Cumpleäñu fiestachö juk nunata wanutsiyan

Jesuspa apostolninkunam Galilëachö yachatsikïkäyarqan, peru Jesus chänampaq nänita alistaq Bautizakoq Juanqa, carcel-llachöran prësurëkarqan. Ishkë watanönam carcelchö llawirëkarqan.

Rey Herödis Antïpastam, wawqin Filïpupa warmin Herodïaswan casakunqan alläpa mana alli kanqanta wakinkunapa jananchö Juanqa nishqa karqan. Moises qellqanqan Leyta cäsukunqantam Herödisqa neq, peru Herodïaswan casakunampaq warmimpita divorciakurqa, leypa contranmi rurëkarqan y jukpa majanwan oqllanakï jutsamanmi ishkishqa karqan. Tsëtam Juanqa alli cläru rikätsirqan, tsëchi, itsapis Herodïas exigiptin, Herödisqa carcelman llawitsirqan.

Juanta Diospa willakoqnintanö nunakuna rikäyaptinmi, Herödisqa Juanta ima rurëtapis mana musyarqantsu (Mateu 14:5). Peru Herodïasqa pëta imata ruranampaq kaqtaqa alleqmi musyarqan. Alläpa chikirmi wanïkatsitapis munarqan (Marcus 6:19). Y atska tiempupana shuyarëkanqan höram chärirqan.

32 wata Pascua fiestapaq ichikllana pishikaptinmi, santun junaqchö alläpa jatun fiestata Herödis rurarqan. Precisaq carguyoq nunakunata, soldädukunapa comandantinkunata y Galilëa provinciachö mas precisaq nunakunatam invitashqa karqan. Tsë fiestachömi, Herodïaspawan unë qowan Filïpupa Salomë jutiyoq shipashnin tushurqan. Y tushunqanqa llapankunatam alläpa gustëkurqan.

Herödistapis tushunqanqa alläpam gustarqan, tsëmi entenädanta kënö nirqan: “Munanqëkita mañamë, y qoykushqëkim”. Jina jurarmi kënö nirqan: “Imatapis mañamanqëkitam qoykushqëki, hasta gobernanqäpita pullan kaqtapis”. Tsënam imatapis manaraq mañakurnin maman kaqta ëwëkur, “¿imatataq mañaküman?” nir tapurqan (Marcus 6:22-24).

¡Herodïasqa tsëtam shuyarëkarqan! Tsëmi, “Bautizaq Juanpa peqanta” mañakunampaq nirqan. Tsë höram tsë shipashqa Herödis kaqman kutirir kënö nirqan: “Juk jatun palta plätuchö Bautizakoq Juanpa peqanta kanan höra qomänëkitam munä” (Marcus 6:24, 25).

Tsëqa Herödista alläpam llakitsirqan. Peru llapan convidanqankunapa jananchö jurashqa kanqanrëkurmi, penqakïchö ushëta mana munar, mana culpayoq nunata wanuratsiyänampaq mandakurqan. Tsëmi Herödisqa cuidaqninkunapita juk soldäduta jinan höra kacharqan y Juanpa peqanta apamunampaq mandarqan. Tsëpita rätunllatanam, soldäduqa juk jatun palta plätuchö Bautizakoq Juanpa peqanta chäratsir Salomëta entregarirqan, y pënam mamäninta qorqan.

Juanpa qateqninkuna tsëta musyarirqa, jinan höram ayanta ëlloq ëwayarqan y pamparirnam ima pasashqa kanqanta Jesusta willayarqan.

Tsëpitanam, qeshyëkaqkunata Jesus kachakëkätsinqanta y supëkunata qarqïkanqanta musyarir, Herödisqa alläpa mantsakarqan. “Wanushqakunapita” sharkamurnin tsëkunata Juan rurëkanqanta o juk nuna rurëkanqantam musyëta munarqan (Lücas 9:7). Tsëmi Jesusta alläpa rikëta munarqan, peru manam yachatsikunqanta wiyëta munartsu. Sinöqa tsëkunata pï rurëkanqanta musyëta munarllam.