“Qamkunawanmi ëwayäshaq”

1, 2. (1) ¿Kanan witsan ima pasakunampaq kaqtataq Jehovä willakurqan? (2) ¿Ima tapukïkunatataq kë yachatsikïchö contestashun? (Rikäri kë yachatsikïpa qallananchö këkaq dibüjuta.)

JEHOVÄMI nirqan kanan witsankunaqa, tukïläya idiömäta parlaq më tsë nacionpita “chunka nunakuna” juk “judïu” nunapa röpampita tsaripakurir, kënö niyänampaq kaqta: “Qamkunawanmi ëwayäshaq, porqui qamkunawan Dios këkanqantam wiyayarqü” (Zacarïas 8:23). “Judïu” nunaqa ciëlupaq akrashqakunatam rikätsikun. Bibliaqa ‘Diospa rasonpa israel nunancuna’ nirpis qayanmi (Gälatas 6:16). Y ‘chunka nunakunaqa’ mana wanushpa kë Patsachö kawaqpaq kaqkunatam rikätsikun. ¿Imanirtaq ciëlupaq akrashqakunawan ëwëta munayan? Porqui musyayanmi pëkunata Jehovä aprobashqa kanqanta y pëkunawan juntu Diosta adorë kushikïpaq kanqanta.

² Zacarïasnömi Jesuspis yachatsikurqan, Diospa sirweqninkunaqa juknölla këkäyänampaq kaqta. Pëqa ciëlupaq akrashqakunatam “wallkaqlla üshakuna” nir qayarqan. Y Patsachö mana wanushpa kawëta shuyaraq kaqkunataqa “juk kaq üshakuna” nirmi qayarqan. Jina nirqanmi, “juk kanchalla üshanö” kayanqanta y pëta jukllëlla “mitseqnintanö” qatiyänampaq kaqta (Lücas 12:32, NM; Juan 10:16, NM). Tsënö kaptimpis, itsa kënö tapukushwan: “¿Kanan witsan ciëlupaq akrashqakunapa jutinkunata musyëta wanantsikku? ¿Imanötaq ciëlupaq akrashqakuna portakuyanman? Congregacionnintsikchö pipis tantata mikur y vïnuta upur qallëkuptinqa, ¿imanötaq tratashwan? ¿Y yarpachakushwanku Jesus Wanunqanta Yarpëchö tantata mikoqkuna y vïnuta upoqkuna mas mirayaptin? Kë yachatsikïchömi kë tapukïkunata contestarishun.

¿CIËLUPAQ AKRASHQAKUNAPA JUTINKUNATA MUSYËTA WANANTSIKKU?

3. ¿Imanirtaq musyëta puëdintsiktsu pikuna ciëluta ëwayänampaq kaqta?

³ Manam kë Patsachö këkaq akrashqakunapa jutinkunata musyëta tïranantsik. Porqui manam segürutsu kantsik, llapankuna ciëluta ëwayänampaq kaqta^[1] (rikäri kë yachatsikïpa ushananchö këkaq willakïta). Rasunmi, ciëluta ëwayänampaqqa Dios invitashqam, peru ushananyaq alleq tsarakoqkunallam ëwayanqa. Satanasqa tsëta musyarmi, ‘profeta tucoqcunata’ utilizan mana allikunaman ishkitsinampaq (Mateu 24:24). Akrashqakunaqa ciëluta ëwayänampaq següru kayanqa Jehovä chipyëpa aprobariptinraqmi. Tsë aprobaciontaqa chaskiyanqa manaraq wanurnin o “jatun sufrimientu” manaraq qallaptinmi (Apocalipsis 2:10; 7:3, 14, NM).

4. Juk kaq üshakuna kë Patsachö këkaq ciëlupaq akrashqakunapa jutinkunata mana musyëkarqa, ¿imanirtaq “qamkunawanmi ëwayäshaq” niyan?

⁴ Patsallachöraq këkaq akrashqakunapa jutinkunata mana musyëkarqa, ¿imanirtaq juk kaq üshakuna “qamkunawanmi ëwayäshaq” niyan? Bibliam nin “chunka nunakuna” juk “Judïu” nunapa röpampita tsaripakurir kënö niyänampaq kaqta: “Qamkunawanmi ëwayäshaq, porqui qamkunawan Dios këkanqantam wiyayarqü”. Rikanqantsiknömi, kë textuqa parlan juk “Judïu” nunapaq, tsëpitanam “qamkunawanmi” nin. “Judïu” nuna nirqa rikätsikïkan ciëlupaq llapan akrashqakunatam y manam jukllëllatatsu. Tsëtam juk kaq üshakunaqa musyayan, tsëmi ciëlupaq akrashqakunawan “ëwëkäyanqanta” nita puëdiyan, juk parlakïchöqa, pëkunawan juntum Jehoväta sirwikäyan. Manam wanayantsu jutinkunata musyëta cada ünuta qatiyänampaq. Porqui Bibliaqa nin, Jesusllata qatinapaqmi (Mateu 23:10, NM).

¿IMANÖTAQ CIËLUPAQ AKRASHQAKUNA PORTAKUYANMAN?

5. (1) ¿Ima consëjutataq precisaqpaq churayanman ciëlupaq akrashqakuna? (2) ¿Imanirtaq alläpa precisan kë consëjuta wiyakuyänan?

⁵ Ciëlupaq akrashqakunaqa 1 Corintius 11:27-29 (leyi) textuchö consëjutam wiyakuyänan. Jesus Wanunqanta Yarpëchö, Dioswan amïgu këninta mana cuidëkar mëqampis tantata mikur y vïnuta upurqa, ‘mana caqpaqmi churëcanman’. Juk parlakïchöqa, mana respetakushpam portakïkanman (Hebrëus 6:4-6; 10:26-29). Kë consëjutaqa precisaqpaqmi churayänan, porqui juk akrashqa alleq mana tsarakurqa, manam ciëluchö ‘premiuta chasquinqatsu’ (Filipensis 3:13-16).

6. ¿Imanötaq portakuyanman ciëlupaq akrashqakuna?

⁶ Pablum ciëlupaq akrashqakunata kënö nirqan: “Tsemi qamcunata roguecuyaq Teyta Dios acrayäshonqequirecur, pe munashqannona shumaq portacur cawacuyänequipaq”. ¿Imanötaq këtaqa rurayänan karqan? Pablum kënö willakur sïguin: “Rogayaqmi qollmi shonqiquicunawan shumaq cawacuyanequipaq. Tsenolla jucniqui jucniquipis pasensianacur mana chiquinacushpa cawacuyänequipaq”. Jina juknölla y yamë kawakuyänampaq kallpachakur sïguiyänampaqmi yarpätsirqan (Efesius 4:1-3). Santu espïritunwanmi Diosqa sirweqninkunata yanapan qollmi shonqu kayänampaq, tsëmi orgullösutsu kayan (Colosensis 3:12). Ciëlupaq akrashqakunaqa manam pensayantsu, akrashqa kayanqanrëkur wakinkunapita mas alli kayanqanta, mas santu espïrituyoq kayanqanta y Bibliata mas entiendiyanqanta. Jina manam akrashqa kanqanta pensarnin, pitapis tantata mikunampaq y vïnuta upunampaq niyantsu. Humildi karninmi musyayan, ciëluta ëwanampaqqa pitapis Jehovälla invitëta puëdinqanta.

7, 8. (1) ¿Imakunatataq rurayantsu ciëlupaq akrashqakuna? (2) ¿Imanirtaq tsëta rurayantsu?

⁷ Ciëlupaq akrashqakunaqa, akrashqa kayanqanta precisaqpaq churarnimpis, manam shuyaräyantsu wakin cristiänukuna alläpa precisaqtanö tratayänanta (Efesius 1:18, 19; leyi Filipensis 2:2, 3). Musyayanmi Jehovä akrarqa pï mëta mana musyatsishqa kanqanta. Tsëmi ciëlupaq akrashqa kanqanta qallananllachö pipis mana creiptinqa espantakuntsu. Y musyanmi, juk precisaq cargun Jehovä qonqanta pipis niptin raslla mana creinapaq kaqta Biblia ninqanta (Apocalipsis 2:2). Jinamampis, ciëlupaq akrashqa piwampis tsëraq reqinakurninqa manam ciëlupaq akrashqa kanqantatsu nirin. Porqui manam munantsu pï më cuentata qokuyänanta. Jina manam ciëluchö precisaq carguta chaskirir imakunata ruramunampaq kaqkunata gälakuntsu (1 Corintius 1:28, 29; leyi 1 Corintius 4:6-8).

⁸ Ciëlupaq akrashqa cristiänukunaqa manam kikinkuna purallatsu juntakäyan parlakuyänampaq o Bibliapita yachakuyänampaq (Gälatas 1:15-17). Tsëkunata rurarninqa, congregacionchö juknölla kënintsiktam peligruman churëkäyanman. Y santu espïritupa contranmi rurëkäyanman, porqui santu espïritum yanapakun Diospa markanchö juknölla y yamë kawakunapaq (leyi Romänus 16:17, 18).

¿IMANÖTAQ TRATASHWAN TANTATA MIKOQKUNATA Y VÏNUTA UPOQKUNATA?

9. ¿Imanirtaq ciëlupaq akrashqakunata alläpa precisaqtanöqa tratashwantsu? (Rikäri “Kuyakïqa respetakoqmi” neq recuadruta.)

⁹ Jesusmi discïpulunkunata kënö nirqan: “Qamcunaqa llapequipis tse wauqillam cayanqui”. Jina nirqanmi: “Pipis quiquintä nuna tucoqqa penqacushqam canqa; y qollmi shonqu caqqa allapa presisaqmi canqa” (Mateu 23:8-12). Tsëmi allitsu kanman ciëlupaq akrashqa kaptimpis o pitapis alläpa precisaqtanö tratëqa. Bibliaqa nimantsik anciänukunapa markäkïninkunata qatinapaqmi, peru manam nimantsiktsu nunata qatinapaqqa (Hebrëus 13:7). Rasunmi, Bibliaqa nimantsik wakinkunata ‘allapa respetanapaqmi’, peru manam ciëlupaq akrashqa kayanqampita nikämantsiktsu, sinöqa Diospita yachatsikïchö alläpa trabajayanqampita nikämantsikmi (1 Timoteu 5:17). Juk akrashqata alläpa precisaqtanö tratarninqa, itsa penqakatsishwan, o hasta orgullösuta tikraratsishwan (Romänus 12:3). ¡Manam munantsiktsu culpantsikrëkur ciëlupaq akrashqakuna jutsaman ishkiyänanta! (Lücas 17:2).

10. ¿Imanötaq rikätsikuntsik ciëlupaq akrashqakunata respetanqantsikta?

¹⁰ ¿Imanötaq rikätsikuntsik ciëlupaq akrashqakunata respetanqantsikta? Tukïnöpam. Puntataqa, ciëlupaq akrashqa këman imanö chäyanqanta mana tapuparninmi. Porqui tsëtaqa kikinkunallam musyayan, tsëmi mëtikunantsiktsu (1 Tesalonicensis 4:11; 2 Tesalonicensis 3:11). Jina manam majankuna, teytankuna y kastankunapis ciëlupaq akrashqa kayanqanta pensantsiktsu. Ciëlupaq akrashqa këtaqa manam pipis familiampita herenciatanö chaskita puëdintsu (1 Tesalonicensis 2:12). Jina manam, mana alli sientikuyänampaq tapukïkunata rurantsiktsu. Tantiyarinapaq, manam tapupantsiktsu ciëlupaq akrashqapa warminta, Paraïsuchö qowanwan manana kanampaq kaqman pensar imanö sientikunqanta musyëta munar. Confiakuntsikmi Paraïsuchö llapan munanqantsikta Jehovä qomänapaq kaqta (Salmu 145:16).

11. ¿Imanirtaq “jukkunata ama adulayankitsu” nir Jüdas consejakunqanta wiyakunantsik?

¹¹ Ciëlupaq akrashqakunata, wakin cristiänu mayintsiktanölla tratanqantsikqa, juk tsapäkïmi noqantsikpaq. Porqui Bibliaqa nimantsik “waugentsiccunatucur” “ciëlupaq akrashqam kä” neqkuna kayänampaq kaqta (Gälatas 2:4, 5, NTCN; 1 Juan 2:19). Jina ciëlupaq akrashqakunaqa wakinqa jutsata rurarirmi Diospita rakikäkuriyanman (Mateu 25:10-12; 2 Pëdru 2:20, 21). “Jukkunata ama adulayankitsu” nishpam discïpulu Jüdasqa nirqan. Juk parlakïchöqa, manam congregacionchö alläpa reqishqa kanqampita, ciëlupaq akrashqa kanqampita o unëna Diosta sirwishqa kanqampitaqa pitapis qatinantsiktsu. Alläpam precisan Jüdas consejakunqanta wiyakunantsik. Porqui kë cristiänukuna Diospita rakikäkuriyaptimpis, manam Diosta sirwita jaqishuntsu, ni markäkïnintsikpis ushakanqatsu (Jüdas 16, NM).

¿YARPACHAKUSHWANKU CIËLUPAQ AKRASHQAKUNA MIRAYAPTIN?

12, 13. ¿Imanirtaq yarpachakushwantsu ciëlupaq akrashqakuna mas miraqta rikar?

¹² Atska watakunapam, Jesus Wanunqanta Yarpëchö tantata mikoq y vïnuta upoq cristiänukunaqa mas wallkaqllana kayarqan. Peru kë qepa watakunachöqa masmi mirayashqa. Peru ¿yarpachakushwantsuraq? Manam. Tsëpaq chuskullata rikärishun.

¹³ “Jehoväqa reqinmi pëpa kaqkunata” (2 Timoteu 2:19, NM). Pëqa musyanmi ciëlupaq akrashqa pikuna kayanqanta y pikuna mana kayanqanta. Peru Jesus Wanunqanta Yarpëchö tantata mikoqkunata y vïnuta upoqkunata yupaqkunaqa manam musyayantsu. Tsëmi ciëlupaq akrashqa mana këkäyaptimpis, tantata mikuyaptin y vïnuta upuyaptinqa yupayanlla. Tantiyarinapaq, wakinkunaqa tantata mikuyarqanmi y vïnuta upuyarqanmi, peru kananqa jaqiriyashqam. Y wakinkunanam peqankuna mana alli kaptin ciëlupaq akrashqa kayanqanta pensayan. Tsëmi kë Patsachö rasumpëpa ciëlupaq akrashqakuna ëkaq kayanqantaqa musyantsiktsu.

14. Jatun sufrimientu qallanqan witsampaq, ¿ëkaqraq ciëlupaq akrashqakuna kë Patsachö këkäyanqa?

¹⁴ Ciëlupaq akrashqakunata apakunampaq Jesus shamuptinmi, më tsë markakunachö këkäyanqa. Bibliaqa kënömi nin: “[Jesusqa] anjelcunatam cachamonqa trompetata fuertipa toquecuyänanpaq. Tseno toquecuyaptinmi, mepita tsepitapis acrashqancuna ellucarayämonqa” (Mateu 24:31). Bibliaqa willakunmi ushanan junaqkunachö ciëlupaq akrashqakuna wallkaqllana kë Patsachö quedayänampaq kaqta (Apocalipsis 12:17). Peru manam willakuntsu jatun sufrimientu qallariptin ëkaq këkäyänampaq kaqtaqa.

15, 16. ¿Imakunatataq ciëlupaq akrashqakunapita entiendinantsik?

¹⁵ Jehovämi decidin ciëlupaq kaqkunata imë akranampaq (Romänus 8:28-30). Jesus kawarimunqampita patsëmi ciëlupaq akrar qallëkurqan. Tsë witsanqa itsa llapan cristiänukuna ciëlupaq akrashqa kayarqan. Tsëpita patsëqa atska pachak watakunapam mëtsikaq nunakuna cristiänutukuyarqan. Peru tsë tiempukunachöqa juk ishkëllam rasumpa kaq cristiänukuna kayarqan, pëkunatam ciëlupaq Jehoväqa akrarqan. Pëkunaqa Jesus ninqannömi mana alli qorakunachö trïgu winaq cuenta kayarqan (Mateu 13:24-30). Kë ushanan junaqkunachöpis Jehoväqa sïguikanllam 144.000 grüpuchö kayänampaq akrarnin^[2] (rikäri kë yachatsikïpa ushananchö këkaq willakïta). Ushakë junaqpaq ichikllana pishikaptin, wakinkunata ciëlupaq Jehovä akranampaq decidiptinqa, confiakuntsikmi alli kaqta rurëkanqanta (Isaïas 45:9; Daniel 4:35; leyi Romänus 9:11, 16)^[3] (rikäri kë yachatsikïpa ushananchö këkaq willakïta). Manam Jesus parlanqan trabajadorkunanöqa këta munantsiktsu. Pëkunaqa patronnimpitam mana allita parlayarqan tardina chaq trabajaqkunata alli tratanqampita (leyi Mateu 20:8-15).

¹⁶ Manam llapan ciëlupaq akrashqakunatsu “llapanchö wiyakoq y yachëwan sirweq” kayan (Mateu 24:45-47, NM). Apostolkuna kawayanqan witsanchönömi, kanampis Jehoväwan Jesusqa wallkaq nunakunallata utilizäyan rasumpa kaq yachatsikïta mëtsikaq nunakunata yachatsiyänampaq. Jina ciëlupaq akrashqakunapitaqa wallkaqllam Escritüras Griëgas Cristiänas nishqanta qellqayarqan. Y kanan witsampis ciëlupaq akrashqakunapitaqa, wallkaqllam Diospa markanta yachatsinampaq carguta chaskiyashqa.

17. ¿Imatataq yachakurirquntsik kë yachatsikïchö?

¹⁷ ¿Imatataq kë yachatsikïchö yachakurquntsik? Jehovämi decidishqa cäsi llapan sirweqninkuna kë Patsachö mana wanushpa kawayänampaq y Jesuswan mandakoqpaq kaqkunana ciëluchö kawayänampaq. Jehoväqa llapan sirweqninkunatam bendicinqa: “Judïu” nunata y “chunka nunakunata”. Y shuyaranmi ishkan grüpukuna leyninta wiyakuyänanta y mana jaqipa sirwiyänanta. Ishkan grüpum humildi kayänan, Jehoväta juntu sirwiyänan, juknölla kayänan y congregacionchö yamë kawakï kanampaq kallpachakuyänan. Ushakë junaqta shuyaranqantsikyaqqa, Jehoväta sirwirnin y “juk kancha üshanölla” Jesusta qatir sïguishun.