Pachak watapanam Diospa Gobiernumpita willakïkantsik
1. ¿Imata rurayänampaqtaq Diospa markanta animayarqan cäsi pachak watakunapana?
1 “¡Rikäyë, Mandakoqqa mandakïkämunnam! Qamkunam musyatsikoqninkuna kayanki. Tsënö kaptinqa, willakuyë, willakuyë, willakuyë Gobiernumpita y Mandakoqnimpita.” Tsë shumaq palabrakunawanmi cäsi pachak watapana wawqi Rutherford animarqan Jehoväpa markan entëru Patsachö Diospa Gobiernumpita musyatsikuyänampaq. ¡Y tsënömi kashqa! Punta cristiänukunanöllam, Diospa Gobiernumpa alli willakïninta “entëru munduchö” yachatsikurquntsik (Col. 1:23, NTCN). ¿Imatataq rurarquntsik pasaq pachak watakuna Diospa Gobiernumpita musyatsikunapaq? ¿Imanötaq musyatsikur sïguikashwan tsë Gobiernu patsakanqampita pachak wata cumplimunqanyaq?
2. ¿Imanötaq publicacionnintsikkuna musyatsikushqa Diospa Gobiernumpita?
2 Pasaq watakunaman yarpärishun. Mëtsika watakunapam publicacionnintsikkunaqa Diospa Gobiernumpita musyatsikïkashqa. 1939 watapita patsëmi revistantsikpa jutinqa Täpakoq Jehovä Diospa Gobiernumpita Willakoq. Kë revistaqa mas yachatsikun Diospa Gobiernumpita y tsë Gobiernu imakunata ruranampaq kaqpitam. Jina ¡Despertad! revistapis yachatsikun Diospa Gobiernunlla alli kawakïta apamunampaq kaqpitam. ¡Alläpam kushikuntsik kë ishkan revistakuna atska idiömakunaman tikratsishqa kanqanta y entëru Patsaman chëkanqanta! (Apoc. 14:6.)
3. Diospa Gobiernumpita musyatsikunapaq imakunata utilisanqantsikta willakaramï.
3 Jehoväpa markanqa Diospa Gobiernumpita imëka formapa yachatsikunapaqmi patsätsimushqa. Qallananllachöqa utilisäyarqan parlantiyoq cärrukunata, radiuchö progrämakunata y gramöfonos portätiles nishqantam. Tsënö rurayanqanqa mëtsikaqman alli willakïkuna chänampaqmi alläpa yanapakurqan, porqui tsë witsanqa publicadorkuna wallkaqllam kayarqan (Sal. 19:4). Kë qepa watakunaqa mëtsika publicacionkunatam jw.org päginachö Jehoväpa markan jorqamushqa, tsënöpa Diospa Gobiernumpita millonyëpayan nunakunata musyatsinapaq, hasta Testïgukunapa rurëninkunata michäyanqan nacionkunachöpis.
4. ¿Ima shumaq rurëkunatataq patsätsiyämushqa?
4 Jina Jehoväpa markanqa shumaq rurëkunatam patsätsishqa Diospa Gobiernumpita musyatsikunapaq. Tantiyarinapaq, 1990 wata witsampita patsëmi, wayin wayinllanatsu yachatsikurquntsik, sinöqa parquikunachö, paradërukunachö y rantikuyanqan sitiukunachöpis yachatsikuntsiknam. Tsëllaraqmi patsätsiyämushqa juk progrämata entëru nacionkunapa jatusaq markankunapa cällinchö yachatsikunapaq. Jina mëtsika congregacionkunam territoriunkunachö tsënö yachatsikïkäyan, mësatawan mostradortam churayan nunakuna mas puriyanqan sitiukunaman. Peru mas precisaq rurënintsikqa wayin wayin Diospa Gobiernumpita yachatsikïmi (Hëch. 20:20).
5. Sirwina wata qallaqchö, ¿imakunatataq rurëta puëdishun?
5 Shamoq tiempukunaman pensë. 2015 sirwina wata qallariptinqa, mëtsikaq publicadorkunam precursor këta qallayanqa. ¿Qampis precursortsuraq kanki? Mana puëdirqa, ¿höra hörallapis precursor auxiliar kanëkipaq pensarqunkiku? Precursor kaptiki o mana kaptikipis, puëdinqëkimannö Diospa Gobiernumpita yachatsikur kallpachakuptikiqa Jehovä bendicishunkim (Mal. 3:10).
6. ¿Imanirtaq 2014 octubri killaqa precisaq kanqa?
6 Diospa Gobiernun patsakanqanqa 2014 octubri killam pachak watata cumpliramunqa. Tsëmi, nunakunata yachatsinapaq kaq Täpakoq revista tsë killachö yarqamoqqa, Diospa Gobiernumpita mas yachatsikunqa. Kallpachakushun mëtsikaq nunakunata tsë revistata jaqipunantsikpaq. Shamoq tiempuman pensarmi sïguikänantsik wiyakoq kaqkunata ‘Diospa mandaquininpita alli willaquicunata willarnin’ (Hëch. 8:12).