Juk judïa warmi willakun kananqa Jesusman imanir creinqanta

Qampita masllata willarayämë.

1979 watam Estädus Unïduschö yurikurqä. Kima watayoq këkaptïmi papänïkunaqa divorcianakuyarqan. Mamänïqa judïukunapa costumbrinkuna ninqannömi wätamarqan, y yeshivä niyanqan judïukuna estudiayanqan escuëlakunachömi estudiarqä. Qanchis watayoq këkaptïmi Israel nacionta ëwakuyarqä. Estudianqä escuëlaqa murukoq nunakuna kawayanqan kinrëchömi karqan, y tsë kinrëtam kibutz nir reqiyaq. Juk wata pasariptinnam Mëxicu nacionta ëwakuyarqä.

Wayïpa amänunchö Diosta adorayänan wayi mana kaptimpis, manam costumbrïkunataqa dejarqätsu: säbadu junaqqa vëlakunatam prendeq kä, Torä niyanqan judïukunapaq sagrädu librutam leyeq kä, y sidur niyanqan mañakuyänan libruchö ninqantam mañakoq kä. Estudiaq mayïkunataqa religionnï rasumpa kaq kanqantam imëpis neq kä. Mana allikunata yachakunäta mantsarmi, mamänïqa Mushoq Testamentuta mana leyinäpaq nimashqa karqan, tsëmi noqaqa imëpis leyishqätsu karqä. Tsëchöqa Jesus ruranqampita y yachatsikunqampitam willakun.

¿Imanirtan Mushoq Testamentuta leyinëkipaq decidirqëki?

Diecisiëti watata cumplirirmi, estudiëkanqäta ushanäpaq Estädus Unïdusta kutirqä. Tsëchömi juk amïgu cristiänu kanqanta nimarqan, y Jesusta mana reqirqa mana kushishqa kanäpaq kaqtam nimarqan.

—Noqanam, “Jesusman creeqkunaqa manam rasumpa kaqta musyayantsu” nir contestarqä.

—Pënam, “¿imëllapis Mushoq Testamentuta leyirqunkiku?” nir tapumarqan

—Noqanam, “manam” nirqä.

—Tsënam nimarqan, “tsëqa ¿imanirtan tsënö ninki? Mana musyëkar imatapis parlëqa manam allitsu, tsëtaqa upakunallam rurayan”.

Tsë asuntuchöqa noqapis pënömi pensarqä, tsëmi nimanqanqa yarpakachätsimarqan. Penqakurmi qaramanqan Bibliata chaskirqä, y wayïpa ëwëkurmi Mushoq Testamentuta leyirqä.

¿Ima ninkitan tsëchö leyinqëkipaq?

Puntataqa, Mushoq Testamentuta judïukuna qellqayanqanta musyarmi alläpa espantakurqä. Mas leyinqämannönam yachakurqä, Jesus kuyakoq y humildi kanqanta y nunakunapita provechakunampa rantin yanapëta munanqanta. Bibliotëcaman ëwarmi Jesuspita parlaq mas librukunata mañayämänampaq nirqä, peru Jesus Dios Akranqan Nuna kanqanta creinäpaqqa manam mëqampis yanapamarqantsu. Wakinqa Dios kanqantam niyaq, peru tsëtaqa manam creeqtsu kä. Kënömi pensaq kä: “¿Pitataq Jesus mañakoq? ¿Kikinllataku?”. Manam tsëllatsu, Jesusqa wanurqanmi, peru Diospaqqa “manam imëpis ushakankitsu”a ninmi Bibliachö.

¿Tsëqa imatataq rurarqëki?

Rasumpa kaqqa manam contranakuntsu, y noqaqa rasumpa kaqta musyanäpaqmi decidïda këkarqä. Tsëmi waqarnin llapan shonqüwan Diosman mañakurqä, y tsë kutiqa manam sidur librü ninqantatsu mañakurqä. Mañakur ushariptïmi, ishkë Jehoväpa testïgunkuna punkuta takakayämurqan. Pëkunawanmi parlayarqä y juk follëtunkunatam qarayämarqan. Tsë follëtuta leyir y pëkunawan mas parlarmi cuentata qokurqä, Bibliachö ninqanta yachatsikuyanqanta. Testïgukunapaqqa manam Jesusqa Trinidä niyanqantsu, sinöqa “Diospa Tsurin[mi]”b y “Teyta Dios puntata kamanqanmi”.c

Tsëpita ichik tiempullatam Mëxicu nacionta kutikurqä, y Dios Akranqan Nunapaq Bibliachö willakunqantam Testïgukunawan yachakur sïguirqä. ¡Diospa Akranqan Nunapaqqa imëkatam willakun! Tsënö kaptimpis, kënömi tapukoq kä: “¿Jesusllachöku Dios Akranqan Nunapaq willakunqan cumplikarqan? ¿O nunakunata engañananllapaqku Dios Akranqan Nuna kanqanta nirqan?”.

¿Y imatan yanapashurqëki tsëpita següru kanëkipaq?

Testïgukunam rikätsiyämarqan Jesus Dios Akranqan Nuna tukurqa, Bibliachö willakunqanta cumplita mana puëdinampaq kaqta. Jesus yurinampaq setecientus wata pishikaptinmi, Miquëas willakurqan Dios Akranqan Nunaqa Belenchö yurinampaq kaqta.d ¿Y pitan mëchö yurinampaq kaqta akrëta puëdin? Isaïasnam willakurqan Dios Akranqan Nunataqa mana allita ruraqkunatanö wanutsiyänampaq kaqta, peru tsënö kaptimpis, rïcukunatawan juntu pampayänampaq kaqta.e Tsë llapan willakuyanqanmi Jesuschö cumplikarqan.

Peru tsëpitapis masqa yanapamarqan, Jesus ima kastapita kanqanta musyanqämi. Bibliachöqa willakurqan Dios Akranqan Nunaqa gobernaq Davidpa kastan kanampaq kaqtam.f Judïukunaqa allim apuntayaq pï nunapis pipa kastan kanqanta, tsëmi Jesus Davidpa kastan mana kashqa kaptinqa, chikeqninkuna pïmëta niyanman karqan. Peru Jesus Davidpa kastan kaptinmi imatapis niyarqantsu. Mëtsikaq nunakunapis, ‘Davidpa Tsurin’ kanqantam niyarqan.g

70 watanam, Jesus wanunqampita treinta y siëti wata pasanqanchöna, Röma soldädukuna Jerusalenta ushakätsiyarqan. Tsëchömi judïukuna rurayanqan documentukuna oqrakäyarqan o ushakäyarqan. Tsëmi ima kastapita kanqanta musyëta puëdiyänampaqqa, Dios Akranqan Nunaqa manaraq tsë wata chämuptin yurinan karqan.

Tsë llapanta musyarqa, ¿kananqa ima ninkitan?

Deuteronomiu 18:18 y 19 ninqanchömi Dios willakurqan Moisestanö willakoqta churanampaq kaqta, tsëpitanam kënö cläru nirqan: “Tsë willakoq jutïchö parlanqanta pï nunapis mana cäsukuptinqa, kikïmi castigashaq”. Entëru Bibliapita alli yachakushqa karmi, tsë willakoqqa Nazaretpita Jesus kanqanta següru këkä.