Bibliapita rasumpa kaqta yachakunqantsikmannö kawarnin sïguishun

1. Bibliapita rasumpa kaqta imanö yachakunqantsikpita parlakuyqa, ¿imanötan yanapamantsik?

“¿IMANÖTAN Bibliapita rasumpa kaqta yachakur qallarqëki?”. Tsënöqa, mëtsika kutiraq tapumashqantsik. Juk wawqi panikuna reqimënintsikta munarmi tsënöqa tapumantsik. Diosta sirweq mayintsikkuna Jehoväpita rasumpa kaqta imanö yachakuyanqanta wiyëqa kushitsimantsikmi. Diospita rasumpa kaqta imanö yachakunqantsikta pëkunata willëtapis gustamantsikmi (Rom. 1:11). Tsëkunapita wawqi panintsikkunawan parlakunqantsikqa, Jehoväpa testïgun kanqantsikpita alläpa kushikunqantsiktam yarpätsimantsik. Jina Bibliapita rasumpa kaqta yachakunqantsikmannö kawarnin sïguinapaqmi yanapamantsik, juk parlakuychöqa, Jehovä kushishqa kanampaq y bendicimänapaq kawarnin sïguinapaqmi (3 Juan 4).

2. ¿Imatataq këchö yachakushun?

² Këchömi Bibliapita rasumpa kaqta yachakunqantsikta imanir kuyanqantsikta wakinllata rikäshun. Jina yachakunqantsikkuna qarë cuenta kanqampita agradecikunqantsikta imanö rikätsikunapaq kaqtam yachakushun. Tsë llapankunata rikarmi, Bibliapita rasumpa kaqta yachakunapaq Jehovä yanapamanqantsikpita masraq agradecikushun (Juan 6:44). Y wakinkunatam Bibliapita rasumpa kaqta yachatsita masraq munashun.

¿IMANIRTAN BIBLIAPITA ‘RASUMPA KAQTA’ YACHAKUNQANTSIKTA KUYANTSIK?

3. ¿Imarëkurtan Bibliapita rasumpa kaqta yachakunqantsikta masqa kuyantsik?

³ Bibliapita rasumpa kaqta yachakunqantsiktaqa imëkarëkurmi kuyantsik. Masqa Jehoväta kuyanqantsikrëkurmi, pëmi rasumpa kaqta yachatsimantsik. Ciëluta y Patsata ruraq Llapanta Puëdeq Dios kanqantam, Palabran Bibliapita yachakurquntsik. Y tsëpitapis masqa, kuyamaqnintsik y noqantsikpaq yarpachakoq kuyakoq Teytantsik kanqantam yachakurquntsik (1 Pëd. 5:7). Y kikimpaq kënö ninqantam musyantsik: “Ankupäkuq y perdonakuq Diosmi kä. Imapitapis jukllaqa mana piñakuqmi kä. Alläpa kuyakuqmi kä. Äninqätaqa imëpis cumplïmi” (Ex. 34:6). Pëqa alli kaqta rurëtam kuyan (Is. 61:8). Jehoväqa alläpam llakikun sufreqta rikämarnintsik, tsëmi pë dispuninqan tiempu chäramuptinqa, llapan sufrimientukunata ushakäratsinqa (Jer. 29:11). ¡Tsë junaq chämunantanam munëkantsik! Tsënö kaptinmi, Jehovätaqa alläpa kuyantsik.

4, 5. ¿Imanirtan apostol Pabluqa barcuta tsaraq anclanö shuyäkuynintsik kanqanta nirqan?

⁴ Jina Bibliapita rasumpa kaqta yachakunqantsiktaqa, alli kawakunapaq yanapamashqam kuyantsik. Këllata rikärishun: Bibliapita yachakunqantsikchöqa, shamoq tiempuchö imëkapis alliyänampaq kaqta shuyäkunqantsikpis këkanmi. Imapis alliyänampaq kaqta shuyäkunqantsikpaq parlarmi, apostol Pablu kënö qellqarqan: ‘Tsë shuyäkïtaqa imëka barcu ëwakunanta tsaraq anclatanömi kawënintsikpaq katsintsik, següruta y mana kuyukoqta’ (Heb. 6:19, nöta). Imanömi barcu mana ëwakunampaq juk ancla tsaran, tsënömi shamoq tiempuchö imëkapis altsakänampaq kaqta Bibliachö yachakunqantsik imëka mana allikuna chämuptin, tranquïlu kanapaq y alläpa mana yarpachakunapaq yanapamantsik.

⁵ Pablu tsënö parlarqa, ciëluta ëwayänampaq shuyaq akrashqa cristiänukunapaqmi parlëkarqan. Peru ninqanqa, Patsa shumaqyäriptin mana wanushpa kawakuyta shuyaqkunapaqpis kanmanmi (Juan 3:16). Awmi, manana wanurnin kawakunapaq kaqta shuyanqantsikqa, kushishqa kawakunapaqmi yanapamantsik.

6, 7. Shamoq tiempupaq Bibliapita yachakunqanqa, ¿imanötan Yvonneta yanaparqan?

⁶ Yvonne jutiyoq panintsik imata pasanqanta rikärishun. Manam wamra kanqampitatsu Bibliapita yachakushqa karqan y wanïta o wañuytam alläpa mantsaq. Juk libruchö kënö leyishqa kanqantam imëpis yarparaq: “Imë karpis manam warämushunnatsu”. Pëmi kënö willakun: “Shamoq tiempupaq alläpa yarpachakurmi, tsëta leyinqäpita punïta o puñuyta puëdeqtsu kä. Kikïtam kënö nikoq kä: ‘Manachi juk ishkë watallaqa kawashwantsu. ¿Imatataq këchö rurëkä?’. ¡Manam wanïta munaqtsu kä!”.

⁷ Shipashyëkarnam Yvonneqa Jehoväpa testïgunkunata reqirirqan. Pëmi kënö willakun: “Patsa shumaqyäriptin manana wanurnin kawakunäpaq kaqmanmi creir qallëkurqä”. Bibliapita rasumpa kaqta yachakuyqa, alläpam yanapashqa. Pëmi kënö nin: “Shamoq tiempupaq y wanunapaq kaqman manana yarpachakurmi kananqa punukü”. Bibliapita rasumpa kaqta yachakunqanta agradecikunqampita y shamoq tiempupaq wakin nunakunata Yvonne yachatsinqampitaqa, manam espantakuntsiktsu (1 Tim. 4:16).

8, 9. (1) Juk igualatsikuywan Jesus yachatsikunqanchöqa, ¿imanötan tsë nunaqa alläpa väleqpaq tsë fortünata churarqan? (2) ¿Imanötan Bibliapita rasumpa kaqta yachakunqëkita rikanki?

⁸ Jina Bibliapita rasumpa kaqta yachakunqantsikchöqa, Diospa Gobiernumpita alli noticiakunapis këkanmi. Jesusqa pakarëkaq fortünatawanmi Diospa Gobiernunta igualatsirqan. Pëmi kënö nirqan: “Ciëluchö Gobiernuqa imëka chakrachö pakarëkaq fortünanömi, tsëta juk nuna tarïkurmi, yapë pakëkun; y alläpa kushikurmi, ëwëkur llapan kapunqankunata rantikïkur tsë chakrata rantirin” (Mat. 13:44). Rikanqantsiknömi, tsë nunaqa manam fortünata ashirtsu purikarqan. Peru tarïkurninqa, tsë chakrata rantinampaqmi llapan kapunqanta rantikuykurqan. ¿Imanirtan tsëtaqa rurarqan? Musyarqanmi ima kapunqampitapis tsë fortüna mas välinqanta.

⁹ ¿Tsënöku qampis Bibliapita rasumpa kaqta yachakunqëkita väleqpaq churanki? ¡Achyä! Jehoväta kanan witsan sirwinqantsikwan y pëpa Gobiernunchö manana wanur kushishqa kawakunapaq kaqta shuyäkunqantsikwanqa, manam kë munduchö imapis igualantsu. Jehoväwan amïgu kanapaq imatapis dejanqantsikqa, manam pëwan amïgu kanqantsikwanqa ichikllapis igualantsu. Y imata ruranqantsikpitapis Jehovä kushikunampaq ruranqantsikpitaqa kikintsikpis kushikuntsikmi (Col. 1:10).

10, 11. ¿Imatan Michaelta yanaparqan vïdanchö imëka cambiukunata ruranampaq?

¹⁰ Mëtsikaq wawqi panikunam imëkata dejayashqa Jehovä kushishqa kanampaq. Wakinqa, kë munduchö alläpa väleqtanö rikäyanqan profesionkunatam dejayashqa. Wakinnam, imëkayoq këta ashita dejayashqa. Y wakinnam, Jehoväpita yachakurnin vïdankunata chipyëpa cambiayashqa. Tsëtam Michael jutiyoq nuna rurarqan. Jövinllaraq këkarmi, karäti pelyëta yachakurqan. Pëmi kënö willakun: “Ejerciciukunata rurarnin kallpayoq kanqäpitam gälakoq kä. […] Höraqa pipis mana vencimänampaq kaqtam pensaq kä”. Peru Bibliapita yachakur qallëkurqa, maqanakuyta Jehovä imanö rikanqantam yachakurqan (Sal. 11:5). Bibliapita yachatseqnin wawqipaqwan warmimpaqmi kënö nin: “Manam pelyëta dejanäpaqqa imëpis niyämarqantsu. Tsëpa rantinqa, Bibliapita rasumpa kaqtam masqa yachatsiyämarqan”.

¹¹ Y Bibliapita mas yachakunqanmannömi, Jehovätapis masraq kuyaq. Sirweqninkunata Dios alläpa llakipanqanta yachakunqanmi shonqunyaq chärirqan. Michaelqa chipyëpa cambianampaq kaqtam cuentata qokurqan. Pëmi kënö nin: “Karäti pelyata dejanä fäcil mana kanampaq kaqtam musyarqä. Peru tsëta ruraptï Jehovä kushikunampaq kaqtapis musyarqämi, y tsëwan imapis mana igualëta puëdinqantam següru këkarqä”. Bibliapita rasumpa kaqta yachakunqanqa, Michaelpaqqa alläpam välirqan, tsëmi vïdanchö imëka cambiukunata rurarqan (Sant. 1:25).

12, 13. ¿Imanötan Bibliapita yachakunqan Maylita yanaparqan?

¹² Paqaschö chiwchipa chipapaq aktsitawanmi, Bibliachöqa rasumpa kaqta yachakunqantsikta igualatsin (Sal. 119:105; Efes. 5:8). Diospa Palabrampita yachakunqan kawëninchö chiwchipa aktsin cuenta yanapanqampitam, Azerbaiyan nacionpita Mayli jutiyoq pani alläpa agradecikun. Familianchöqa ishkë religionyoqmi kayarqan: papäninmi musulman religionpita y mamäninnam judïu religionpita. Maylinmi kënö willakun: “Dios kanqanman creirpis, wakin wakin yachatsikuykunataqa manam entiendeqtsu kä. Tsëmi kënö pensaq kä: ‘¿Imanirtan Dios kamamarqantsik? ¿Imanirtan pipis kawëninchö sufrishqa këkarpis infiernuchöpis sufrir sïguinqa?’. Diospa voluntänin kaptin imapis pasakunqantam nunakunaqa niyaq, tsëmi noqaqa kënö pensaq kä: ‘¿Diosqa munanqantaku nunakunawan ruran? ¿Kushikuntsuraq sufreqta rikämarnintsik?’”.

¹³ Tapukuyninkunapa respuestankunatam ashir sïguirqan. Tsëpita tiempuwanqa, Bibliapitam yachakur qallëkurqan y Jehoväpa testïgun kanampaqmi bautizakurirqan. Pëmi kënö willakun: “Bibliapita yachakunqämi, mas kushishqa y yamë kawakunäpaq yanapamashqa”. Maylinöllam, ‘paqaschö këkanqantsikpita alläpa shumaq aktsinman qayamanqantsikpita’ Jehovä Diosta alabantsik (1 Pëd. 2:9).

14. ¿Imatataq ruranantsik Bibliapita rasumpa kaqta yachakunqantsikta mas kuyanapaq? (“Juk igualatsikuykuna” neqtapis rikäri).

¹⁴ Qepa pärrafukunachö wawqi panikunapaq parlanqantsikmi, Bibliapita rasumpa kaqta yachakunqantsik alläpa välinqanta rikätsikun. Tsënölla rurayanqan juk wawqi panikunapaqpis yarpärintsikchi. ¿Imanirtan Bibliapita rasumpa kaqta yachakunqantsikta mas kuyanapaq, mas estudianantsikpaq churapakantsiktsu? Tsëta rurarqa, Bibliapita rasumpa kaqta kuyanqantsikta masmi rikätsikushun.

BIBLIAPITA RASUMPA KAQTA YACHAKUNQANTSIKTA KUYANQANTSIKTAQA, ¿IMANÖTAN RIKÄTSIKUNTSIK?

15. Bibliapita rasumpa kaqta yachakunqantsikta kuyanqantsiktaqa, ¿imanötan juknöpaqa rikätsikuntsik?

¹⁵ Bibliapita rasumpa kaqta yachakunqantsikta kuyanqantsiktaqa, Bibliata y publicacionnintsikkunata seguïdu estudiarmi juknöpaqa rikätsikuntsik. Ëka watapana yachakuykarpis, Bibliapita yachakuytaqa manam ushashuntsu. Ingles idiömachö puntata yarqamoq Täpakoq revistantsikchömi, kënö nirqan: “Bibliapita rasumpa kaqta yachakunqantsikqa, mana imapis kaq sitiuchö ichikllan wëtanömi. Mana alli qorakunawan o jachakunawan tsapashqa cuentam, ichikllan wëta niraq rasumpa kaq yachatsikuyqa, mana rasumpa kaq yachatsikuykunawan tsapashqa këkan. Tarita munarqa, allim ashinëki; [...] katsita munarqa, kallpachakunëkim. Juk wëtayoqlla kaq cuenta wakin wakinta yachakunqëkillawanqa conformakuytsu. [...] Mas wëtayoqnö kanëkipaq Bibliachö rasumpa kaqta ashirnin y yachakurnin sïgui”. Bibliapita yachakunapaqqa kallpachakunantsikran, peru allipaqmi kanqa.

16. ¿Bibliata imanö estudianqëkitan yanapashurqunki? (Proverbius 2:4-6).

¹⁶ Leyi y estudiëqa manam llapantsiktatsu gustamantsik. Tsënö kaptimpis, Bibliapita rasumpa kaqta yachakur sïguinapaqmi Jehoväqa nimantsik (leyi Proverbius 2:4-6). Tsëta gänas gänaslla rurashqaqa, kikintsikpaqmi alli kanqa. Bibliata leyirqa, Corey jutiyoq wawqiqa cada versïculupaq ima ninqantash ashin. Pëmi kënö nin: “Päginapa ura kuchunchö nötakunata y chowpi columnachö këkaq textukunatam leyï. Tsëpitanam tsë versïculupaq masllata entienditsikoq publicacionkunata ashï. […] Tsënömi Bibliata leyinqätaqa alli provechä”. Tsë wawqinö Bibliata leyir o juknöpa leyirpis, Bibliata estudianapaq tiempuntsikta patsätsishqa y kallpachakushqaqa, Bibliapita rasumpa kaqta yachakunqantsikta kuyanqantsiktam rikätsikushun (Sal. 1:1-3).

17. ¿Imanötan Bibliapita rasumpa kaqta yachakunqantsikmannö kawëkanqantsikta rikätsikushwan? (Santiägu 1:25).

¹⁷ Peru Bibliachö këkaq rasumpa kaqkunataqa manam yachakunanllatsu yachakunantsik. Mas alli provechanapaqqa, yachakunqantsikmannömi kawanantsik. Tsëta rurashqallam, Bibliapita rasumpa kaqta yachakunqantsikqa kushishqa kanapaq yanapamäshun (leyi Santiägu 1:25). ¿Y imanötan Bibliapita yachakunqantsikmannö kawëkanqantsiktaqa rikäshun? Tsëta musyanapaqqa, imakunata alli rurëkanqantsikta y imakunachö alliyänantsik pishinqanta rikänapaqmi juk wawqiqa nin. Apostol Pablum kënö entienditsikurqan: “Imanö kaptimpis, mëyaqpis poqushqana kanqantsikmannö, tsëmannölla imëpis shumaq kawakur sïguishun” (Filip. 3:16).

18. ¿Imanirtan Bibliapita rasumpa kaqta yachakunqantsikmannö kawarnin sïguinapaq kallpachakuntsik?

¹⁸ Bibliapita yachakunqantsikmannö kawanapaq kallpachakushqa, imakunata logranqantsikman pensarishun. Manam mas kushishqallatsu kawakuntsik, sinöqa Jehovä y wawqi panintsikkunapis alläpam kushikuyan (Prov. 27:11; 3 Juan 4). ¡Tsërëkurmi Bibliapita rasumpa kaqta yachakunqantsikta kuyantsik y yachakunqantsikmannö kawantsik!