Kanan witsanyaq cumplikaq profecía

JERUSALENMAN y temploman shumaq rikakoq Olivos jirkachö Jesus këkaptinmi, chusku apostolninkuna niyarqan parlanqampita maslla yacharatsinampaq. Tsëllaran Jerusalenpa templon ushakänanta parlarishqa karqan, y más puntatanam “hinantinchö imëkapis imanö këkanqampa ushënin witsan[paq]” parlashqa karqan (Mateo 13:40, 49, NM). Tsëmi kënö tapuyarqan: “¿Imëtaq këkuna kanqa, y ima señaltaq rikätsikunqa këkämunqëkita, y jinantinchö imëkapis imanö këkanqampa ushënin witsanna kanqanta?” (Mateo 24:3, NM).

Tapuyanqanta contestarmi Jesusqa nirqan Jerusalenpa templon manaraq ushakaptin ima pasanampaq kaqtapis. Pero ninqanqa manam tsë witsanllapaqtsu karqan, sinöqa watakuna pasanqanmannö jinantin Patsachö cumplikänampaqmi. Jesus imë kutimunanta musyanapaqqa, kë witsanchö pasakunampaq kaqkunatam llapantsik mäkoq mäkoqlla këkänantsik. Tsë señalmi rikätsikunan karqan Jesus gobernanampaq Jehová coronarishqana kanqanta, ichikllachö llapan mana allikunata ushakätsimunanta y jinantin Patsachö yamë kawakïta apamunantapis. Jesus willakunqankuna pasëkanqanmi rikätsimantsik kë mundopa llapan mana alli rurëninkuna, polïticankuna y religionninkuna ushakänampaq ichikllana pishinqanta, y shumaq kawakï këllachöna kanqanta.

Jesusqa willakurqan ciëlochö gobernar qallamuptin, guërrakuna, mallaqëkuna, alläpa patsa kuyïkuna y tukïläya qeshyakuna kanampaq kaqtam. Gobiernokunapa leyninkunatapis mananam respetayanmannatsu karqan. Pero qateqninkunaqa jinantin Patsachömi Diospa Gobiernompita willakuyänan karqan. Y ‘allapa jipaqui’ witsan qallëkuptinmi, tsë señalpa ushënin musyakärinqa (Mateo 24:21).

¿Imanöraq cristiänokuna musyayanman tsë alläpa sufrimiento chëkämunqantana? Qateqninkunatam Jesus kënö nirqan: “Igus montipa yuranpeq yachacuyë” (Mateo 24:32). Higos tseqllir qallëkuptinmi musyarintsik tamya tiempo chëkämunqanta. Tsënöllam Jesus willakunqankuna juk tiempollachö cumplikar qallëkuptin, ushakë chëkämunqantana musyarishun. Pero imë hora y imë junaq allapa sufrimiento qallanampaq kaqtaqa, Teytanlla musyanqantam Jesus nirqan. Tsëmi listo këkänapaq kënö nirqan: “Mäcoq mäcoq quecayë. Porqui manam musyayanquitsu ime öra” tsë tiempo qallanampaq kaqta (Marcos 13:33).

(Mateo 24 y 25, Marcos 13 y Lucas 21 capïtulokunapita jorqashqam.)