Imëkayoq këpaq yarparäkï mana alli kanqanta rikätsikun

Fariseupa wayinchö Jesus mikunqanyaqmi, mëtsika waranqa nunakuna Jesusta waqtachö shuyarëkäyarqan. Galilëachöpis tsënöllam pasakurqan (Marcus 1:33; 2:2; 3:9). Judëachöqa mëtsikaqmi rikëta y wiyëta munayarqan. Pëwan mikïkäyanqan fariseukunapitaqa, alläpa jukläyam kayarqan.

Puntataqa qateqninkunatam kënö nirqan: “Cuidakuyë fariseukunapa levadürampita, tsëqa ishkë qaqlla këmi”. Puntatanam Jesusqa tsënö nishqa karqan, peru mikïkanqanchö ima pasanqanta rikarmi alläpa precisarqan qateqninkunata yapë tsënö consejananqa (Lücas 12:1; Marcus 8:15). Fariseukunaqa Diosta adoraq tukurmi mana alli rurëninkunapita tsapäkïta tïrayarqan. Tsëmi Jesusqa kënö entienditsikurqan: “Manam ni ima yachëllapa tsapashqapis mana rikakaqqa kantsu, ni ima pakarëkaqpis mana musyakaqqa kantsu” (Lücas 12:2).

Itsachi wakin wiyakïkaqkunaqa Galilëachö Jesus yachatsikunqan witsan tsëchötsu kayarqan. Tsëmi, tsëpin yachatsikunqankunapita mas precisaq kaqkunata yapë yachatsikurqan. Kënömi nirqan: “Ama mantsayëtsu cuerputa wanuratsirnin ni ima masta rurëta mana puëdeqkunataqa” (Lücas 12:4). Puntatanöllam, Jehovä cuidanampaq kaqman chipyëpa markäkuyänampaq qateqninkunata nirqan. Jina nunapa Tsurinman qaqäyänan y pëkunata Dios yanapanampaq kaqman chipyëpa markäkuyänan alläpa precisanqantam nirqan (Mateu 10:19, 20, 26-33; 12:31, 32).

Tsënam mëtsika nunakunapa chowpimpita juk nuna kënö nirqan: “Maestru, wawqïta nïkullë herenciata rakinakuyänäpaq” (Lücas 12:13). Leyqa mandakoq, herenciata mayor kaq tsuri ishkë partita chaskinampaq kaqtam, tsëmi tsë nuna y wawqinqa tsë asunturëkur discutiyänantsu karqan (Deuteronomiu 21:17). Peru tsë nunaqa mastatsunchi chaskita munëkarqan. Alläpa yachaq karmi Jesusqa tsë asuntuman mëtikurqantsu, tsëmi kënö nirqan: “Äh nuna, ¿pitaq ishkëkipa jueznikikuna o herencia rakeqnikikuna kanäpaq churamashqa?” (Lücas 12:14).

Tsëpitanam llapankunata kënö atikarqan: “Nawikikunata kichëllata katsiyë y cuidakuyë imëkatapis ërayëpa munëpita, porqui pipapis imëkan kapuptimpis, kawëninqa manam imëkan kapunqampitatsu” (Lücas 12:15). Rasumpa kaqchöqa, ¿manaku imëkayoq karpis wanurqa llapanta jaqirintsik? Tsëpitanam, kananyaqpis mëtsikaq reqiyanqan willakïta willakurqan, y tsëqa rikätsikun Diospa rikëninchö alli nuna kë alläpa precisanqantam.

Kënömi nirqan: “Juk kapoqyoq nunapam chakranchö alläpa cosëchan kapurqan. Tsëmi tsë nunaqa shonqunllachö kënö yarpachakurqan: ‘¿Imataraq rurashaq cosëchäkunata mëmampis ëllunäpaq mana këkäpamaptinqa?’. Tsëmi kënö nirqan: ‘Këtam rurashaq: gränukunata churakunä wayïkunatam juchurishaq y mas jatusaqkunatanam sharkatsishaq, y tsëmanmi llapan gränükunata y imëkäkunata ëllushaq, y kikïtam kënö nikushaq: “Qampaqa mëtsika watakunapaqmi imëka alli cösaskuna ëllushqa kapushunki; yamë kawakï, mikï, upyë, y kushishqa kë”’. Peru Diosqa kënömi nirqan: ‘Äh upa nuna, kanan paqasmi kawënikita mañayäshunki. Tsëqa, ¿piraq katsinqa llapan churakunqëki cösaskunata?’. Tsënömi pasan kikinllapaq imëkata ëllurpis, Diospa rikëninchöqa mana kapoqyoq nunawan” (Lücas 12:16-21).

Itsachi Jesuspa qateqninkuna y wakin wiyakïkaqkunaqa imëkayoq këta ashiman raslla ishkiriyanman karqan. Jina Jehoväta sirwiyänantam kawëninkunachö imëkapaq yarpachakïkunaqa pantaratsinman y michanman karqan. Tsëmi Jesusqa juk wata pullantanöna Jirkapita Yachatsikunqanchö ninqanta pëkunata yapë kënö yarpätsirqan:

“Amana kawënikikunarëkur imata mikuyänëkipaq kaqman, o cuerpïkikunarëkur imata vistikuyänëkipaq kaqman yarpachakuyënatsu. [...] Pensariyë cuervukunaman: pëkunaqa manam murukuyantsu ni segayantsu; pëkunapaqa manam imëka mikïkunata ni gränukunata churakuyänan wayinkuna kantsu; tsënö kaptimpis, Diosqa pacha juntatam katsin. ¿Manaku qamkunaqa pishqukunapitapis mas väleq kayanki? [...] Pensariyë liriu wëtakuna imanö winayanqanman: pëkunaqa manam afanakuyantsu ni putskakuyantsu; peru noqam niyaq, manam ni Salomonpis imëkayoq këkar pëkunanö alläpa shumaqqa vistikurqantsu. [...] Tsëmi, amana imata mikuyänëkipaq kaqta o imata upuyänëkipaq kaqta ashir puriyënatsu, y amana yarpachakur y llakikur kayënatsu; porqui mana cäsukoq juk nacion nunakunam tsëkunataqa ërayar ashiyan, peru Teytëkikunaqa musyanmi tsëkunata wanayanqëkita. Tsëpa rantinqa, pëpa Gobiernunta ashir sïguiyë, y tsë cösaskunataqa pëmi qoyäshunki” (Lücas 12:22-31; Mateu 6:25-33).

¿Pikunataq Diospa Gobiernunta ashiyanqa? Jesusqa “wallkalla üshakuna” ashiyänampaq kaqtam nirqan, juk parlakïchöqa, 144.000 nunakunallam kayänan karqan. ¿Imatataq pëkunapaq Dios alistashqa? Jesusmi kënö nirqan: “Teytëkikunaqa Gobiernuta qoyäshunëkipaqmi churapukashqa”. Tsëmi pëkunaqa Patsachö fortünakunata ëllïmanqa yarparäyänantsu karqan. Tsëpa rantinqa, ‘mana ushakaq fortünakunatam’ ciëluman churakuyänan karqan, porqui tsëpita patsëmi Cristuwan gobernayanqa (Lücas 12:32-34).