Kuyakiqa alläpa precisom willapäkinintsik más miranampaq
1 “Noqaman shayämi, llapan pishipashqakuna y lasaqta apaqkuna, noqam hamatsiyashqeki.” (Mat. 11:28.) Keno shumaq parlanqanmi rikätsikun Jesuspa hatun kuyakïnin kanqanta nunakunapaq. Cristianokunapis pëno kuyakoq ketam munantsik, llapan llakishqa kë mana kuyakoq mundocho kawaqkunawan. ¿Alli noticiakunapita willapäkoq ewarnin imanöraq rurashwan?
2 Parlakïnintsikpa: Nunakunata kuyarninmi Jesusqa imë horapis alli noticiakunapita willapäkoq (Juan 4:7-14). Kë kuyakimi yanapamashun mecho këkarpis mana mantsakushpa willapäkunapaq. Médico atendikunan shuyaranan salachomi, hoqta watayoq warmi wambram shumaq willaparqan huk warmi ladoncho tëkaqta. ¿Imataq animarqan Diospita willapänampaq? Pëmi nin: “Jehová reqita necesitanqantanomi rikarqa”.
3 Kuyakïnintsikta rikätsikuntsik llapankunapaq kushi kushi karmi y parlakïnintsik shumaq kaptinmi. Hina kuyakïnintsikta rikätsikuntsikmi, parlayamonqanta shumaq wiyarnin, yarpachakïninkunata mana ichikllapaq churarnin y pekunaman rasumpa interesakurnin (Pro. 15:23). Jesusnomi, más parlashwan kushikïpaq Reinopa alli noticiampita y nunakunapaq Jehová kuyakipa ankupäkoq kanqanta (Mat. 24:14; Luc. 4:18).
4 Rurënintsikkunawan: Jesusqa rikaqmi nunakunapa necesidadninkunata, y yanapaqmi necesitayanqankunawan (Mat. 15:32). Itsa noqantsikpis tarishun yanapakï necesitaqkunata willapäkonqantsikcho, shumaq yanaparinapaq. Huk panim rikarqan huk warmita telefonopa parlëkaqta, preciso kaptimpis huk idiomacho kaptin mana käyeqta. Tse horam kë pani änikorqan ima nenqantapis käyitsinampaq. Pani kuyakipa keno ruranqanmi, yanaparqan Bibliapita parlapärinampaq y kë warmiqa munarqanmi Bibliapita yachakita. Huk kutichonam huk revisitata rurekaq wawqi, utishqata tarerqan wayiyoqta huk lasaq sillonnin punkucho trankakashqa kaptin. Tsepita shumaq yanaparïkurnam, kë wawqiqa tse silloncho tëkar quedarerqan. Tse horam qallarqan huk estudio biblicota kë agradecikushqa nunawan.
5 Diosta y nuna mayintsikkunata kuyanqantsiktam rikätsikuntsik willapäkoq ewarnin (Mat. 22:36-40). Parlarnin y rurarnin kë kuyakita rikätsishqaqa, yanapashunmi alli shonquyoq nunakuna rikäyanampaq rasumpa kaqta katsinqantsikta.