¿Musyarqëkiku?
Biblia qellqakanqan witsanqa, ¿rasumpaku nunakuna mana alli qorata nuna mayinkunapa chakrankunaman muruyaq?
Mandakoq Justiniänu nuna Digestu nishqan libruta qellqanqampitam, 1468 watachö juk copiata rurayarqan, tsë witsanchö ley asuntukunapita parlaq atska documentukunapitaqa këmi juk kaq karqan.
MATEU 13:24-26 textuchömi Jesus kënö nirqan: “Ciëluchö Gobiernuqa imëka alli muruta chakranman muroq nunanömi. Nunakuna punuyanqanyaqmi pëpa chikeqnin shamïkur, trïgu jananman mana alli qorata maqtsïkur ëwakurqan. Trïgu winarir espigarnin wayur qallëkuptinnam, mana alli qorapis rikakäramurqan”. Wakin yachaq nunakunaqa manam creiyantsu rasumpa pasakunqampita Jesus parlëkanqanta. Peru romänukunapa unë documentunkunachöqa willakunmi rasumpa pasakunqanta.
Bibliapita parlaq juk diccionarium willakun juk nuna vengakurnin jukpa chakranman mana alli qorata muruptinqa, castigashqa kanampaq kaqta romänukunapa leynin mandakunqanta. Rasumpa pasakuptinchi tsë leytaqa patsätsiyarqan. Leykunata alleq reqeq Alastair Kerr jutiyoq nunam nirqan, Justiniänu jutiyoq Römapa mandakoqninqa 533 watachö (J.sh.) Digestu nishqan libruta jorqamunqanta. Kë libruchöqa romänukunapa mëtsika leyninkunam këkarqan y tsëchömi ley asuntuchö yachaq nunakuna niyanqankunapis qellqarëkarqan. Tsëchö qellqarëkaq leykunaqa karqan Jesus shamushqanchöna 100 watapita 250 wata witsankunapitam. Kë Digestu nishqan libruchöqa Ulpianu jutiyoq yachaq nunapaqmi parlan. Kë Ulpiänu nunaqa parlarqan juk nuna, juk nunapa chakranman mana alli qorata mururir cosëchanta perdiratsinqampitam. Jina entienditsikurqanmi cosëchanta perditseq nunata pagatsinampaq derëchuyoq kanqanta.
Rikanqantsiknöpis, Röma markachöqa tsëta ruraq nunakunaqa rasumpam kayarqan. Këmi alleq cläru rikätsikun Jesus ninqanqa pasakïta puëdinqanta.