“Manam interesämantsu”
1 Atskaq nunakunam tseno contestakuyan willapäkoq ewashqa. Territoriocho mana wiyamashqa, ¿imataq yanapamashun llakishqa mana kanapaq? ¿Imanötaq más interesätsishwan alli noticiakunaman?
2 Ama kushikïnintsikta oqrashuntsu: Imanir atskaq wiyakita mana munayanqanta yarpëmi, yanapamashun kushikïnintsikta mana oqranapaq. Itsachi kë nunakuna yachakuyashqa evolucionpita o winayashqa huk familia Diosman mana creeqcho, tsenopa rikäyashqatsu Bibliapa shumaq yachatsikïninkunata. Wakinkunaqa itsa piñashqa kayan religionkunacho mana allikunata rikarnin. Hukkunaqa, wiyakita munayantsu llakishqa karnin y mana esperanzayoq karninmi (Efe. 2:12). Hina kayanmi ‘mana cäsokoqkuna’ alläpa rurëninkunawan ocupado karnin (Mat. 24:37-39).
3 Wakinkuna mana wiyakuyaptimpis kushikuntsikmi willapäkurnin, musyantsikmi ruranqantsikkuna Jehová Diosta kushitsinqanta (1 Ped. 4:11). Hinamampis, mana wiyaki munaqkunata rasumpa kaqpita willapashqaqa, sinchiyätsenqam fenintsikta. Kallpachakushun Jehová rikanqanno allipa rikänapaq territoriontsikcho nunakunata. Pëqa ankuparqanmi llapan Nínive markacho täraq nunakunata, pëkunaqa manam reqiyaqtsu “derecha ni izquierda makin huklaya kanqanta” (Jon. 4:11). Territoriontsikcho nunakunaqa, necesitäyanmi alli noticiakunapita wiyëta. Tsëmi, ama utishuntsu, imanöpapis rurashun Bibliaman más interesäyanampaq.
4 Markampaqno parle: Itsa parlar qallarnin ninkiman markampaqno kaqta, y tapunkiman tsepaq ima pensanqantapis parlamunampaq. Wiyë nenqanta, y tsepita rikätsi Bibliapa shumaq noticianta tsepaqno parlaqta. Markancho huk desgracia pasakurenqanchomi, huk Testigo alläpa llakikonqanta parlarqan cada wayi chanqancho. Pëmi nerqan: “Rasllam nunakuna parlar qallëkayamorqan. Problemankunaman shumaq interesakonqäpitam atskaqwan tse hunaq parlarqa.”
5 Diospa Reinonmi nunakunapa llapan problemankunata altsamonqa. Rike ima problemam más llakitsin wayiyoqta. Itsa kë wayiyoqpa probleman yanapashunki Bibliacho shumaq esperanzapita willapänekipaq. Mana tseno karqa itsa “huk kuticho” wiyashunkiman (Hech. 17:32).