JÖVINKUNA MUSYËTA MUNAYANQAN
¿Imanirtan Jehoväpa testïgunkunapa reunionninkunaman ëwanantsik?
Jehoväpa testïgunkunaqa, semänachö ishkë kutim juntakäyanqan wayiman ëwayan. ¿Imatatan tsëchö rurayan? Tsëman ëwanqëkiqa, ¿yanapashunkitsuraq?
¿Imatatan juntakäyanqan wayichö rurayan?
Juntakäyanqan wayichöqa, Teyta Diospitam Bibliawan yachatsikayämun. Tsë reunionkunachöqa këkunapitam yachakunki:
Teyta Diospitam alli yachakunki.
Imanir mana allikuna pasëkanqantam musyanki.
Mas alli nunakuna kanëkipaq yachakunki.
Alli amïgukunatam tarinki.
¿Musyarqëkiku? Jehoväpa testïgunkuna juntakäyanqan wayikunataqa, Diospa Gobiernumpita Yachatsikuyänan Wayi nirmi reqiyan. Tsënöqa reqiyan, Diospa Gobiernumpita tsëchö mas parlayaptinmi (Mateu 6:9, 10; 24:14; Lücas 4:43).
¿Imanirtan ëwankiman?
Tsëchö yachakunqëkiqa yanapashunkim. Jehoväpa testïgunkunapa reunionninkunachöqa Bibliapitam shumaq yachakunki, tsënöpam yachëyoq kanki (Proverbius 4:5). Tsëqa yanapashunki, imatapis akranqëkichö alli ruranëkipaqmi. Y manam tsëllatsu, kë tapukuykunapitapis yachakunkim:
Këkunapitam semäna ushë reunionkunachö yachatsikayämun:
¿Imanirtan Bibliachö yachakunqëkinö kawakunkiman?
Llakishqa kanqantsik höraqa, ¿pitaq yanaparamashwan?
¿Imatatan Diospa Gobiernunqa noqantsikpaq rurëkämun?
Brenda shipashmi nin: “Estudiaq mayï reunionman shamuptinqa, noqakunawanmi jamakurqan, y yachakuyanqä librutapis llapämi rikäyarqä. Pëtaqa alläpam gustarqan reunionchö shumaq parlakuyanqanta wiyanqan. Y manam tsëllatsu, yachakuyänäpaq imëkata utilizäyanqäta rikarmi iglesianchö tsënö mana kanqanta nirqan”.
¿Musyarqëkiku? Jehoväpa testïgunkunapa reunionninkunaman yëkuyqa grätisllam y manam qellëta mañakuyantsu.
Tsëchö reqinqëki nunakunaqa yanapayäshunkim. Reunionkunaman ëwanqantsikqa juknintsik juknintsik yanapanakunapaqmi yanapamantsik (Hebrëus 10:24, 25). Mana alli nunakunawanmi kawantsik, tsëmi Jehovä Diosta kuyaqkunawan y noqantsikpaq yarpachakoq nunakunawan juntu këqa yanapamantsik.
Elïsam nin: “Reunionkunaman ëwaqkunaqa, shumaq parlapäyämarmi llakishqa o yarpachakushqa këkaptï yanapayäman. Tsëmi wayïtapis mas kushishqana kutikü”.
¿Musyarqëkiku? Entëru Patsachöqa 120 milpitapis mas grüpu wawqi panikunam, 60 milpitapis mas Yachatsikuyänan Wayikunachö juntakäyan. Mas nunakuna Teyta Diospita yachakuyta munayaptinmi, waranqapitapis masta Diospa Gobiernumpita Yachatsikuyänan Wayita cada wata rurëkäyan.a
a Mëchö reunionkuna kanqanta musyëta munarqa, Internetchö “Jehoväpa testïgunkunapa reunionninkuna” neq päginaman yëkuri, y “Ëwanëkipaq kaqta ashiri” neqta lapiri.