Wakinkunata qonapaqmi alläpa shumaq tesörokuna kapamantsik
1 Llapantsikmi musyantsik Diospa Palabranchö tesörokuna alläpa väleq kanqanta (Sal. 12:6; 119:11, 14). Diospa Gobiernon imanö kanampaq kaqtapis igualatsikïkunawan yacharatsirmi, qateqninkunata kënö taporqan Jesus: “¿Kayiyarqonkiku llapan key kosaskunata?”. Tsënam qateqninkuna awmi niyarqan, y Jesusnam kënö nerqan: ‘Tseyreykur syelukunapa reynunchow llapan yachaq qellqaq kastapa teytan niraqnow, jorqun tesorunpita mushoq kosaskunata i awkis kosaskunata’ (Mat. 13:1-52, QKW).
2 ¿Imaraq tsë “awkis” tesörokunaqa? Rasumpa kaqta Bibliapita unë yachakonqantsikkunam. ¿Y “mushoq” tesörokunaqa? Bibliata leirnin sasa o aja kaqta yachakonqantsikkunam kayan (1 Cor. 2:7). Hina “mäcoq, mäcoq, cumplidu sirweqnin” publicacionkunawan käyinapaq o mäkunapaq yanapamanqantsikkunapis (Mat. 24:45).
3 “Mushoq” o “awkis” kayaptimpis, musyantsikmi kë tesörokuna alläpa väleq kanqanta. Tsëmi Diospa Palabrampita yachatsikoq karnin, kë shumaq yachakonqantsikkunata pï mëtapis yachatsita munantsik, y tsëpaqmi más yachakïta tïranantsik.
4 Jesus ruranqan: Nunakunata tesöronkuna qonanrëkur Jesus imëkata ruranqanmi rikätsimantsik, pëpaqqa alläpa väleq kanqanta. Alläpa utishqa këkarpis, manam haqerqantsu alli kaqta willakïta (Juan 4:6-14).
5 Jehoväpa kaqchö waktsa cuenta këkaqkunata kuyarmi, nunakunaman Jesusqa aparqan Bibliapita kawatsikoq rasumpa kaq yachatsikïkunata (Sal. 72:13). Diospa kaqchö mallaq cuenta kayanqanta ankuparmi o llakiparmi “tuquilayapa pecunata yachatserqan” (Mar. 6:34).
6 Pë ruranqanta qatishun: Diospita tarenqantsik tesoro alläpa väleq kanqanta Jesusnö rikarqa, kikin Bibliapitam nunakunata rikätsita munashun (Pro. 2:1-5). Mëjina utishqa këkarpis, Diosnintsikpita kushishqam yachatsikushun (Mar. 6:34). Jehoväpa kaqta tesörotanö alläpa kuyarqa, yachatsikïnintsikchö masta ruranapaqmi kallpachakunantsik.