JÖVINKUNA MUSYËTA MUNAYANQAN
¿Imanötan Biblia yanapaman? Juk: Alli yachatsikuykunata ashi
15 watayoq Briänam nin: “Bibliata leyitaqa munämi, peru tsëtsika letralla kaptinmi munänatsu”.
¿Tsënöku qampis ninki? Tsëqa këchö yachakunqëkim yanapashunki.
¿Imanirtan Bibliapitaqa yachakunkiman?
Itsapis këkunaman yarpëkanki Biblia mëtsika päginakunayoq, ichisaq letrakunayoq y ima dibüjunkunallapis mana kanqanman. Tsëmi höraqa leyita munankitsu, peru televisiontawan videukunata rikëqa gustashunkim.
¿Imataraq rurankiman atska öruta churakuyanqan babulta tarïkurqa? ¿Manaku tsë höra ras kicharita munankiman?
Bibliaqa unë qellëta churakuyanqan babulnömi. Tsëchömi tarinki Teyta Diospa mëtsika consëjunkunata, y këkunachömi yanapashunki:
Imatapis alli akrarnin ruranëkipaq.
Teytëkikunawan alli kawakunëkipaq.
Alli amïgukunata tarinëkipaq.
Mana alläpa llakikunëkipaq.
Bibliaqa unëna qellqashqa libru këkarpis, kanan witsampis yanapamënintsikta puëdinmi. Bibliachömi kënö nin: “Llapan qellqashqa këkaqmi Diospita shamun” (2 Timoteu 3:16). Tsëmi rikätsikun, Bibliachö consëjukunaqa Teyta Diospa yarpënin kanqanta.
Diospa Palabran Bibliachöqa imëka alli yachatsikuykunatam yachakuntsik.
Bibliata leyi gustashunëkipaqqa, ¿imanötan leyinkiman?
Qallanampita ushananyaq leyi. Këqa yanapashunki Diospa Palabran willakunqanta musyanëkipaqmi. Kënömi leyita puëdinki:
Genesispita Revelacionyaq (Apocalipsisyaq) qatinallaman.
Cada tiempuchö imapis pasanqanmannömi Bibliata leyita puëdinki.
Këmi yanapashunki: Patsachö kanqan witsan Jesus ruranqankuna ima tiempuchö kanqanta musyanëkipaqqa, Diospa Palabrampita yachakunapaq yanapakïkuna neq follëtupa 4 kaq yachatsikuyninta rikäri.
Mana allikunapa pasanqëki höra yanapashunëkipaq kaq willakuykunata leyi. Këkuna pasashuptiki:
¿Alli amïgukunayoq këta munankiku? Tsëqa, Davidpaqwan Jonatanpaq Bibliachö ima ninqanta leyi (1 Samuel 18-20 kaq capïtulunkuna). Tsëpitana, “¿Imataraq rurankiman alli amïguta tarinëkipaq?” neqchö qellqari. Tsëqa imata yachakunqëkita rikänëkipaqmi yanapashunki.
¿Imaraq yanapashunki jutsa rurëman mana ishkinëkipaq? Josë ruranqanmi yanapashunki, pëqa manam jutsaman ishkirqantsu (Genesis 39 kaq capïtulun). Tsëpitana, “¿Imatatan ruräman jutsaman mana ishkinäpaq?” Y “Mana kaqpita tumpayämaptin” neqchö qellqari, tsëqa jutsaman mana ishkinëkipaqmi yanapashunki.
¿Teyta Diosman mañakunqëkiqa yanapashunkiku? Nehemïasta pasanqanta leyinqëkim yanapashunki (Nehemïas 2 kaq capïtulun). Tsëpitana, “Jehovä Diosmi mañakuyninta wiyarqan” neqchö qellqari, tsëqa Teyta Diosman mas mañakunëkipaqmi yanapashunki.
Këmi yanapashunki: Bibliata leyirqa mana bülla kaqllachö leyi, tsëqa mas alli yachakunëkipaqmi yanapashunki.
Juk willakuyta o Salmus libruta leyi, y leyikanqëki imanö yanapashunqëkiman yarpachakuy. Leyir usharirna kënö tapukuy:
¿Imanirtan Jehovä Diosqa Palabranman këta qellqatsishqa?
¿Imatatan Teyta Jehoväpita yachatsiman?
Kë leyinqanqa, ¿imanötan yanapaman?
Këmi yanapashunki: Bibliata qallanampita ushananyaq leyinëkipaq churapakë. Bibliata imë leyir qallanëkipaq kaqta “Bibliata leyinapaq progräma” neqchö qellqë, tsëqa Internet päginäkunachömi këkan.