Leyeqkuna tapukuyanqan

¿Ima nitatan Pabluqa munëkarqan “leyrëkurmi leypaq wanurqö” nirqa? (Gäl. 2:19).

Apostol Pabluqa nirqan: “Leyrëkurmi leypaq wanurqö, tsënöpa Diospaq kawanäpaq” (Gäl. 2:19).

Apostol Pabluqa tsëta qellqarqan Galacia provinciachö këkaq congregacionkunaman qellqarninmi. Galaciaqa Röma nacionchömi këkarqan. Tsëchö këkaq cristiänukunaqa, Moises Qellqanqan Leyta llapanta wiyakuyänampaq kaqta, y masqa penqëninkunachö señalakuyänampaq kaqta mana alli yachatsikoqkunatam wiyakuykäyarqan. Peru Pabluqa musyarqanmi, penqëninkunachö sirweqninkuna señalakuyänanta Dios manana shuyaranqanta. Alli entienditsikurmi, tsëkunata yachatsikuyanqan mana alli kanqanta rikätsikurqan. Y masqa wawqi panikuna Jesucristu wanunqanman mas markäkuyänampaqmi yanaparqan (Gäl. 2:4; 5:2).

Bibliachöqa, juk nuna wanuriptin imatapis manana mäkunqantam nin (Ecl. 9:5). ‘Leypaqmi wanurqö’ nirqa, apostol Pabluqa Moises Qellqanqan Leyta manana wiyakunampaq kaqtam nikarqan. Tsëpa rantinqa, Jesus wanunqanman markäkunqampita Diospaq imëka kawëkaq cuenta kanqantam següru këkarqan.

Pabluqa imëka kawëkaq cuenta karqan leyrëkurmi. ¿Imanötan tsëqa karqan? Pëqa tsëran entienditsikushqa karqan, ‘ley ninqanta ruranqampitatsu nunaqa alli kaqta ruraqnö rikashqa kanqanta, sinöqa Jesucristuman markäkunqanrëkurlla’ (Gäl. 2:16). Cläru parlakuychöqa, Leyqa yanapakushqam karqan. Tsëmi Galaciachö täraq cristiänukunata Pablu kënö nirqan: “Jutsakunata rikätsikunampaqmi yapakashqa karqan, änikïta chaskishqa kaq mirë chämunqanyaq” (Gäl. 3:19). Awmi Leyqa cläru rikätsikurqan imachöpis pantareq, y jutsallakoq nunakuna chipyëpa cumplita mana puëdiyänampaq kaqta. Y jutsankunarëkur juk kutillana juk jutsannaq nuna wanunanta wanayanqanta. Tsëmi Leyqa yanapakurqan, Bibliachö mirëpaq parlanqanqa Jesus kanqanta rikätsikunampaq. Jesucristuman pipis markäkuptinqa alli kaqta ruraqtanömi Diosqa rikan (Gäl. 3:24). Pablutaqa alli kaqta ruraqtanö Dios rikarqan, leyrëkur Jesusta chaskishqa kaptin y pëman markäkushqa kaptinmi. Tsënöpam Pabluqa Leypaq wanushqa karqan y Diospaq kawëkaq cuenta karqan.

Tsënöpam Pabluqa Diosllatana wiyakurqan, y mananam Moises Qellqanqan Leytaqa. Tsënöllam Römachö këkaq cristiänukunaman cartakurpis, Pablu kënö nirqan: “Wawqilläkuna y panilläkuna, Cristupa cuerpunrëkurmi qamkunaqa Leypaq wanuyarqunkina [...]. Peru kananqa Leypita librashqanam karquntsik, porqui tsë michämaqnintsik kaqpaqmi wanurquntsik” (Rom. 7:4, 6). Kë versïculukunachö y Gälatas 2:19 ninqanchöqa, manam Leypa contran imatapis rurëpita wanutsishqa këpaqtsu Pabluqa parlëkarqan, tsëpa rantinqa, Leypita librina kanqantam nikarqan. Nunakunapa jutsanrëkur Cristu wanunqanman markäkuyanqanrëkurmi, pë y wakin cristiänukunapis Ley ninqantaqa wiyakuyänannatsu karqan.