Perdonakoq këqa alläpam precisan

Pëdruqa creikoq mayinwan ima problëmallapis kaptin, altsanampaq Jesus consejakunqanta wiyashqanam karqan. Peru kë kutichöqa, ëka kuti perdonakunampaq kaqtam musyëta munarqan.

Tsëmi Jesusta kënö tapurqan: “Teytë, ¿ëka kutitaq noqapa conträ jutsallakuptin creikoq mayïta perdonäman? ¿Qanchis kutiku?”. Wakin pushakoq religiösukunaqa kima kutilla perdonakoq kayänampaqmi yachatsikuyarqan. Tsëchi Pëdruqa “qanchis kutiku” nirqa, alli nuna kanqanta pensëkarqan (Mateu 18:21).

Pipis ofendimashqa ëka kutilla perdonanapaq kaqtatsu manam Jesusqa yachatsikïkarqan. Tsëmi Pëdruta kënö nirqan: “Manam qanchis kutilla perdonanëkipaqtsu neq, sinöqa qanchis chunka qanchis (77) kutikuna perdonanëkipaqmi” (Mateu 18:22). Juk parlakïchöqa, Pëdruqa creikoq mayinta perdonëkänanllam karqan.

Tsëpitanam, wakinkunata perdonë alläpa precisaq kanqanta rikätsinampaq Pëdruta y wakin qateqninkunata juk pasakunqampita willarqan. Juk sirwipakoqmi ankupäkoq patronnin ruranqanta rurarqantsu. Juk junaqmi, tsë patronqa llapan sirweqninkuna jaqankunata pagakuyänampaq mañakurqan. Tsëmi 60 millon denariu qellë jaqayoq kaqta pë kaqman apayäpurqan. Tsë sirwipakoq jaqanta pagakïta mana puëdiptinmi pëta, warminta y wamrankunata rantikïkuyänampaq mandakurqan, tsënöpa jaqanta pagakunampaq. Tsëta wiyëkurnam, sirwipakoqqa patronnimpa puntaman qonqurikïkur kënö nirqan: “Shuyëkallämë, y llapantam paguëkullashqëki” (Mateu 18:26).

Tsënam reyqa ankuparnin tsëtsika jaqanta perdonëkurqan. Rey këkaqpita yarqurirnam tsë sirwipakoqqa juk sirwipakoq mayinwan toparirqan, pëqa 100 denariu jaqan karqan. Tsënam kunkampita tsarirkur qapur qallëkurqan, y kënömi nirqan: “Llapan jaqä kanqëkita kutitsimë”. Tsë höram tsë sirwipakoq mayinqa, puntanman qonqurikïkur kënö nirqan: “Shuyëkallämë, y paguëkullashqëkim” (Mateu 18:28, 29). Peru rey jaqanta perdonanqan sirwipakoqqa manam tsënötsu rurarqan. Tsëpa rantinqa, mas wallkalla jaqan këkaptimpis carcelmanmi sirwipakoq mayintam llawiratsirqan llapanta pagakunqanyaq.

Tsë sirwipakoq mana ankupäkoq kanqanta rikashqa kaq wakin sirwipakoqkunam, reyta willaq ëwayarqan. Tsëmi reyqa alläpa piñakurnin, tsë mana ankupäkoq sirwipakoqta pë kaqman apayänampaq mandakurqan, y chäratsiyaptinnam kënö nirqan: “Alläpa mana alli sirwipakoq, noqaqa llapan jaqä kanqëkitam rogamaptiki perdonëkurqaq. ¿Manaku qampis noqa ankupanqaqnölla sirwipakoq mayikita ankupankiman karqan?”. Tsëmi reyqa alläpa piñarnin carcel täpaqkunapa makinman entreguëkurqan y llapan jaqanta pagakunqanyaq carcelarätsirqan. Jesusqa kënö nirmi tsë willakïta usharirqan: “Tsënöllam qamkunatapis ciëluchö këkaq Teytä rurayäshunki creikoq mayikikunata shonqupita patsë mana perdonayaptikiqa” (Mateu 18:32-35).

¡Kë willakïqa alläpam yachatsimantsik! Jutsantsikkunata Dios perdonamashqaqa, imëka jatun jaqantsikta pagakïkoq cuentam. Jinamampis, cristiänu mayintsik imanöllapis ofendiramanqantsikqa mana kaq cuentallam Jehoväpa rikëninchö jutsata ruranqantsikwanqa. Y Jehoväqa manam juk kutillatsu perdonamantsik, sinöqa mëtsika kutim. Tsëmi cristiänu mayintsik ofendimashqapis, perdonëkunapaq listu këkänantsik. Jesus yachatsikunqantam ruranantsik, noqantsikpa contrantsik jutsallakoqkunata perdonanqantsiknöllam, Diosqa jutsantsikkunata perdonamäshun (Mateu 6:12).