkan”. Papäninqa qeshyëkaq wamranta kuyanmi, allim cuidëkan y musyanmi imanö yanapanampaq kaqta. Tsënö kaptimpis, warmi wamran turinta alläpa kuyanqanta rikarmi alläpa kushikun.

¹⁸ Tsënömi Jehovä Diosnintsikpis wakinkunata kuyanantsikta y pëkunapaq mañakunantsikta munan. Tsëta rurarqa manam kikintsikllamantsu pensëkantsik, sinöqa wakinkunapaqpis yarpachakuykantsikmi. Y tsëtaqa Jehovä Diosnintsik manam imëpis qonqanqatsu (2 Tes. 1:3; Heb. 6:10). Y capazchi yachakurinqantsiknöpis, Jehovä Diosnintsikqa mañakunqantsikta wiyarnin wawqi panintsikkunata yanaparinqa. Tsënö këkaptinqa, ¡ama imëpis qonqashuntsu wawqintsikkunapaq y panintsikkunapaq mañakuyta!