¿Imanirtaq Jesuspa qateqninkuna ayunayaqtsu?

Pascua fiesta 30 wata usharinqan witsanllam Juanta carcelariyarqan y juk watanönam carcelchö llawirëkarqan. Juanqa llapan qateqninkuna Jesusta qatiyänantam munarqan, peru manam llapantsu qatiyarqan.

31 wata Pascua fiestapaq ichikllana pishikaptinmi Juanpa wakin qateqninkuna Jesus kaqman ëwayarqan y kënö tapuyarqan: “¿Imanirtaq noqakuna y fariseukunaqa ayunayä, peru qateqnikikunaqa ayunayantsu?” (Mateu 9:14). Fariseukunaqa religionninchö costumbri kaptinllam ayunayaq. Tsëpita ichik tiempu pasariptinmi juk fariseu mañakunqampaq Jesus kënö willakurqan: “Diosllä, wakin nunakunanö mana kanqäpitam agradecikoq [...]. Noqaqa semänachö ishkë kutim ayunä” (Lücas 18:11, 12). Itsachi tsë fariseunöpis Juanpa qateqninkunaqa costumbri kaptinlla ayunayaq. O itsachi Juan carcelchö llawiranqampita llakikur ayunayaq. Tsënö kashqa kaptinqa, Jesuspa qateqninkuna imanir mana ayunayanqantachi tapïkäyarqan.

Jesusmi kënö nirqan: “Noviupa amïgunkunaqa manam ni imanöpapis llakikuyanmantsu noviu pëkunawan këkaptinllaraqqa, ¿aw? Peru chämunqam pëkunapita noviu qochishqa kanan junaqkuna, tsëmi sïqa ayunayanqa” (Mateu 9:15).

‘Noviuqa’ Jesus kanqantam Juanqa nirqan (Juan 3:28, 29). Qateqninkunawan Jesus këkaptinqa manam precisarqantsu pëkuna ayunayänanqa. Peru wanuriptinmi sï waqayarqan y pachatapis mikuyarqantsu. Y kawariramuptinqa mananam ayunayarqannatsu, tsëpa rantinqa alläpam kushikuyarqan.

Jina ishkë igualatsikïkunawan masmi Jesusqa pëkunata entienditsirqan: “Manam pipis mushoq ratashwanqa janan kaq makwa röpata remendar jirantsu, porqui tsë mushoq ratashqa qentikarmi tsë makwa röpata masraq rachiratsin. Jina llullu vïnutaqa manam makwa qara porongukunamantsu winayan, porqui tsëman winayaptinqa, tsë qara porongukunam pashtariyan, y vïnum ramakärin, y qara porongukunapis ushakäriyanmi. Tsëpa rantinqa, llullu vïnutaqa mushoq qara porongumanmi winayan” (Mateu 9:16, 17). ¿Imatataq Jesus yachatsikïta munëkarqan?

Jesusqa qateqninkunata entienditsirqan, ayünu costumbrinöpis judïukunapa religionninchö costumbrinkunata qatiyänan mana precisanqantam. Pëqa manam uchkushqa röpata remendaq cuentatsu judïukunapa ushakëkaqna y Dios manana chaskinampaq kaq religionninta altsaqtsu shamushqa karqan. Sinöqa nunakunapa costumbrinkunawan takukashqa religionninkuna ninqannö adorayänampa rantin, juknöpana Diosta adorayänampaqmi yachatsikurqan. Clärum këkarqan, manam makwa röpaman mushoq remiendu ratashta churaq cuenta o makwa qara poronguman llullu vïnuta winaq cuentatsu tsë religionta altsëta tïrëkarqan.