Juëvis 23 de octubri
Tsënöllam mañakü, firmi kayänëkipaq y creikuyanqëkichö alli patsakashqa kayänëkipaq (Efes. 3:17).
Cristiänukunaqa manam Bibliapita puntata yachakunqantsikkunallawanqa conformakunantsiktsu. Tsëpa rantinqa, mas sasa o aja yachatsikuyninkunata entiendinapaqmi kallpachakunantsik, tsëpaqqa santu espïritum yanapamäshun (1 Cor. 2:9, 10). ¿Imanirtan Jehoväta maslla reqinëkipaq Diospa Palabranta maslla yachakunkitsu? Imëkapitam yachakuyta puëdinki. Capazchi yachakunkiman unë sirweqninkunata kuyarnin Jehovä imakunata ruranqanta, y tsëmi yanapashunki qamtapis kuyashunqëkita entiendinëkipaq. Capazchi yachakunkiman israelïtakuna imanö adorayänampaq Jehovä patsätsinqanta y tsëtanam igualatsinkiman kanan witsanchö cristiänukuna adorayänampaq patsätsinqantawan. Y yachakunëkipaqqa utilicëta puëdinki Índice de las publicaciones Watch Tower neq librutawan Jehoväpa Testïgunkuna yachakur ashinapaq neq follëtutam. Tsë tëmakunapita yachakurqa, Diosnintsiktam maslla reqinki y pëmanmi maslla markäkunki o yärakunki (Prov. 2:4, 5). w23.10 pägk. 18, 19 pärrk. 3-5
Viernis 24 de octubri
Imapitapis masqa, jukniki juknikikuna alläpa kuyanakuyë. Kuyakoq nunaqa, wakinkunata perdonanampaqmi imëpis listu këkan (1 Pëd. 4:8).
Apostol Pëdrum “alläpa kuyanakuyë” nin. “Alläpa” ninqan palabrapaqqa griëgu idiömachöqa, “jatun y mashtakar kichakaq” ninanmi. Tsë versïculullachömi “perdonanampaqmi imëpis listu këkan” nin. Tsëwanmi entienditsimantsik kuyakuyqa mëtsika jutsakunata tsaparkoq jatun tëlanö kanqanta. Imanömi imatapis mana rikäkunampaq jatun tëlawan tsaparkuntsik, tsënömi wawqi panintsikkunatapis mëtsika kuti ofendimashqa o pantayaptimpis perdonëkunantsik. Wakinkunata rasumpa kuyanqantsikqa yanapamäshun alläpa fuerti ofendimashqapis perdonëkunapaqmi (Col 3:13). Wakinkunata perdonarqa, rasumpa kuyakoq kanqantsikta y Diosnintsikta kushitsita munanqantsiktam rikätsikushun. w23.11 pägk. 10, 11 pärrk. 13-15
Säbadu 25 de octubri
Safanqa gobernantita[m] [...] leyiparqan (2 Crön. 34:18).
Gobernanti Josïasqa veintiseis watayoq këkarmi templuta altsayänampaq mandakurqan. Tsë templuta altsëkarmi, “Jehoväpa Leynin qellqaraq libruta sacerdöti Hilquïas tarirqan. Tsëtaqa Moisesmi qellqashqa karqan”. Tsë libruta leyipäriyaptinmi, gobernanti Josïasqa Jehovä ninqanta cäsukunampaq cambiukunata rurarqan (2 Crön. 34:14, 19-21). ¿Qamtaqa cada junaq Bibliata leyi gustashunkimantsuraq? ¿Leyikankinaku? Peru ¿gustashunkiku? Josïasqa 39 watayoq këkarmi mana allita decidirqan, tsënöpam wanurqan. Pëqa yanapanampaq Jehoväta mañakunampa rantinmi, kikinman confiakurqan (2 Crön. 35:20-25). ¿Imatataq tsëpita yachakuntsik? Ëka watayoq kar o atska tiempupana Bibliata estudiarpis Jehovämanmi mañakunantsik yanapamänantsikpaq, Palabran Bibliatam estudianantsik y atska watapana Jehoväta sirweq wawqi panikuna consejamanqantsiktam cäsukunantsik. Tsëta rurarqa, manam alläpaqa pantashuntsu y imëpis kushishqam kawakushun (Sant. 1:25). w23.09 päg. 12 pärrk. 15, 16