Jesusmi “kawatsikoq tanta”

Galilëa qocha kinrëchömi, Jesusqa waranqëpayan nunakunata mikutsirqan, y tsëpitanam rey kanampaq churëta munayaptin ëwakurqan. Patsa manaraq waraptinmi, alläpa laqcheqsäkïkaq yaku janampa Jesusqa purirqan, jina Pëdrupis yaku janampam purirqan. Peru markäkïnin pishiptinmi hundikar qallëkurqan, tsëmi Jesusqa salvarqan. Y feyupa vientutapis päraratsirqanmi.

Yapëmi Jesusqa Capernaumchö këkarqan. Mikïnin qaranqan nunakunam kënö tapuyarqan: “¿Imëtaq këman chämurqunki?”. Tsënam pëqa piñaparqan, porqui mikïnin yapë qarananllapaqmi ashikäyarqan. Tsëmi Jesusqa “imëyaqpis kawëman chätsikoq mana ushakaq” mikïta ashiyänampaq nirqan, y manam ‘ushakaq mikïta’ ashiyänampaqtsu. Tsënam kënö niyarqan: “Tsëqa, ¿imatataq rurayänä Diospa rikëninchö alli kayänäpaq?” (Juan 6:25-28).

Tsënö tapurqa itsa Ley mandakunqanman pensëkäyarqan, peru Jesusqa mas precisaq kaqpitam kënö nirqan: “Këmi Diospa rikënimpaqqa alli: pë kachamunqanman markäkuyanqëkita rikätsikuyänëki”. Peru Jesusmanqa manam markäkuyarqantsu. Rurashqankunata rikashqa karnimpis, juk milagruta ruranantam mañayarqan. Kënömi niyarqan: “¿Ima rurëtataq ruramunki? Unë kastantsikkunaqa tsunyaqchömi manäta mikuyarqan, kënö qellqarëkanqannö: ‘Ciëlupitam tantata mikuyänampaq qorqan’” (Juan 6:29-31; Salmus 78:24).

Pipa poderninwan milagrukunata ruranqampitam kënö nirqan: “Rasumpa kaqllatam qamkunata niyaq: Moisesqa manam ciëlupita rasumpa tantatatsu pëkunata qorqan, peru Teytäqa rasumpa kaq tantatam ciëlupita qoyäshunki. Porqui Diospa tantanqa ciëlupita urämoq kaq, y nunakunata kawënin qoq kaqmi”. Peru mana entiendirninmi kënö mañakuyarqan: “Teytë, tsë tantata imëpis qolläyämë” (Juan 6:32-34). ¿Imatataq rikätsikun Jesus parlanqan tantaqa?

Pëqa kënömi entienditsikurqan: “Noqam kawatsikoq tanta kä. Noqaman shamoq kaqqa, manam ni imanöpapis mallaqanqatsu, y noqaman markäkunqanta rikätsikoq kaqqa manam ni imëpis yakunanqatsu. Peru noqa niyanqaqnöpis: qamkunaqa hasta rikäyämarqunkim, peru tsënö kaptimpis manam creiyankitsu. [...] Porqui noqaqa ciëlupita urämurqö, manam kikïpa munënïta ruraqtsu, sinöqa kachamaqnïpa munëninta ruraqmi. Kachamaqnïqa munan, qomanqan kaqkunapita ni mëqantapis mana oqranätam, tsëpa rantinqa ushanan junaqchö pëkunata sharkatsimunätam. Porqui Teytäqa këtam munan: Tsurita llapan reqeq kaqkuna, y pëman markäkuyanqanta rikätsikoqkuna imëyaqpis kawëta tariyänanta” (Juan 6:35-40).

Tsëta wiyëkurnam, judïukunaqa Jesuspaq rimar qallëkuyarqan. ¿Imanöpataq “ciëlupita urämushqa kaq tanta[m] kä” nin? (Juan 6:41). Pëkunapaqqa Galilëa provinciapa Nazaret markapita nunallam. Tsëmi kënö tapukuyarqan: “¿Manaku këqa Josëpa tsurin Jesus, y manaku teytantawan mamanta reqintsik?” (Juan 6:42).

Tsëmi Jesusqa kënö nirqan: “Ama kikikikunapura rimar kayënatsu. Manam pipis noqaman shamïta puëdintsu kachamaqnï Teyta noqaman mana apamuptinqa, y noqam ushanan kaq junaqchö kawaritsishaq. Diospa Willakoqninkuna Qellqayanqanchömi kënö qellqarëkan: ‘Pëkunataqa llapankunatam Jehovä yachatsinqa’. Teytata llapan wiyashqa kaqkuna, y yachakushqa kaqkunam noqaman shayämun. Manam ni pï nunapis Teytataqa rikashqatsu, sinöqa Diospita shamushqa kaqllam, pëllam Teytata rikashqa. Rasumpa kaqllatam niyaq: creeq kaqqa imëyaqpis kawëyoqmi kanqa” (Juan 6:43-47; Isaïas 54:13).

Nicodëmuwan Jesus parlarqa, Diospa japallan Tsurinman markäkïtam mana wanushpa kawëtawan igualatsirqan. Pëman markäkoqkunaqa mana ushakätsishqa kayänampaq y imëyaqpis kawëyoq kayänampaq kaqtam nirqan (Juan 3:15, 16). Peru tsë kutichöqa, mas atska nunakunatam parlaparqan përëkur imëyaqpis kawëyoq kayänampaq kaqta, y tsëtaqa manam cada junaq Galilëachö mikuyanqan tantawan ni manä nishqanwampis tariyanmantsu karqan. “Noqam kawatsikoq tanta kä” nirqa, përëkur imëyaqpis kawëta tariyänampaq kaqtam Jesusqa nikarqan (Juan 6:48).

Ciëlupita tantapaqqa manam tsë kutillatsu parlarqan, sinöqa Capernaumchö Diosta adorayänan wayichöpis yachatsikurqanmi.