¿Imakunataraq Jehovata qoshwan?
1 Hutsasapa nunaqa, ¿imakunataraq qoshwan Diosta? Abelqa wätakïnimpita más allin kaqtam Jehovata qorqan, y Noëwan Jobpis tsënöllam rurayarqan (Gén. 4:4; 8:20; Job 1:5). Tsë qoyanqankunaqa manam Kamakoq Yayantsik rïcoyänampaqtsu karqan, Patsachö llapan rikanqantsikpis pëllapa kaptin. Tsëpa rantenqa, tsë rurayanqanwanmi rikätsikuyarqan alläpa kuyayanqanta. Noqantsikpis tsënö kaqllam tiempontsikta, kallpantsikta, y kapamanqantsikkunata Jehovata qoshwan, tsënöpa ‘llapan shonquntsicwan alabanapaq’ (Heb. 13:15).
2 Tiempontsikwan: Mana väleq rurëkunachö “tiempiquicunata perdiyëtsu”, tsënöpa willapäkïcho masta rurayänëkipaq (Efe. 5:15, 16). Tsëpa rantenqa, tiempontsiktam alleq rikashwan watachö huk killa o más killakunapis precursor auxiliar kanapaq. O willapäkonqantsik hörapitapis ichik masllam willapäkurishwan. Semänacho media hora masllapis willapäkushqaqa, willapäkïnintsik killachö ¡ishkë hora masmi mirarenqa!
3 Kallpantsikwan: Jehovata servikonqantsikchö mana utishpa willapäkunapaqqa, tiempo perditsikoq rurëkunata y utitsikoq trabäjokunatam haqinantsik. Hina llakitsimaqnintsik yarpakachëkunatapis haqinantsikmi, Diosta servikunapaq kallpantsikta mana qochimänapaq (Pro. 12:25). Alläpa yarparënintsik kaptimpis, Jehovapa makinchönam tsë yarparëkunataqa haqirishwan (Sal. 55:22; Fili. 4:6, 7).
4 Kapamanqantsikwan: Hina kapamanqantsikkunawampis willapäkïcho yanapakushwanmi. Unë cristianokunatam Pablu willaparqan trabajapakuyanqampita rakirir, wakinkunata qoyänampaq (1 Cor. 16:1, 2). Noqantsikpis rakishwanmi qellëta congregacionchö wananqantsikkunapaq, y hinantin Patsachö willapäkïta yanapakunapaqpis. Ichiklla karpis, Jehovapaqqa alläpa allim llapan shonquntsikwan qoshqaqa (Luc. 21:1-4).
5 Jehovaqa llapantam qomashqantsik (Sant. 1:17). Agradecikonqantsiktaqa rikätsikuntsik tiempontsikta, kallpantsikta y kapamanqantsikkunata servinapaq qormi. “Teyta Diosnintsicqa cuyan cushi cushilla ofrendaq nunatam” (2 Cor. 9:7).