Teyta Diosqa juk papänömi kuyamantsik (1 Pëdru 5:6, 7).

Teyta Diosqa kamamaqnintsik karmi papänintsik. Juk alli papäqa wamrankunapaq yarpachakunmi y alli kawakuyänampaqmi yachatsin. Tsënöllam Diosnintsikpis noqantsikpaq yarpachakun. Tsëmi entëru Patsachö nunakunata yachëkätsin alli kawakuyänampaq.

Diosqa rasumpa kaqtam yachatsimantsik, y tsë yachatsimanqantsikmi yanapamantsik kanan y shamoq tiempuchö kushishqa kawakunapaq.

Teyta Diosqa änimantsik pëta wiyakushqaqa yanapamänapaq, cuidamänapaq y bendicimänapaq kaqtam.

Mana wanur kawakunapaqpis änimantsikmi.

“Shumaq wiyakur noqaman shayämuy. Wiyakurqa kawayankim” ninmi Teyta Dios (Isaïas 55:3).

Teyta Diosqa Palabran Bibliawanmi parlapämantsik (2 Timoteu 3:16).

Teyta Dios pensanqanqa Bibliachömi këkan. Tsëtaqa nunakunawanmi qellqatsirqan. Bibliachöqa imëkatam yachakuyta puëdintsik, tsëta musyanantsiktam Diosqa munan.

Teyta Diosllam pï mëpitapis mas yachaqqa. Pëllam musyan noqantsikpaq ima alli kanqanta. Nimanqantsikta wiyakurninqa imatapis alli decidinapaq kaqtam yachakushun (Proverbius 1:5).

Teyta Diosqa munan llapan nunakuna Bibliata leyiyänantam. Tsëmi mëtsika idiömachö kananta permitishqa.

Diosta wiyakuyta munarqa, Bibliatam leyinantsik y allim entiendinantsik.

Mëtsëchömi nunakuna Diospita yachakuykäyan (Mateu 28:19).

Jehoväpa testïgunkunam Bibliachö ninqankunata entiendinëkipaq yanapayäshunki.

Testïgukunaqa Bibliachö ninqanllatam mëtsëchö Diospita yachatsikuyan.

Testïgukunapa reunionninkunaman ëwarninqa masmi Diospita yachakuyta puëdinki. Y grätisllam yachatsiyäshunki.

Llapanta Gobernaq Poderösu Diosqa Jehovällam (Salmus 83:18). Teyta Diosqa juk espïritum, tsëmi rikëta puëdintsiktsu. Pëqa alläpam kuyamantsik y pëtapis kuyanatam munan. Y nuna mayintsiktapis kuyanantsiktam munan (Mateu 22:35-40). Teyta Dios llapanta kamashqa kaptinmi, pëpita mas puëdeqqa ni pï kantsu.

Imatapis manaraq rurarmi Diosqa juk puëdeq angelta kamarqan. Tsë angeltaqa Jesucristu nirmi reqintsik. Tsëpitanam mas angelkunata Teyta Dios kamarqan.

Jehovä Diosmi ciëluchö llapan kaqkunata kamashqa... y Patsachö llapan kaqkunatapis (Apocalipsis 4:11).