¿Jehoväpa testïgunkunaqa mananaku parlapäyan religionninkunapita yarqushqa kaqkunata?

Jehoväpa testïgunkunaqa llapantapis kuyëpa y respëtuwan tratayänäpaqmi kallpachakuyä. Pipis Testïguna këkar Bibliapita yachatsikoq manana yarquptin o reunionkunaman manana ëwaptinqa, Diosta adorar sïguinampaqmi yanapëta procurayä y kuyëpam tratayä (Lücas 15:4-7).

Peru alläpa grävi jutsata ruraqkunataqa höraqa congregacionpitam rakiyänan (1 Corintius 5:13). Tsënö karpis, cristiänu mayïkunata alläpa kuyarninmi, congregacionpita mana rakishqa kanampaq imëkanöpa yanapëta procurayä. Y congregacionpita rakishqa kayaptimpis Bibliachö ninqannömi kuyëpa y respëtuwan tratayä (Marcus 12:31; 1 Pëdru 2:17).

¿Imanirtan juk Testïguta congregacionpita rakiyan?

Bibliachöqa clärum nin pipis Diospa sirweqnin këkar grävi jutsata ruraptin y cambiëta mana munaptinqa, congregacionpita rakiyänampaq (1 Corintius 5:11-13).a ¿Ima jutsata ruraptintaq pitapis congregacionpita rakiyanman? Bibliachöqa parlan atska jutsa rurëkunapaqmi, wakinqa këkunam: mana majanwan oqllanakoqkuna, machakoqkuna, familiankunata alläpa mana alli trataqkuna, asesïnukuna y suwakoqkuna. Tsënö jutsakunata o juk grävi jutsakunata ruraqkunataqa congregacionpita rakita puëdiyanmi (1 Corintius 6:9, 10; Gälatas 5:19-21; 1 Timoteu 1:9, 10).

Bautizakushqana këkar alläpa grävi jutsata ruraqkunataqa manam jinan höratsu congregacionpita rakiyan. Sinöqa anciänukunamb arrepentikur cambianampaq imëkanöpa yanapëta procurayan (Romänus 2:4). Shumaq y kuyëllapa parlaparmi cambianampaq yanapayan (Gälatas 6:1). Tsënö shumaq tratarnin yanapayanqanqa capaz mana allita rurëkanqanta cuentata qokur arrepentikunampaq yanapanqa (2 Timoteu 2:24-26). Peru kutin kutin yanapëkäyaptimpis jutsata rurar sïguiptin y mana arrepentikuptinqa congregacionpitam rakiyänan, y anciänukunam manana Testïgu kanqanta congregacionchö willakuyänan.

¿Imanötan yanapakun jutsa rurëta mana dejëta munaq cristiänuta congregacionpita rakiyanqan? Juk: congregacionchö kaqkuna Jehovä Diosnintsik munanqannö alli portakuyänampaq y jutsata mana rurayänampaqmi yanapakun (1 Corintius 5:6; 15:33; 1 Pëdru 1:16). Ishkë: jutsata ruraqpis mana allita rurëkanqanta cuentata qokunampaq y cambiukunata ruranampaqmi yanapëta puëdin (Hebrëus 12:11).

¿Imanötan Jehoväpa testïgunkunaqa congregacionpita rakishqa kaqkunata tratayan?

Bibliachöqa clärum kënö nin: “Qamkunaman qellqëkämü [...] pëwan manana juntakuyänëkipaqmi. Tsë nunawanqa ama juntu mikuyëllapistsu” (1 Corintius 5:11). Tsëmi congregacionpita rakishqa kaqkunawanqa imatapis juntuqa rurayätsu. Tsënö karpis reunionkunaman shamuytaqa puëdiyanmi, y shamoqkunataqa shumaqmi chaskiyä y respëtuwanmi tratayä.c Congregacionman yapë kutimuyta munarninqa anciänukunawanmi parlëta puëdiyan.

Y, ¿imatataq rurayan familiankunachö papä kaqta o mamä kaqta congregacionpita rakiyaptin? Majanqa y wamrankunaqa imëpis rurayanqannöllam kuyar y respetar sïguiyan. Peru Diosta adorayänampaq rurayanqankunachöqa mananam participannatsu.

Congregacionpita rakishqa kaqkunaqa, anciänukunatam nïta puëdiyan wayinkunaman watukayänampaq. Anciänukunaqa Bibliachö këkaq consëjukunawanmi cambianampaq y Jehoväman kutinampaq yanapayanqa (Zacarïas 1:3). Mana alli rurëkunata manana rurarqa y Biblia ninqannöna yapë kawakurqa, puëdinmi congregacionman kutita. Congregacionchö kaqkunaqa unë Corintu markachö cristiänukuna rurayanqannöllam perdonëkuyanqa y shumaq kuyëpam animayanqa (2 Corintius 2:6-8).

¿Imanötan sientikuyan congregacionman yapë kutimoqkuna?

Pëkunam kënö niyan:

“Chunka watanam pasashqa karqan jutsata rurëkur congregacionpita rakikanqäpita, y kutita munarpis, ‘kutiptïqa llapan ruranqätachi anciänukunaqa musyëta munayanqa’ nirmi yarpachakoq kä. Peru kutiriptïqa, anciänukunaqa kënömi niyämarqan: ‘Ama llakikuytsu, kanampita witsëpa alliyänëkipaq kaqllamanna kananqa pensë’. Tsënö niyämaptinmi alläpa tranquïla sientikurqä” (Marïa, Estädus Unïdus).

“Congregacionchö wawqi panikunaqa alläpa kushishqam chaskiyämarqan. Kuyëpa chaskiyämaptinmi Jehovä perdonamashqa kanqanta cuentata qokurqä. Tsëmi yanapamarqan unë ruranqäkunaman manana yarparäkunäpaq. Anciänukunaqa shumaqmi consolayämarqan y manam imëpis dejayämarqantsu. Jehovä kuyamanqantam niyämarqan y Jehoväwan yapë amïgu kanäpaqmi yanapayämarqan” (Malcom, Siërra Leöna).

“Jehoväqa alläpam sirweqninkunata kuyan, tsëmi congregacionchö mana allikunata rurar kakuyänantaqa permitintsu. Wakinkunaqa mana allitanömi rikäyan mana allita rurar kakoqkunata congregacionpita rakiyanqanta, peru Jehoväqa kuyakoq karmi tsëta permitin. ¡Jehovä Dios alläpa kuyakoq y perdonakoq kanqantaqa alläpam kushikü!” (Sandi, Estädus Unïdus).