2020 wata “¡Kushishqa kashun!” neq jatun asamblëatam traduciyashqa

Kë wataqa, juliu y agostu killakunachömi 2020 kaq jatun asamblëata më tsë nacionchö Jehoväpa testïgunkuna grabashqata wiyayanqa, y tsërëkurmi 500 idiömapitapis masman traduciyashqa. Tsënöqa manaran ni imëpis rurayashqatsu kayashqa. Llapan asamblëata traducitaqa juk watachöran ushayanman karqan, peru coronavïrus qeshya yurishqa kaptin pipis wayimpita mana yarqunan kaptinmi chusku killapita mënusllachö ushayänan karqun.

Estädus Unïdus principal oficïnachö më tsë nacionkunapaq rantipakur yanapakoqkuna y Traduccionta Rikaqkunam allipa yanapakuyashqa. Traduccionta rikaqkunam cuentata qokuyarqan raslla traduciyänampaqqa alli micröfonukunata y jukkunataraq necesitäyänampaq kaqta. Tsëmi më tsë nacionkunapaq rantir yanapakoqkuna 1.000 micröfonukunata rantiyarqan y 200 sitiukunaman apatsiyarqan.

Mana alläpa gastayänampaqmi mayorpa rantiyarqan, y juk sitiullamanmi apatsiyarqan tsëllapitana më tsëman apatsiyänampaq. Tsëmi yanapakushqa apatsiyänampaq pagakuyanqanwanraq cada micröfonu 170 dölarlla cuestanampaq. Tsënö rurarmi alläpaqa gastayashqatsu.

Rantir yanapakoqkunaqa abril y mäyu killakunachömi tsë micröfonukunata rantiyarqan. Y coronavïrus qeshya kaptinmi më tsëman apatsiyänampaqqa sasaraq (ajaraq) karqan, peru tsënö kaptimpis, mayu killa ushëpaqqa cäsi më tsëmannam chärishqa karqan.

Rantir yanapakoqkunata dirigeq wawqi Jay Swinneymi kënö nin: “Tsë micröfunuta rantikoqkunaqa shumaqmi trabajayashqa Betelchö rantipakur trabajaqkunawan. Jehovä yanapayämaptinmi traduceq wawqikuna necesitäyanqankunata raslla y mana chaniyoqllachö tariyashqä”.

Traduccionta rikar yanapakoq wawqi Nicholas Ahladismi nin: “Traduceq wawqi panikunaqa mëtapis mana yarqushllapam trabajayashqa, y grabayänampaq necesitäyanqankunata chaskirirqa alläpam kushikuyarqan. Yanaqinkunawan juntu trabajëta mana puëdirpis, puëdiyashqam discursukunata, videukunata y cancionkunata 500 idiömakunapitapis masman traducir grabëta”.

Traducir yanapakoq wawqi panikunaqa tsëta y mastam rurayashqa 2020 wata “¡Kushishqa kashun!” neq asamblëata më tsëchö wawqi panikuna rikäyänampaq. Grabayänampaq necesitäyanqankunataqa rantiyarqö donate.jw.org neq päginapa o juknöpa churayämunqan qellëwanmi.