Israel nacionchö y amänun nacionkunachö guërra | ¿Ima nintan Bibliachö?

Israelwan Iran guërrata rurayanqanta y Estädus Unïdus mëtikunqanta rikarmi, mëtsëchö nunakuna alläpa yarpachakur këkäyan. ¿Tsë guërramanqa mas nacionkunatsuraq mëtikuyanqa? ¿Mas mana allimantsuraq chäkuriyanqa? Nacionkunachö mandakoqkunaqa, ¿puëdiyanqatsuraq nunakuna yamë y kushishqa kawakuyänampaq yanapakuyta?

Biblia leyeqkunaqa Armagedon guërra kanampaq kaqta Apocalipsis libruchö leyishqa karmi pensayan, tsë guërra këkanqan sitiukunachö (Oriente Proximo niyanqanchö) Armagedon qallanampaq kaqta.

¿Ima nintan Bibliachö?

¿Gobiernukunaqa tsë guërrakunata ushakätsita puëdiyanqatsuraq?

Bibliachömi nin: “Ama mandakoqkunaman ni pï nunakunamampis confiakuyëtsu. Pëkunaqa manam salvayäshuynikita puëdiyantsu” (Salmus 146:3).

Tsë guërrakunata gobiernukuna ushakätsita puëdiyänampaq o mana puëdiyänampaq kaqtaqa manam musyantsiktsu. Peru manam ni pï nunapis, ni mëqan gobiernupis, nï nunakuna patsätsinqan grüpukunapis guërrakunataqa ushakätsita puëdiyanqatsu. Ni manam puëdiyanqatsu entëru Patsachö yamëna kawakunapaq yanapakuytapis, tsëtam Bibliachöqa cläru willakun. Diosllam ‘patsachö guërrakunataqa ushakätsita’ puëdin (Salmus 46:9).

• Masllata musyëta munarqa, Täpakoq revistachö “¿Rasumpatsuraq guërrakuna kanqanatsu?” neqta leyi.

Israel nacionwan Iran nacion guërrata rurayanqanqa, ¿Bibliachö ninqantatsuraq cumplïkan?

Bibliachömi nin: “Guërrakuna kanqanta y guërrakuna kanqampaq willakuyanqantam wiyayanki. [...] Juk nacionmi juk nacionwan guërrata ruranqa, juk gobiernum juk gobiernuwan pelyanqa” (Mateu 24:6, 7).

Guërrakuna kanqanqa, ¿“ushanan tiempuchöna” kawëkanqantsiktaku rikätsikun? Awmi (Mateu 24:3; 2 Timoteu 3:1). Jinamampis, tsë pasakunqankunaqa rikätsikun guërrakunata y llapan sufritsimaqnintsik kaqkunata ichikllachöna Diosnintsik ushakätsinampaq kaqtam.

• Masllata musyëta munarqa, “¿Cuál es la señal de ‘los últimos días’ o ‘los tiempos finales’?” neqta leyi.

¿Israelwan Iran guërrata rurayanqanwantsuraq Armagedon qallanqa?

Bibliachömi nin: “Hebreu idiömachö Armagedon niyanqan sitiumanmi gobernaqkunata juntayarqan” (Apocalipsis 16:16).

Armagedon guërraqa manam gobiernunkuna rurayanqan guërratsu ni Israelwan Iran qallayanqan guërratsu. Armagedon guërraqa entëru Patsachö gobiernukunawan Dios ruranqan guërram.

• Masllata musyëta munarqa, “¿Imatan Armagedon guërraqa?” neqta leyi.

¿Imatan yanapamäshun mana alläpa yarpachakunapaq?

Bibliachömi nin: “Ama imapaqpis yarpachakuyëtsu. Tsëpa rantinqa, imapa pasarpis, mañakur, rogakur y agradecikur Teyta Diosta yanapëkuyäshunëkipaq rogakuyë” (Filipensis 4:6).

Jehoväa Diosqa munan imapaq yarpachakurpis pëman mañakunantsiktam. Noqantsikpaq alläpa yarpachakurmi pëqa mañakunqantsikta wiyan y mana alläpa yarpachakunapaqmi yanapamantsik (1 Pëdru 5:7). Tsëtaqa ruran guërrakuna imanir kanqanta nimarnintsik, guërrakunata imanö ushakätsinampaq kaqta willamarnintsik, y sufritsimaqnintsik kaqkunata imanö ushakätsinampaq kaqta yachatsimarnintsikmi (Apocalipsis 21:3, 4).

• Diosnintsik imanö yanapamanqantsikta maslla musyëta munarqa, “¿Puedo encontrar consuelo en la Biblia?” neqta leyi.