¿Bibliaqa ima nintan alläpa mallaqë kanqampaq?
Mëtsë nacionchö mallaqë mana kanampaqmi gobiernukuna imëkata rurëkäyan y nunakuna mëtsika mikuyyoq kayänantam munayan.a Peru, ¿imëllaqa alläpa mallaqë ushakanqatsuraq? ¿Ima nintan Biblia?
Bibliachöqa willakurqannam mikuy ushakänampaq kaqta
Bibliachöqa willakurqannam ‘ushanan tiempuchö’ mikuy ushakänampaq kaqta, tsëqa kanan witsanmi pasakuykan (2 Timoteu 3:1). Teyta Diosqa manam culpayoqtsu mikuy ushakëkanqampita, peru ima pasakunampaq kaqtaqa willamarqantsiknam (Santiägu 1:13). Bibliachö willakunqankunata ishkëllata rikärishun.
“Wakchö këchömi mallaqë [...] kanqa” (Mateu 24:7). Bibliachöqa willakurqannam wakchö këchö mallaqë kanampaq kaqta. Mëtsika mikuy kanqanta rikaqkunam encuestata rurayarqan, y pëkunam këta niyan: “Kë Patsachö mallaqë y desnutrición manana kanampaq imëkata rurar kallpachakurpis, manam imatapis rurëta puëdiyantsu”.b Mëtsë nacionkunachömi mëtsikaq nunakuna mikuyänampaq ashirpis imata tariyantsu, y atskaqmi mallaqarnin wanuykäyan.
“Tsënam yana cawalluta rikarqä. Tsë cawalluta montarëkaqqa makinchömi balanzata katsirqan” (Apocalipsis 6:5). Kë willakuychöqa, cawallu y tsë cawalluta montarëkaqqa ushanan tiempuchö mallaqë kanampaq kaqtam rikätsikun.c Cawalluta montarëkaqqa mikuyta pesëkur rakinampaqmi makinchö balanzata këkätsin. Y juk vozchömi kënö wiyakarqan: “Mikuyqa alläpam cuestanqa y mikuytaqa ama lluta perditsiyëtsu” (Apocalipsis 6:6). Tsëmi cläru rikätsikun kanan witsan mikuy manana kanampaq kaqta y mëtsikaq nunakunam mikuy alläpa cuestaptin alli mikuyta tarita o rantita puëdiyantsu.
Mallaqëqa manam kanqanatsu
Cientïficu nunakunam niyan Patsachö mëtsika mikuy kanqanta y llapan nunakunapaq tinkunqanta. Tsëqa, ¿imanirtan nunakunapaq mikuy pishin? Y Bibliachö ninqannö mallaqë manana kanampaqqa, ¿imatatan Teyta Jehoväd ruramunqa?
¿Imatan problëma? Gobiernukunaqa manam waktsa këta ushakätsita puëdiyantsu ni nunakunata imatapis igualpa entreguëta puëdiyantsu, tsëmi mëtsikaq nunakuna mallaq këkäyan.
¿Imatataq Diospa Gobiernun ruramunqa? Patsachö gobiernukunaqa ushakätsishqam kayanqa y Diospa Gobiernunllam entëru patsachö gobernamunqa, y tsë gobiernuchöqa Jesusmi gobernanti kanqa (Daniel 2:44; Mateu 6:10). Kanan witsanqa mikuy alläpa cuestaptinmi waktsa nunakunaqa rantita puëdiyantsu. Peru Diospa Gobiernunchöqa manam tsënönatsu kanqa. Bibliachömi Jesuspaq kënö nin: “Pëmi salvanampaq mañakoq waktsakunata, humildikunata y yanapayänanta munar qayakoqkunata salvanqa. [...] Patsachöqa mëtsika gränum kanqa, jirkakuna jananchöpis alläpa atskam kanqa” (Salmus 72:12, 16).
¿Imatan problëma? Guërrakuna kanqanrëkurmi desgraciakuna kan y imëkapis alläpam cuestan, y tsërëkurmi mikuytaqa mëtsëman chätsita puëdiyantsu.
¿Imatataq Diospa Gobiernun ruramunqa? “[Jehovämi] patsachö guërrakunata ushakätsin, flechakunata y lanzatapis pakirmi ushakätsin. Soldädukunapa carrëtankunatapis ninawanmi ushakätsin” (Salmus 46:9). Teyta Diosqa flëchakunata y lanzakunatam ushakätsinqa y guërrata ruraq nunakunatapis ushakätsinqam. Tsëqa mëtsëchömi nunakunapaq mëtsika mikuy kanqa. Diosqa palabran Bibliachömi këta animantsik: “Alli nunakunaqa shumaq wëtëkaq plantanömi kayanqa, [...] y alli kawakuyanqanqa [manam] imëpis ushakanqatsu” (Salmus 72:7).
¿Imatan problëma? Alläpa achachë o alalë kaptin y imëka desgraciakuna kaptinmi cosëcha kantsu y animalkunapis wanuyan.
¿Imatataq Diospa Gobiernun ruramunqa? Teyta Diosqa imëka desgraciakunatam ushakätsinqa, y murushqapis mëtsikam wayunqa. Bibliachömi kënö nin: “[Jehovä] alläpa vientuta päratsiptinmi, laqcheqsëkaq lamarpis päran. [...] Yaku mana kanqan sitiukunachömi plantayoq qochakunata yuritsin. Tsaki chakrakunachömi pukyukunata yuritsin. Tsëmanmi [...] mallaqëpita sufreq nunakunata churan [...]. Tsëchömi murupakuyan y früta wayoq plantakunata plantayan, y mëtsikatam cosechayan” (Salmus 107:29, 35-37).
¿Imatan problëma? Imëka mana allikunata ruraq y imëkatapis kikinkunallapaq asheq nunakunaqa salornintsikpaq mana alli mikuykunatam rurayan o michäkuyanmi necesitäyanqan markakunaman mikuy chänampaq.
¿Imatataq Diospa Gobiernun ruramunqa? Teyta Diosqa llullakoq o ulikoq y imëka mana allikunata ruraq nunakunatam ushakätsinqa (Salmus 37:10, 11; Isaïas 61:8). Bibliachömi willakun Jehovä, nuna mayinkunata sufritsiyanqan nunakunapaq justiciata ruranampaq, y mallaqëkaqkunata mikuynin qaranampaq kaqta (Salmus 146:7).
¿Imatan problëma? Cada watam mëtsëchö mëtsika mikuyta perditsiyan.
¿Imatataq Diospa Gobiernun ruramunqa? Diospa gobiernunchöqa manam ima mikuytapis perditsiyanqatsu. Jesusqa kë Patsachö këkarmi tsëta rikätsikurqan, manam ni ima mikuyta perditsirqantsu. Juk kutim milagruta rurar 5.000 nunakunata pachankuna juntanqanyaq mikuyta qararqan. Tsëpitanam qateqninkunata kënö nirqan: “Ichikllapis mana perdinampaq, llapan sobrata juntayämuy” (Juan 6:5-13).
Diospa Gobiernunchöqa manam ni pï mallaqqa kanqanatsu, y llapan nunakunam alli mikuytana mikuyanqa (Isaïas 25:6). Tsëqa, ¿imëraq kanqa? Tsëta musyanëkipaqqa, “Patsataqa, ¿imëraq gobernamunqa?” neq yachatsikuyta leyi.
a Agenda 2030 sobre el Desarrollo Sostenible, aprobada en el 2015 por todos los Estados Miembros de las Naciones Unidas.
b Informe realizado por la Organización de las Naciones Unidas para la Alimentación y la Agricultura, el Fondo Internacional de Desarrollo Agrícola, el Fondo de las Naciones Unidas para la Infancia, el Programa Mundial de Alimentos de las Naciones Unidas y la Organización Mundial de la Salud.
c Apocalipsis libruchö cawallunkuna montarëkaqkunapita musyëta munarqa, “¿Imatataq musyatsikun bestian montashqakunaqa?” neq yachatsikuyta leyi.
d Jehoväqa Diosnintsikpa jutinmi (Salmus 83:18). Rikäri “¿Pitan Jehovä?” neq yachatsikuyta.