Jehoväpa Testïgunkunata Pushaqkunaqa ishkë masnam kayan

2024 wata 5 de octubrichömi, Jehoväpa Testïgunkunata Pushaqkuna rurayämunqan reunionchö willakayämurqan, wawqintsik Jody Jedele y Jacob Rumph Jehoväpa Testïgunkunata Pushaqkunapitana kayanqanta. Atska watapanam kë wawqintsikkunaqa Jehoväta mana dejëpa sirwikäyan.

Wawqi Jedeleqa Estädus Unïduschö këkaq Misuri markachömi yurikurqan. Pëtaqa papäninwan mamäninmi wamra kanqampita Jehoväpita yachatsiyarqan. Misuri markachö wallkaqlla Testïgukuna kayaptinmi, mëtsëpita wawqi panikuna Diospita yachatsikuyänampaq yanapakoq ëwayaq, tsëmi wawqi Jedeleqa atskaq wawqi panikunata reqirqan. Kuyakoq y familianö kayaptinmi, pëpis Jehoväta sirwita munarqan, tsëmi 1983 wata 15 de octubrichö bautizakurqan. Jehoväpita yachatsikuy gustaptinmi, colegiunta usharir 1989 watachö precursor regular karqan.

Wawqi Jedeletawan panintaqa, wamra kayanqampitam papäninwan mamänin Betelta seguïdu apayaq, tsëmi pëkunaqa Betelchö yanapakuyta munayarqan. Y tiempuwannam Betelman ishkan yanapakoq ëwayarqan. Wawqi Jedeleqa 1990 wata setiembri killachömi, Wallkill Betelchö yanapakurqan. Puntataqa trabajarqan limpiapakuyänan grüpuchömi y tsëpitanam wawqi panikunapa saludninkunata rikarnin.

Tsë witsanqa, Wallkill Betelpa amänunchö këkaq español congregacionkuna miraptinmi, yanapakuyänampaq mas wawqikunata necesitayarqan. Tsëmi wawqi Jedeleqa español congregacionman yanapakoq ëwarqan y español idiömatam yachakurqan. Tsënö yanapakuykarmi Dämaris jutiyoq precursörata reqirqan y casakurirmi Betelchö ishkan yanapakuyarqan.

2005 watachömi mamäninta y Dämarispa papänintawan mamäninta cuidayänampaq Betelpita yarquyarqan y precursor regularmi kayarqan. Wawqi Jedeleqa Precursorkunapaq Escuëlachömi atska kuti yachatsikurqan. Tsëpitanam Hospitalchö Yawarta Mana Churamänapaq Yanapakoqkunachö y Atska nacionkunachö Diospa Wayin Rurëta Rikaqkunachöpis yanapakurqan.

2013 watachömi Betelman yapë invitayarqan Warwick sucursalta rurayanqanchö yanapakuyänampaq. Tsëpitaqa Pattersonchö y Wallkillchöpis yanapakuyarqanmi. Wawqi Jedeleqa Obrakunata y Plänukunata Rikaqkunachö y Yawar Asuntuta Rikaqkunachöpis yanapakurqanmi. 2023 wata marzu killachönam Diospita Yachatsikuyta Rikaqkunata yanapanampaq churayarqan. Pëqa imëkachö yanapakushqa karmi kënö nin: “Höraqa mana yachanqantsik carguman churamashqaqa mantsapakuntsikmi, peru tsë hörakunam Jehoväman confiakunantsik, pëqa llapantam rurëta puëdin”.

Wawqi Rumphqa Estädus Unïduschö këkaq California markachömi yurirqan. Wamra kanqan witsanqa, mamäninqa manam reunionkunaman ëwaqnatsu. Peru wamranta Bibliachö willakunqankunata yachatsinampaqmi kallpachakurqan. Wawqi Rumphqa cada watam awilanta visitaq ëwaq, awilanqa Jehoväta mana dejëpam sirwirqan y alli ejemplunwanmi willkanta yanaparqan Jehoväpita yachakuyta munanampaq, tsëmi wawqi Rumphqa 13 watayoq këkar Bibliapita yachakur qallëkurqan. Y 1992 wata 27 de setiembrichömi bautizakurqan. Mamänimpis yapëmi Jehoväta sirwir qallëkurqan, y llapan familianmi Bibliapita yachakur bautizakuyarqan.

Wawqi Rumphqa jövin kanqan witsanmi precursorkunata rikarqan alläpa kushishqa kayanqanta. Tsëmi pëpis colegiunta ushaskir, 1995 wata setiembri killachö precursor tikrarqan. Y 2000 watachönam Diospita yachatsikoqkunata wanayanqan markachö yanapakunampaq Ecuador nacionta ëwakurqan. Tsëchömi Canadä nacionpita Inga jutiyoq precursörata reqirqan y pëwanmi casakurqan. Casakuskirnam, publicadorkuna wallkaqlla kayanqan markachö yanapakuyarqan. Tsë grüpuqa kananqa jatun congregacionnam.

Tiempuwannam churayarqan precursor especial kayänampaq y tsëpitanam congregacionkunata watukayänampaq. 2011 watachönam Galaad Escuëlapa 132 kaq cläsinman invitayarqan. Tsë escuëlata usharirqa mëtsë nacionkunachömi yanapakuyarqan; kayarqanmi betelïta, misionëru y congregacionkunata watukaq. Wawqi Rumphqa Diospa Gobiernumpita Yachatsikoqkunapaq Escuëlachöpis yachatsikurqanmi.

COVID-19 qeshya qallëkuptinmi Estädus Unïdusta kutikuyarqan. Tsëchö këkäyaptinnam Wallkill Betelchö yanapakuyänampaq invitayarqan, y wawqi Rumphtaqa Diospita Yachatsikunqantsikta dirigeqkunachö trabajanampaqmi yachatsiyarqan. Tsëpitanam Ecuador nacionta mandayarqan, tsëchömi Sucursalta rikaqkunachö trabajarqan. 2023 watachönam Estädus Unïduschö këkaq Warwick Betelchöna yanapakuyänampaq niyarqan y 2024 wata enëru killachönam Diospita Yachatsikuyta Rikaqkunata yanapanampaq churayarqan. Mëtsëchö yanapakunqampaqmi wawqi Rumph kënö nin: “Jehovätaqa kushishqa sirwintsik manam mëchö o imachö yanapakur-raqtsu, sinöqa wawqi panintsikkunawan juntu sirwirmi”.

Kë wawqikuna imëkachö yanapakuyanqantaqa alläpam valorantsik (Filip. 2:29).