¿Imatataq rurashwan warmikuna següru sientikuyänampaq? | ¿Ima nintan Bibliachö?

India nacionpita Madhua jutiyoq warmim kënö willakun: “Wamra kaptïqa turïmi cada junaq maqamaq y mana alli tratamaq. Casakuriptïnam suegräna mana alli tratamaq. Suegräwan suegrüqa sirvientatanömi trabajatsiyämaq, tsëmi wanutsikuytapis munarqä”.

Organización Mundial de la Salud niyanqanmi willakun “warmikunataqa mëtsëchöpis mana alli tratayanqanta”. Y willakunmi kimaq warmipitaqa juk kaqta mana alli tratashqa o abusashqa kayanqantapis.

Tsëpa pasashqa karqa, capazchi pipis maqashunëkita, mana alli tratashunëkita o abusashunëkita mantsanki. Warmikunata maqayanqanta y mana alli tratayanqanta rikarqa, capazchi pensanki warmikunataqa mana cuentaman churayanqanta. ¿Diosqa warmikunata cuentaman churantsuraq?

¿Diosqa warmikunata cuentaman churanku?

Bibliachömi kënö nin: “Ollquta y warmitam kamarqan” (Genesis 1:27, Mushoq Patsachö Kawaqkunapaq Biblia).

¿Ima ninantan tsëqa? Diosnintsikmi ollquta y warmitapis kamarqan, y pëqa munan ishkampis respetashqa kayänantam. Diosqa munan casädu ollqukuna ‘warminkunata kikinkunatanö kuyayänantam’, y manam munantsu qayaparnin ni maqarnin controlayänanta (Efesius 5:33; Colosensis 3:19). Diosnintsikqa munan warmikuna següru sientikuyänantam.

Argentïna nacionpita Marïa jutiyoq warmim kënö willakun: “Wamrallaraq këkaptïmi wakin familiäkuna noqapita abusayarqan. 17 watayoq këkaptïnam patronnï nimarqan pëwan mana punuptïqa trabäjüpita qarqamänampaq kaqta. Casäda këkaptïnam qowä, teytäkuna y vecïnükuna mana imapaqpis väleqtanö tratayämarqan. Tsënö këkarmi Kamakoq Yayantsik Jehovätab reqirqä. Warmikunata respetanqanta yachakurmi, kuyamanqanta y pëpaq alläpa välinqäta musyarirqä”.

¿Imatan yanapashunki mas allina sientikunëkipaq?

Bibliachömi kënö nin: “Alli amïgukunaqa, wawqintsikpitapis mas kuyakoqmi kayan” (Proverbius 18:24).

¿Ima ninantan tsëqa? Alli amïgu o amïgaqa shumaqmi yanapashunki. Yanapashunëkipaq kaqta musyarqa pitapis confiakunqëkita imanö sientikunqëkita willë.

Turquïa nacionpita Elif jutiyoq warmim kënö willakun: “20 watapam pitapis willarqätsu abusamashqa kayanqanta. Tsë tiempuqa ansiedä y depresion niyanqanwanmi qeshyarqä y manam kushishqatsu karqä. Peru confiakunqa amïgä shumaq wiyaramaptinqa mas allinam sientikurqä”.

Bibliachömi kënö nin: “Llapan yarpachakuyanqëkita pëman [Diosman] churarkuyë. Pëqa qamkunapaqmi alläpa yarpachakun” (1 Pëdru 5:7).

¿Ima ninantan tsëqa? Diosman mañakuptikiqa imëpis wiyashunkim (Salmus 55:22; 65:2). Diosqa kuyashurnikim alläpa välinqëkita musyanëkipaq yanapashunki.

Belice nacionpita Äna jutiyoq warmim kënö willakun: “Jehoväta reqinqämi pasamanqampita mas allina sientikunäpaq yanapamashqa. Kananqa imanö sientikunqäta willanäpaqmi pëman mañakü. Diosqa imanö sientikunqätam alli entiendin”.

¿Diosqa imëllapis ushakätsinqatsuraq warmikunata mana alli tratayanqanta?

Bibliachömi kënö nin: “Papäninnaqkunapaq y nuna mayinkuna sufritsiyanqan nunakunapaqmi justiciata ruranki, tsënöpam allpapita rurashqa nunaqa, nuna mayinta sufritsinqanatsu” (Salmus 10:18).

¿Ima ninantan tsëqa? Jehoväqa ichikllachönam mana alli rurëkunata ushakätsimunqa. Tsëmi warmikunata qayapäyanqanatsu ni maqayanqanatsu.

Mëxicu nacionpita Roberta jutiyoq warmim kënö willakun: “Warmikunata y wamrakunata mana alli tratayanqanta Jehovä ushakätsinampaq kaqta musyanqämi, mas allina sientikunäpaq yanapamashqa. Kananqa mas tranquïlunam sientikü”.

¿Musyëta munankimanku Bibliachö imakunata willakunqanta, Bibliaman imanir confiakunëkipaq kaqta o Jehoväpa testïgunkuna Bibliapita imanö yachatsikuyanqäta? Tsëqa kë höjata qarashoqnikita wayikichö watukayäshunëkipaq mañakuy.