“Manam imapis michämanqatsu Diospita yachatsikunäta”

Alemaniapita panintsik Irmaqa 90 watayoqnam,y ishkë kutipa feyupa ishkinqampitam atska kuti operayashqa, tsëmi yachatsikoq yarquyta puëdintsu. Tsënö karpis, cartakunata qellqarmi familiankunata y reqinqankunata Diospita parlapan. Qellqanqan cartankunaqa mëtsikaqtam allipa yanapashqa. Tsë yanapanqan kaqkunaqa telëfunupa qayarirshi, “¿imëraq mas cartä apatsimunki?” niyan. Wakinnash agradecikuyänampaq qellqayan, y kënöshi niyan: “¿Manaku yapë cartä aparatsimunkiman?”. Tsëta niyaptinshi panintsik Irmaqa allipa kushikun, kënömi nin: “Qellqanqä cartakuna yanapakunqanta musyëqa, ¡Diospita yachatsikur sïguinäpaqmi valorta qoman!”.

Panintsik Irmaqa, awkinkunata y chakwankunata cuidayänan wayimampis cartata apatsinmi. Y tsëpaqmi kënö willakun: “Juk kutim, juk chakwampa nunan wanuskiptin shoqëta munarnin juk cartan qellqarir apatsipurqä. Tsëmi tsë chakwanqa telëfunupa qayaramarnï, apatsinqä carta allipa yanapanqanta nimarqan. Tsë cartantaqa Biblianchöshi churarätsikun tardikunapa leyikunampaq. Juk warminam nimarqan, qellqanqä cartaqa sacerdöti ninqampitapis mas yanapashqa kanqanta. Pëpa nunanqa tsëllaraqshi wanukushqa kanaq. Tsëmi mas yachakuyta munarnin, ‘¿wayikiman shamümanku maslla yachatsimänëkipaq?’ nimarqan”.

Jina unëna reqinakunqan yanasampaqpis panintsik Irmaqa kënömi willakun: “Tsë warmiqa juk sitiutana ëwakurmi cartan apatsinäpaq rogakamarqan. Y llapan apatsinqä cartakunatash shumaq churarätsikunaq. Tsëmi wanuriptin warmi wamran qayaramarnï, ‘mamänïman apatsimunqëki cartankunata tarïkurmi llapanta leyirqö’ nimarqan, y pëpaqpis cartan apatsinäpaqmi mañakamarqan”.

Panintsik Irmataqa, allipash gustan cartakunawan Diospita yachatsikuy. Tsëshi yachatsikur sïguinampaq Teytantsik Jehoväta mañakun. Y wayin wayin ëwëta mana puëdirpis, Diospita yachatsikuytaqa manash jaqita munantsu.