Dios änikunqan wamra

Nazaret-ta kutikuyänampa rantinmi, Josëwan Marïaqa Belen markachö quedakuyarqan. Diospa Leynin mandakunqannömi puwaq junaqyoq këkaptin Jesusta penqëninchö señalatsiyarqan (Levïticu 12:2, 3). Costumbrinkunachöqa tsë junaqmi wamrapa jutin churayaq. Tsëmi pëkunaqa angel nishqannö Jesus nir jutin churayarqan.

Tsëpitaqa juk killa masnam pasarirqan, y Jesusqa 40 junaqtanam cumplirishqa karqan. Tsëmi Jesustaqa Jerusalen templuman teytankuna apayarqan. Porqui Diospa leyninqa neq juk ollqu wamra yurinqampita 40 junaq pasariptin, Diospa rikëninchö limpiu kayänampaq mama kaq juk ofrendata apanampaqmi (Levïticu 12:4-8).

Y tsëtam Marïaqa rurarqan, ishkë pishqutam ofrendapaq aparqan. Tsëllata apanqanqa Josëwan Marïa waktsa kayanqantam rikätsikurqan. Diospa Leyninqa neq, juk malta üshata y juk pishquta ofrendapaq mama kaq apanampaq kaqtam. Peru malta üshata rantinampaq qellënin mana kaptinqa, ishkë kullkuta o ishkë palumatam apëta puëdeq. Tsëmi Marïaqa waktsa karnin ishkë pishquta aparqan.

Templuchö këkäyaptinnam, Simeon jutiyoq edäna nuna Josëman y Marïaman witirirqan. Cristuta o Mesïasta manaraq wanukurnin rikänampaq kaqtam Jehovä revelashqa karqan. Tsë junaqqa santu espïritu pushashqa kaptinmi templuta ëwashqa karqan. Josëta y Marïata llulluntawan rikärirqa, llullutam mellqarkurqan.

Tsë höram Simeonqa Diosta agradecikur kënö nirqan: “Kananqa Llapanta Gobernaq Señor, ninqëkïmannöllam sirwishoqniki yamë ëwakunanta jaqikanki, porqui nawïkunaqa rikärishqanam piwan salvacionta apamunëkipaq kaqta, llapan marka nunakuna rikäyänampaq alistanqëkita, pëqa jinantin nacion nunakunapa nawinta tsaparaq ratashta jorqaq aktsim, y Israel markëkipaq chipapaq aktsim” (Lücas 2:29-32).

Josëwan Marïaqa espantakuyarqanmi tsënö ninqanta wiyarnin. Simeonqa kimantam bendicirqan y tsë wamrapaq parlarmi Marïata nirqan ‘përëkur Israelpita mëtsikaq ishkiyänampaq y sharkuyänampaq’ kaqta, jina alläpa llakikï juk espädanö shonqunchö pëta tuksinampaq kaqtapis nirqanmi (Lücas 2:34).

Jina tsë junaqqa, 84 watayoqna Diospa willakoqnin Änapis templuchömi këkarqan. Pëqa manam imëpis templuman faltaqtsu. Josëman y llullunwan këkaq Marïamanmi witirirqan. Diostam pëqa alläpa agradecikurqan y tsëchö llapan këkaqkunatam Jesuspita parlapar qallëkurqan.

¡Imanö kushishqaraq Josëwan Marïa këkäyarqan templuchö imëka pasakunqanta rikarnin! Tsë llapanmi rikätsikurqan llullunkunaqa Dios änikushqan gobernakoq kanqanta.