Kikin Jehová Diosmi fiel sirveqnin Moisesta willarqan, shutimpaq tapuptin: Shutïqa, “Noqaqa kashaq imëpis kanqämi”, nishpa (Éxodo 3:14). O Rotherhampa traduccionnin nenqannö: “Noqaqa Kashaq munanqämi”. Awmi, tsënömi Jehová Diosqa llapan munanqanta cumplimunampaqqa imëkamampis tikran.

Pensakurkï, munanqëkiman tikrëta puëderqa, ¿imakunataraq rurankiman amïguïkikunapaq? Kuyashqa amïguïki qeshyaptenqa, alli yachaq mëdicoman tikrarirchi hampirinkiman. Huknin amïguïki waktsayäriptenqa, ricöyärirchi yanaparinkiman. Pero manam ni qam, ni llapan nunapis munanqanmanqa tikrëta puëdentsu. Pero Bibliapita más yachakorqa alleqmi tanteanki, Jehová Diosqa llapan munanqanman tikrarir llapan pishenqanta rurarenqanta. Y kushikunmi llapan kuyaqninkunata kallpanwan yanaparnin (2 Crónicas 16:9). Diospa shutinta mana yachakoqkunaqa manam reqiyanqatsu Jehová Dios imanö kanqantapis.

Tsëmi alleq claro këkan Diospa shutinqa Bibliachö yurinan. Diospa shutin Jehová, ima ninan kanqantapis musyarerqa kushishqam ciëlochö Diosnintsikta shutimpa qayar adorashun, tsëmi Pëman más witinapaq yanapëkamäshun.a

PROFETA Danielqa kawarqan pitsqa pachak watakuna Jesus yurinampaq pishikaptinmi. Tsënö këkaptimpis, Jehová Diosqa Danieltam willarqan imë Jesusta, Mesiastanö o Cristotanö, akrananta. Tsëmi Danielta nerqan: “Musyanëkim y tanteanëkim Jerusalenta altsayätsun nishpa orden yarqamonqampita hasta pushakoq Mesiasyaqqa, kanqa qanchis semänam, hina hoqta chunka ishkë semänakunapis kanqam” nishpa (Daniel 9:25).

Rikärishun mä imanöshi musyashwan Mesias chämunanta. Puntataqa rikärishun imëpita patsë tsë tiempota yupar qallayanqanta. Profecïachöqa rikätsimantsik, “Jerusalenta altsayätsun nishpa orden yarqamonqampita” patsë qallanqantam. ¿Imëtaq tsë “orden yarqorqan”? Biblia qellqaq Nehemías shutiyoqnam qellqarqan, Jerusalenpa perqankunata altsayänampaq ordenqa “ishkë chunka wata rey Artajerjes gobernëkaptin” yarqonqanta (Nehemías 2:1, 5-8). Y unë pasanqankunata qellqaqkunam willakuyan, Artajerjes reyqa 474 watachö manaraq Jesus shamuptin (m.J.sh.), huk watata gobernar cumplenqanta. Këta alleq tanteashqaqa, ishkë chunka wata gobernanqanqa karqan 455 wata

JEHOVÁ DIOSMI Biblia qellqaq profëtankunata willarqan, Salvamänapaq änikonqan Mesiaspita qellqayänampaq. Yurinanta, willapäkur purinanta y wanunantapis qellqashqa kayaptinmi fácil-lla reqinan. Tsë profecïakunachö llapan qellqarëkaqmi Jesuschö chipyëpa cumplikarqan. Tsetaqa rikärishun yurikïnin y wambra kënin profecïakunata leirninmi.

Mesiasqa Davidpa kastampitam kanqa, nerqanmi profeta Isaías (Isaías 9:7). Awmi, Jesusqa rey Davidpa kastampitam karqan (Mateo 1:1, 6-17).