¿Ima nintan Bibliachö manaraq casakurnin juntu kawayanqampaq?

Bibliachö yachatsikunqan

Teyta Diosmi Bibliachö nimantsik “oqllanakur melanëpaqkunata rurëpita” cuidakunapaq (1 Tesalonicensis 4:3). Bibliachömi nin ‘oqllanakur melanëpaqkunata rurëqa’, mana majanwan oqllanakuyanqan, ollqupura o warmipura oqllanakuyanqan y manaraq casakurnin oqllanakuyanqan kanqanta.

• ¿Imanirtan Diosqa munan manaraq oqllanakurnin casakuyänanta?

• ¿Alliku kanman entiendinakuyanqanta o mana entiendinakuyanqanta musyayänampaq manaraq casakurnin juntu kawayanqan?

• ¿Imataraq rurashwan casädu vïdachö alli kawakunapaq?

¿Imanirtan Diosqa munan manaraq oqllanakurnin casakuyänanta?

• Teyta Diosmi casädu vïdata patsätsirqan. Tsëtaqa rurarqan Adantawan Ëvata casatsirmi (Genesis 2:22-24). Diosqa manam munarqantsu ollquwan warmi manaraq casakurnin juntu kawayänanta.

• Teyta Diosmi musyan noqantsikpaq ima mas alli kanqanta. Pëmi casädu vïdata patsätsirqan, ollquwan warmi casakur imëyaqpis juntu kawakuyänampaq. Tsëtaqa rurarqan, familiachö kaqkuna yamë y següru sientikuyänampaqmi. Këllaman pensarishun: ropëruta alli armanapaqqa, tsë ropëruta ruraq nuna imanö armanapaq nimanqantsiktam cäsukunantsik. Tsënöllam familiachö kushishqa kawakunapaqpis, Teyta Dios nimanqantsikta cäsukunantsik. Nimanqantsikta cäsukurqa imëpis allim kawakushun (Isaïas 48:17, 18).

  

• Manaraq casakurnin oqllanakuyqa mana allikunamanmi chätsikun. Tsëkunaqa kanmanmi, manaraq wamrayoq këta munar qeshyaq tikrayanqan, oqllanakur muyanakuyanqan qeshyakunawan qeshyayanqan y alläpa llakikur sufriyanqan.

• Casakurir ollquwan warmi oqllanakur wamrayoq këta puëdiyanqanqa Diospa qarëninmi. Wamrayoq këta puëdinqantsikqa, Diospa alläpa väleq qarëninmi. Diospaqqa vïdantsik alläpam välin. Tsëmi pëqa munan, qaramanqantsikta valorar casakunqantsik warmillawan o ollqullawan oqllanakunantsikta. Tsënöpam casädu vïdantsikta respetashun (Hebrëus 13:4).

¿Alliku kanman entiendinakuyanqanta o mana entiendinakuyanqanta musyayänampaq manaraq casakurnin juntu kawayanqan?

Casädu vïdachö kushishqa kawakunapaqqa, manam wanantsiktsu manaraq casakur “juk tiempupa” juntu kawakuyta, y munanqantsik höra rakikäkurita. Mas bienqa, casakur äninakunqantsikta cumplinampaq y problëmakunata juntu altsayänampaq kallpachakurmi, masqa kuyanakuntsik.a Peru äninakunqantsikta cumplir imëpis juntu kawakunapaqqa, puntataqa casakunantsikran (Mateu 19:6).

¿Imataraq rurashwan casädu vïdachö alli kawakunapaq?

Llapantapis allilla ruraq casädukunaqa manam kantsu. Peru Bibliachö consëjukunata cäsukurqa, kushishqa këta puëdintsikmi. Wakin consëjukunaqa këkunam:

• Majëki wananqanta mas puntaman churayë (1 Corintius 7:3-5; Filipensis 2:3, 4).

• Mas kuyanakuyänëkipaq y respetanakuyänëkipaq kallpachakuyë (Efesius 5:25, 33).

• Imatapis parlanëkipaqqa alliraq pensë (Proverbius 12:18).

• Pacienciayoq kayë y ras o sas perdonanakuyë (Colosensis 3:13, 14).