JÖVINKUNA MUSYËTA MUNAYANQAN
¿Imanötan vistikü y altsapäkü?
¿Yarpachakunëkiku imanö vistikunqëkipaq? Awmi, imanö vistikunqëkipitam imanö kanqëkita rikäriyanqa. Pensë: qam imanö vistikunqëkiqa, ¿imanö kanqëkitataq rikätsikun?
Tsëllaraq yarqamoq röpakunata manaraq rantir këkunata cuentachö katsi:
1 kaq: Anunciukunachö churayämunqankunata rikar alliraq yarpachakuri.
Theresa jutiyoq shipashmi nin: “Tsëllaraq yarqamoq röpakunata o moda këkaqkunata tukuyläya anunciukunaman churayämuptin y pïmëta tsënö vistikushqata rikarmi tsënö vistikuyta munarintsik”.
Tsënö anunciukunata rikarqa manam shipashkunallatsu tsënö vistikuyta munariyan. Juk libruchömi kënö nin: “Wamra kayanqampitam ollqu kaqkunapis tsëllaraq yarqamoq röpakuna möda kanqanta rikar, tsë röpakunata vistikuyta munayan” (The Everything Guide to Raising Adolescent Boys).
Këman pensë: Bibliachömi kënö willakun: “Pensëta mana yachaq nunaqa, imata niyaptimpis llapantam creikurkun, peru pensëta yachaq nunaqa, imata ruranampaqpis alliran pensan” (Proverbius 14:15). Tsëmi ima anunciutapis rikarqa yarpachakurinëki imarëkur tsëkunata churëkäyämunqanta. Alläpa taksha o qaraman alläpa laqaraq röpata rikar kënö tapukuy:
“¿Qellëta gänayänanrëkurllaku tsëkunata rurayämun?”
“Tsënö vistikuptëqa, ¿imanö kanqätataq pensayanqa?”
“Tsënö vistikunqäwanqa, ¿shumaq kanqätaku y Diosta adoranqätaku rikätsikuyta munä?”
Juk consëju: Semänachö tsëllaraq yarqamunqan röpakunapaq anunciukuna yarqamuptinqa këman alliraq pensë: ¿imanö nunakunaraq tsë rikoq röpakunata üsayan? ¿Manatsuraq imëkanöpapis rantinëkirëkur imëka rikoq röpakunata jipiyämun? Kërenmi nin: “Jövinkunaqa imëkanöpam shumaq y allish rikakuyta munëkuntsik, y tsëta musyarmi rantikoqkunaqa imëka rikoq röpakunata rurayämun”.
Ishkë kaq: Wakinkunanölla këta munar vistikunqëki.
Manuelmi kënö nin: “Juk moda tsëllaraq yarqamuptinqa pïmëmi tsëta vistikuyan, y mana tsënö vistikuptikiqa parlayäshunkim”. Ännam kënö nin: “Tsëllaraq yarqamoq mödakunata vistikunqëkipita mas alliqa amïguykikuna respetayäshunëkipaqnö vistikunqëkim”.
Këman pensë: Bibliachömi kënö willakun: “Amana kë munduchö nunakunanöqa kayëtsu” (Romänus 12:2). Kë consëjuta cuentaman churar, kapushunqëki röpëkikunata rikë y kënö tapukuy:
“¿Imaman yarpëkurtaq tsë o tal röpata rantï?”
“¿Alläpa cuestaq röparaqku gustaman?”
“¿Wakinkuna alli rikämänanrëkurllaku rantï?”
Juk consëju: Tsëllaraq yarqamoq mödakunanölla vistikuykanqëkiman o mana vistikuykanqëkiman y imanö rikäyäshunëkipaq kaqman yarpachakunëkipa rantin, kikikiman pensë, ¿imanö vistikurtaq mas alli sientikunki? Tsëta cuentaman churarqa manam alläpaqa yarpachakunkitsu wakinkuna imata niyaptimpis.
Kima kaq: Röpä allish kanampaqqa, ¿qaräman laqakashqa o cuerpüta rikätsikoqraqku kanan?
Jennifermi nin: “Hörantaqa laqakashqa, taksha y cuerpüta rikätsikoq röpakunataraqmi üsëta munä”.
Këman pensë: Bibliachömi kënö nin: “Janapa imanö rikakuyanqëkita väleqpaq churayëtsu, sinöqa shumaq kayanqëkiqa shonquykikuna imanö kanqanchö rikäkutsun” (1 Pëdru 3:3, 4). Këchö consejamanqantsikta cuentaman churar këman pensë: Imataq mas välin, ¿imanö vistikunqëkiku o imanö nuna kanqëkiku?
Juk consëju: Mas alli rikashqaqa kanki humildi y sencïllu karmi. Kanan witsankuna tsënö manana kayaptimpis këman pensë:
¿Imëllaqa parlarqunkiku gälakurnin kikinkunallapaq parlaqkunawan? Rasumpa kaqchöqa, tsënö nunakunawanqa manam ni pipis parlakurillatapis munantsu.
Kikinkunallapaq parlaqkunawanqa manam parlakuyta munantsiktsu, tsënöllam rikapäyänanta munarlla vistikoqkunapitapis pïmë witikurin.
Qarëkiman laqakashqa röpata o taksha röpakunata churakuptikiqa mana allitam qampaq pensayanqa. Tsënö churakurqa, wakinkunatam pensatsinki sobräda, allish tukoq y nikachëkachaq kanqëkita. Y manam tsëllatsu, rikapäyäshunëkita munar tsënö vistikunqëkitam pensariyanman. Hasta llutankunatam qampaq pensar qallëkuyanman.
Sencïllulla vistikurqa alli shonquyoq kanqëkitam rikätsikunki, y manam qampaq llutanta pensayanqatsu. Mönicam kënö nin: “Sencïllulla vistikuyqa manam chakwankunanö vistikuy ninantsu. Sencïllulla vistikurqa, kikikita y nuna mayikita respetanqëkitam rikätsikunki”.