¿Pëkunanöku qampis pensanki? Itsachi Bibliata leyita munanki, peru imallapis qelanäratsishunki. Mëtsikaqtam tsënö pasan. Bibliatam leyita munayan, peru gänasninkunam kantsu. Peru mas kushishqa y alli kawakunëkipaq yanapakunqanta musyarqa, ¿tsënötsuraq pensankiman? Y leyi gustashunëkipaq yanapakïkuna kaptinqa, ¿musyëta munankimantsuraq imakunachö yanapakunqanta?

Wakinqa, Bibliata leyiyanqampita patsëmi cuentata qokuyashqa alläpa yanapakunqanta. Rikärishun imata niyanqanta.

Ishkë chunka (20) wata masyoqlla Ezekielmi kënö nin: “Mëta ëwëkanqanta mana musyaq nunanömi unëqa sientikoq kä, peru Bibliata leyinqäqa jukläyana kawakunäpaqmi yanapamashqa. Kawënintsikchö rasumpa yanapakoq consëjukunatam tsëchöqa tarintsik”.

Y ishkë chunka (20) wata masyoq Friëdanam kënö nin: “Rasllam piñakureq kä, peru Bibliata leyinqäpita patsëmi geniüta tsarëta puëdina. Imanö kënïchö alliyashqa karmi kananqa mas amïgukunayoq kä”.

Y pitsqa chunka (50) wata masyoq Eunïci jutiyoq warminam kënö nin: “Mana yanapakoq rurëkunata jaqinäpaq, y mas alli warmi kanäpaqmi yanapëkäman”.

Kë nunakunata y millonyëpayan nunakunatam Bibliaqa yanapashqa kushishqa kawakuyänampaq, y tsënöllam qamtapis yanapashunki (Isaïas 48:17, 18). Këkunachö y maskunachömi yanapashunki: alli kaqta decidinëkipaq, alli amïgukunata tarinëkipaq, llakikïpita o yarpachakïpita cuerpïki ishkikaptin o peqëki nanaptin yamë këta tarinëkipaq, y mas precisaq kaqqa, Diospita rasumpa kaqta yachakunëkipaqmi. Bibliachö këkaq consëjukunaqa Diospitam shamun, tsëmi wiyakunqantsikqa imëpis allipaq kanqa.

Leyita qallananllam. Qateqnin kaq yachatsikïkunachömi Bibliata leyirnin qallanëkipaq yanapakïkuna kan.

Bibliata leyi gustashunëkipaq y alli yanapashunëkipaqqa, ¿imatataq ruranëki? Mëtsikaq nunakunata yanapanqan pitsqa consëjukunapita yachakuri.

Juk alli sitiuta ashi. Bülla mana kanqan sitiutam ashinëki. Imapis mana pantatsishuptiki, alleq atsikyaraptin y mana alläpa achachaptin o alalaptinqa, gustum leyikunki.

Yachakïta munar leyi. Bibliaqa Teyta Diosnintsikpa qarëninmi. Leyinqantsik yanapamänapaqqa, teytampita yachakïta munaq wamranömi kanantsik. Bibliata mana allipa rikarqa, tsëtam juk kuchuman churarinëki y Diosnintsik yachatsishunëkitam jaqinëki (Salmus 25:4).

Mañakurir-raq leyir qallë. Diosnintsik imata pensanqankunatam Bibliaqa willamantsik, tsëmi entiendinapaqqa pë yanapamänantsikta wanantsik. Y mañakushqaqa santu espïritunta qomänapaqmi änimantsik (Lücas 11:13). Tsë espïritum yanapashunki Kamakoq Yayantsik imanö pensanqanta entiendinëkipaq. Y yachakurnin sïguirqa, “hasta Diospa pakarëkaq yachënintapis” entiendirinkim (1 Corintius 2:10).

Entiendita tïrar leyi. Ama leyinanllaqa leyitsu. Leyinqëki höra imata yachakunqëkiman pensë. Kënö tapukï: “Kë nunaqa, ¿imanö nuna kanqantataq rikätsikurqan? ¿Imanötaq yachakunqäta kawënïchö rikätsiküman?”.

Imarëkur leyinqëkiman pensë. Bibliata leyi gustashunëkipaqqa, kawënikichö yanapashunëkipaq kaqtam yachakïta procuranëki. Itsa churapakankiman Diosta mas reqinëkipaq, mas alli nuna kanëkipaq, majëkiwan mas alli kawakunëkipaq, o ima maschöpis alliyänëkipaq. Tsëpitana, tsëkunachö yanapashunëkipaq kaqta Bibliachö ashï.a

Kë pitsqa consëjukunam yanapashunki Bibliata leyir qallanëkipaq, peru ¿imataraq rurankiman leyi masraq gustashunëkipaq? Qateqnin kaq yachatsikïchömi mas yanapakïta tarinki.

Bibliata leyi gustashunqëki o mana gustashunqëkiqa imanö leyinqëkipitam kanqa. Rikärishun leyi mas gustashunëkipaq imakuna yanapashunëkipaq kaqta.

Entiendipaq y markäkïpaq Bibliata akrë. Mana entiendipaqnö y manana parlayanqan palabrakunata tarirqa, leyitapis mananam munankinatsu. Tsëmi fäcil-lla entiendina kaq Bibliata ashinëki. Jinamampis, tsë akranqëki Bibliaqa unë qellqashqakuna ninqanllatam cläru rikätsikunan.a

Tsëllaraq yarqamoq yanapakïkunata utilicë. Kanan witsanqa manam papel-llachötsu Bibliaqa yarqamun, sinöqa Internetchöpis kanmi. Tsëpitam jorqëta puëdinki computadörëkiman, tabletnikiman o celularnikiman, y kikin Internetchöpis leyita puëdinkim. Tsëkunachö leyinapaq kaq wakin Bibliakunaqa, juk textukunawan o juk Bibliakunawan igualatsinëkipaq yanapakïkunayoqmi yarqamun. Peru leyita mana puëdiptikiqa, wiyanëkipaqpis kanmi. Y mëtsikaq nunakunam cärruchö ëwëkar, taqshakïkar o imatapis rurëkarnin, tsë grabacionkunata wiyakuyan. Tsëqa, ¿imanö yachakïtaq gustashunkiman? ¿Imanirtaq mëqanllatapis probarinkitsu?

Mas yachatsikïkunata ashi. Biblia yachatsikunqampita parlaq librukunapis yanapashunkim leyinqëkita mas entiendinëkipaq. Wakinchöqa mäpakunam kan, tsëmi yanapakun Biblia willakunqan sitiukunata reqinapaq y wakin willakïkuna imanö pasakunqanman pensanapaq. Jinamampis, kë revistachö yarqamoq wakin yachatsikïkuna, y jw.org nishqan Internet päginachö yachatsikïkunam, Biblia willakunqankunata mas alli entiendinëkipaq yanapashunki.

Juknöpapis leyi. Qallanampita ushananyaq Bibliata leyinëkipaq gänasniki mana kaptinqa, gustashunqëki kaqpita leyir qallë. Diosta sirweq nunakunapaq Biblia willakunqampita masta musyëta munarqa, pëkunapaq parlaq kaqtam llapanta leyinkiman. Jina musyëta munanqëki kaq yachatsikïkunata o qatinallaman pasakunqankunata willakoq kaq librukunatapis leyinkimanmi. Y Biblia willakunqan nunakunapita masta musyëta munarqa, recuadruchö yureq “Biblia parlanqan nunakunapita mas yachakunëkipaq” neq yachatsikïta rikäri. ¿Imanirtaq tsënö leyita probarinkitsu?

Bibliaqa manam lluta librutsu. Tsëchöqa Kamakoq Teytantsikpa consëjunkunatam tarintsik (2 Timoteu 3:16). Willakïninkunaqa alläpam yanapashïnikita puëdin. Kikin Bibliachömi kënö nin: “Diospa palabranqa kawaqmi, y alläpa poderyoqmi” (Hebrëus 4:12). Awmi, Bibliaqa ishkënöpam mas alli kawakunëkipaq yanapashïnikita puëdin: kawënikichö imëka asuntupaq consejashurniki y Diosta alleq reqinëkipaq y änikunqankunata musyanëkipaq yanapashurniki (1 Timoteu 4:8; Santiägu 4:8).

Alli kawakunëkipaqmi yanapashunki. Bibliachöqa kikikipa kawënikipaq y tukï asuntukunapaq consëjukunam kan.

• Nuna mayikiwan alli kawakunëkipaq (Efesius 4:31, 32; 5:22, 25, 28, 33).

• Salornikipaq y shonqïkichö alli sientikunëkipaq (Salmus 37:8; Proverbius 17:22).

• Alli portakunëkipaq (1 Corintius 6:9, 10).

• Qellë asuntukunapaq (Proverbius 10:4; 28:19; Efesius 4:28).a

Asia nishqan continentipa juk nacionninchö täraq Vicentwan warmin Annaloumi, cuentata qokuyarqan Bibliachö këkaq consëjukunaqa alläpa yanapakunqanta. Pëkunaqa jövinllaraqmi kayan, y tsëllaraq casakushqa kayaptinmi, pëkunapaqpis alli entiendinakuyänan y shumaq parlapänakuyänanqa sasaraq (ajaraq) karqan. Peru Bibliachö këkaq consëjukunatam cäsukur qallëkuyarqan. ¿Imachötaq yanaparqan? Ollqu kaqmi kënö willakun: “Bibliachö leyinqämi yanapamashqa ima problëma kaptimpis shumaqlla altsayänäpaq. Bibliachö këkaq consëjukunata cäsukurmi kushishqa kawakuyä”. Y warminnam kënö willakun: “Bibliachö këkaq willakïkunam alläpa yanapayämashqa. Kananqa kushishqanam kawakü, y imata logrëta munayanqächö igual pensarmi alli sientikü”.

Diosta mas reqinëkipaqmi yanapashunki. Jina Vicentqa kënömi nin: “Bibliata leyinqämi yanapamashqa Jehovä Diosman imëpitapis mas confiakunäpaq”. Tsënö ninqanmi rikätsikun Bibliaqa Diosta mas reqinëkipaq yanapashïnikita puëdinqanta. Bibliaqa manam consëjunkunallawantsu yanapashunki, sinöqa Diospa amïgun kanëkipaqpis yanapashunkim. Jinamampis, shamoq tiempuchö imëyaqpis alli y shumaq kawakunapaq kaqtam yachakunki (1 Timoteu 6:19). Tsëkunataqa manam ni ima librupis yachatsikuntsu.

Bibliata leyir qallëkur y imëpis leyirqa, qampis mas allim kawakunki y Diostam mas alleq reqinki. Peru itsa wakin wakintaqa entiendinkitsu. Tsënö pasashuptikiqa, unë witsan Etiopïa nacionchö gobiernupaq trabajaq nunapita yachakï. Pëpis manam Diospa Palabranta alleqllaqa entiendirqantsu. Tsëmi juk kuti Jesusman creikoq Felïpi, “¿käyinkiku llapan leyikanqëkita?” nir tapuriptin, kënö nirqan: “Rasumpa kaqchöqa, ¿imanöraq käyïman pipis mana käyitsimaptinqa?”.b Tsënam, alli yachatsikoq Felïpi yanapananta jaqirqan (Hëchus 8:30, 31, 34). Qampis Bibliata mas alleq entiendita munarqa, Internetchö jw.org päginachö këkaq formulariuman qellqar o kë revistachö këkaq direccionman cartakur watukayäshunëkipaq mañakuri. Jina markëkichö Jehoväpa testïgunkunawan parlari o Yachatsikuyänan Wayiman ëwari. Tsëqa ¿imataq yanapashunki mas alli kawakunëkipaq? Bibliam, tsëmi leyita procuranëki.