Diospita yachakuyta munaqkunata ras yanapashun

1. ¿Llapankunaku Diospita yachatsishqa igual-lla chaskikuyan? (Hëchus 13:47, 48; 16:14, 15).

UNË witsanchö cristiänukuna yachatsikuyaptinmi mëtsikaq nunakuna wiyakurnin pöcu tiempullachö bautizakuyarqan (leyi Hëchus 13:47, 48; 16:14, 15). Tsënöllam kanan witsampis wakinkunaqa yachatsinqantsikta kushishqa wiyakuyan. Wakinkunaqa capaz qallananllachöqa wiyakuyta munayanqatsu, peru tsëpitaqa capaz Diospita yachakuyta munariyanman. Tsëqa, ¿imatataq rurashwan Diospita yachakuyta munaqkunata tarirqa?

2. Diospita yachatsikunqantsikqa, ¿imachötan igualan plantakunata cuidëwan?

² Tukuy plantakunayoq nunaman pensarishun, tsë nunaqa murunqan o plantanqan plantankunatam shumaq cuidarnin y limpiaparnin katsin, peru capazchi wakin plantankunaqa cosechëpaqna këkäyan, tsëta rikarqa jinan höram cosechanan. Tsënöllam Diospita yachatsishqapis wakinkunaqa qallananllachöqa wiyakuyta munayantsu, tsënö kaptimpis yachatsir y yanaparmi sïguintsik. Peru Bibliapita yachakuyta munaqkunata tarishqaqa wayushqana plantata cosechaq cuentam jinan höra yanapanantsik (Juan 4:35, 36). Tsëmi yachatsikunqantsik höraqa altantu këkänantsik yachakuyta munayanqanta o mana munayanqanta cuentata qokunapaq y yanapanapaq. Këchömi yachakurishun Bibliapita yachakuyta munaqkunata tarirnin imata ruranapaq kaqta y Jehoväpa sirweqnin kanampaq imanö yanapanapaq kaqta.

BIBLIAPITA YACHAKUYTA MUNAQNÖ KAPTIN

3. Yachatsikunqantsik höra pillapis shumaq wiyamashqaqa, ¿imatataq ruranantsik? (1 Corintius 9:26).

³ Yachatsikunqantsik höra pillapis shumaq y atentu wiyamashqaqa yanapëtam procuranantsik Jehovä munanqannö kawar qallëkunampaq. Tsëmi pillapis Bibliapita yachakuyta munaqnö kaptinqa, jinan höra ninantsik watukaq kutirnin Bibliapita yachatsinapaq y reunionnintsikkunamampis invitanantsikmi (leyi 1 Corintius 9:26).

4. ¿Imanötan wakinqa Bibliapita yachatsinapaq nirishqalla äniramashwan? Canadä nacionchö pasakunqanta willakaramuy.

⁴ Bibliapita yachatsir qallanëkipaq niri. Wakinkunaqa Bibliapita yachakuyta munayanqanta tapurishqam ras äniramantsik. Canadä nacionchö juk panita pasanqanta rikärishun: Carrïtuwan yachatsikuykaptinmi juk shipash witïkur Manana wanurmi kushishqa kawakushun neq follëtuta mañakurqan, tsëmi tsë panintsikqa willarirqan tsë follëtuwan Bibliapita yachatsita puëdinqanta. Tsënö niptinnam tsë shipashqa maslla musyëta munarnin panita nümerunta pasarqan y panipis nümerunta pasarqanmi. Tsë shipashqa tsë junaqllam “¿imëtan Bibliapita yachakur qallashwan?” nir paniman mensäjita apatsirqan. Tsënam paniqa, fin de semäna yachakuyänampaq nirqan, peru tsë shipashqa “warëmi tiempü kan, ¿manatsuraq warë yachakurishwan?” nirmi contestarqan. Änirmi panintsikqa warëninlla tsë shipashta Bibliapita yachatsir qallëkurqan y reunionmampis tsë semäna ushëllam ëwar qallëkurqan y Jehovätam maslla kuyar qallëkurqan.

5. ¿Llapankunaku Bibliapita yachatsinapaq nirishqalla ras äniramäshun? (Fötukunata rikäri).

⁵ Peru manam llapantsu tsë shipashnölla Bibliapita yachatsinapaq nirishqalla ras äniramäshun. Wakinkunaqa capaz gustayanqan kaqkunapita y yarpachakuyninkunapita shumaq parlapärishqaraq Bibliapita yachakuyta munayanman. Tsëmi qallananllachö Bibliapita yachakuyta mana munaptinqa qelanäkurinantsiktsu, tsëpa rantinqa yanaparmi sïguinantsik, tsënö yanapashqaqa capazchi Bibliapita yachakuytapis munarinman. Yachakuyta munaptinqa, ¿imanötan Bibliapita yachatsita munanqantsikta nirishwan? Bibliapita atskaq nunakunata yachëkätseq wawqi panikuna imata rurayanqanta yachakurishun.

6. ¿Imanötan parlapashwan Bibliapita yachakuyta munaqkunata tarita munarqa?

⁶ Tsë publicadorkuna y precursorkuna niyanqannöpis, pitapis Bibliapita yachatsita munarqa manash “yachakunapaqmi o estudianapaqmi kutimushaq” nishwantsu. Tsëpa rantiqa “parlakunapaqmi o Bibliapita maslla musyarinapaqmi kutiramushaq” nishwanshi. Tsëta rurayanqanshi pëkunata wakin markakunachö estudiu biblicuta tariyänampaq yanapashqa y Bibliapita yachatsiyänampaq kutita munarqa kënöshi niyan: “Imëka musyëta munanqantsikkunatam Bibliachöqa tarintsik” o “Bibliachöqa shumaq consëjukunatam tarintsik y manam religion asuntullapaqtsu parlan”. Y kënöpis niyanshi: “Imëka yanapashunëkipaq kaqkunatam juk rätullachö yachakurinki”. Manash cada semäna kutinapaq kaqtaqa nishwantsu, tsënö nishqaqa mantsakarshi yachakuyta munayanqanatsu.

7. ¿Imatan wakinkunata yanapashqa rasumpa kaqta yachakuykäyanqanta cuentata qokuyänampaq? (1 Corintius 14:23-25).

⁷ Reunionman invitë. Capazchi apostol Pablu kawanqan witsanqa reunionkunaman ëwaqkuna cuentata qokuyaq yachatsiyanqanqa rasumpa kaq kanqanta (leyi 1 Corintius 14:23-25). Kanampis reunionnintsikkunaman shamoqkunaqa rasmi Jehoväta kuyar qallëkuyan. Tsëqa, ¿Imëtan reunionnintsikkunaman shamunampaq invitashwan? Manana wanurmi kushishqa kawakushun neq libruchöqa 10 kaq yachakunëkipaq kaqchöraqmi nin reunionkunaman invitanapaq, peru manam tsëman char-raqtsu pëkunata reunionkunaman invitashwan. Pëkunawan yachakur qallanqantsik hörapitam reunionnintsikkunamanqa invitanantsik. Capazchi semäna ushë reunionnintsikman invitashwan y nirishwan tsë reunionchö imata yachatsikayämunampaq kaqta o Täpakoq revistapita imata yachatsikayämunampaq kaqta.

8. Pitapis reunionnintsikman invitarqa, ¿imatataq entienditsinantsik? (Isaïas 54:13).

⁸ Pitapis reunionman invitarqa shumaqmi entienditsinantsik wakin religionkunapita jukläya reunionnintsikkuna kanqanta. Juk kutim Bibliapita yachakuykaq warmi Täpakoq revistawan yachatsikuyanqanta wiyakoq ëwarqan, tsë reunion ushariptinmi yachatseqnin panita kënö tapurqan: “¿Imanötan tsë yachatsikamoqqa llapankunapa jutinta musyan?”. Tsënö tapuptinnam paniqa kënö nirqan: “Këchöqa juk familia cuentam kayä tsëmi llapäkunapis reqinakuyä”. Tsënam tsë warmiqa alläpa espantakurnin “noqapa religionnïchöqa manam mëqakunapis reqinakuyällatsu” nirqan. Tsënöllam wakinkunaqa musyayantsu reunionnintsikkunaman imapaq ëwanqantsikta, tsëmi shumaq entienditsinantsik (leyi Isaïas 54:13). Reunionnintsikkunamanqa ëwantsik Jehoväta adoranapaq, pëpita yachakunapaq y juknintsik juknintsik animanakunapaqmi (Heb. 2:12; 10:24, 25). Tsëmi llapampis shumaq y ordenädu kanampaq patsätsiyan y manam qayëkachëpa ni imëkata rurarninraqtsu Diosta adorayan (1 Cor. 14:40). Jinamampis reunionnintsikkunachöqa yachakunantsikrëkurmi llapampis atsikyaränan y manam polïtica asuntupaq parlayämuntsu ni pitapis apoyantsiktsu. Y tsëchöqa manam ima asuntupaqpis discutintsiktsu ni qayapänakuntsiktsu. Reunionnintsikkuna imanö kanqanta musyayänampaqmi ¿Imanötaq reunionnïkuna? neq videuta rikäratsishwan.

9, 10. Pitapis invitarqa, ¿imanötan yanapashwan reunionman ëwëta mana mantsanampaq? (Fötuta rikäri).

⁹ Wakinkunaqa “Testïgu kanäpaqmi obligayämanqa” nirmi reunionnintsikkunaman ëwëta mantsayan. Tsëmi shumaq entienditsinantsik, reunionnintsikkunaman ëwaqkunataqa manam ni pipis obligantsu tsëchö comentanampaq ni Testïgu kanampaq, llapankunapis ëwëta puëdiyanqantam nirishwan. Jinamampis reunionnintsikkunachöqa manam apartitsu wamrakunata yachatsiyan, llapantsikpis juntum yachakuntsik. Tsëta entiendiratsishqam papä kaqkunaqa wamrankuna imakunata yachakuyänampaq kaqta musyayanqa y manam desconfiayanqatsu (Deut. 31:12). Jinamampis nirishwanmi Jesusta cäsukurnin reunionnintsikkunachö qellëta mana mañakunqantsikta, pëmi kënö nirqan: “Grätisllam chaskiyarqunki, y grätislla rurayë” (Mat. 10:8). Y reunionman ëwanampaqqa manam chaniyoq röpataraqtsu churakunan, Diosnintsikqa shonquntsikchö imanö kanqantsiktam masqa rikan (1 Sam. 16:7).

¹⁰ Reunionman shamuptinqa alli sientikunampaqmi shumaq parlapänantsik, anciänukunata y wawqi panikunatam reqitsinantsik. Jinamampis mana Biblian kapuptinqa Bibliantsikchö textukunata ashirmi rikätsishwan y imata yachatsikayämunqantapis entiendiratsishwanmi. Tsëkunata rurashqaqa yachanämäshunmi y kutimuytapis munanqam.

BIBLIAPITA YACHATSIR QALLARNIN

11. Pitapis Bibliapita yachatsir qallarqa, ¿imatataq cuentachö katsinantsik?

¹¹ Pitapis Bibliapita yachatsirqa këkunatam yarpänantsik: Yachatsinqantsik nunapa markanchö mëmampis höranchö chë mana costumbri kaptimpis, imë hörapaqmi quedarquntsik tsë hörapaqmi chänantsik. Jinamampis pitapis yachatsir qallarqa manam unëpatsu ni mëtsikatatsu yachatsinantsik. Unëpana yachatsikoq wawqikunam niyan manash tiempunkuna kaptimpis unëpaqa yachatsishwantsu, tsëpa rantinqa imë hörayaqlla yachatsinapaq ninqantsiktash cumplinantsik. Jinamampis manam kikintsikllaqa ushëpa ushar parlakunantsiktsu, pëpis parlakamunantam dejanantsik (Prov. 10:19).

12. ¿Imatataq ruranantsik Bibliapita yachatsir qallanqantsik hörapita?

¹² Bibliapita yachatsir qallanqantsik hörapitam yachatsinantsik Jehoväta y Jesusta reqiyänampaq y kuyayänampaq. Peru manam pensënintsikllapitaqa yachatsinantsiktsu, sinöqa Bibliawanmi (Hëch. 10:25, 26). Apostol Pablupis Jesus yachatsikunqankunallatam yachatsikurqan. ¿Imanir? Pëqa musyarqanmi Jehoväta maslla reqinapaq y kuyanapaq Jesusta mandamushqa kanqanta (1 Cor. 2:1, 2). Jinamampis tsëllaraq Bibliapita yachakuykaqkunataqa yanapanantsikmi Jehoväman mas confiakuyänampaq, yachaq kayänampaq y Jehoväta llakitsita mantsayänampaq y maskunata rurayänampaq. Tsëkunata rurëqa apostol Pablu ninqannömi öru, pläta y shumaq chipapaq rumikunanö alläpa välin (1 Cor. 3:11-15; Sal. 19:9, 10; Prov. 3:13-15; 1 Pëd. 1:7). Tsëqa Bibliapita yachëkätsinqantsikkunata yanapashun Jehoväman maslla confiakuyänampaq y kuyayänampaq, tsëta rurarqa apostol Pablunöllam rurëkäshun (2 Cor. 1:24).

13. Pitapis Bibliapita yachatsirqa, ¿imanötan entiendita procurankiman y pacienciayoq kankiman? (2 Corintius 10:4, 5; fötuta rikäri).

¹³ Bibliapita yachatsinqantsik höraqa Jesusnölla noqantsikpis nunakunata entiendita procurashun y pacienciayoq kashun. Tsëmi Bibliapita yachatsirqa llutalla tapuparnin penqakatsinantsiktsu. Imatapis mana shumaq entiendiptinqa ama tsë höra imëkanöpa entienditsita procurëtsu, tsëpa rantinqa qateqnin kaqta yachatsir sïgui. Tsë asuntutaqa pöcu pöcuraqmi entiendinqa. Y Biblia ninqanta cumpli pëpaq mana fäcil kaptinqa, manam obliganantsiktsu. Pöcu pöcuraqmi tsëtaqa maslla entiendirnin shonqunman chaptin cambianqa (Juan 16:12; Col. 2:6, 7). Bibliam mana alli yachatsikuykunata igualatsin juk markapa murällantawan y tsëtam juchutsita procuranantsik (leyi 2 Corintius 10:4, 5; leyi Biblia de estudiuchö, “derrumbar cosas fuertemente atrincheradas” neqta). Wakinkunaqa creenciankunatam imëkanöpa defendiyan, tsëmi tsë creenciankunata dejayänampaqqa fäciltsu, imëka jatun murällata juchutseqnömi kanman. Tsëmi puntataqa Jehoväman shonqupita patsë confiakunampaq yanapanantsik (Sal. 91:9).

REUNIONMAN SHAMUPTIN

14. Reunionnintsikkunaman shamoqkunataqa, ¿imanötan tratashwan?

¹⁴ Reunionman llapan shamoqkunatam shumaq chaskinantsik, manam mëpita kayanqanrëkur, qellëyoq o waktsa kayanqanrëkur o ima costumbriyoq kayanqanrëkurtsu jukläya tratashwan. Jehoväqa llapantapis shumaq y igualpa tratanantsiktam munan (Sant. 2:1-4, 9). Tsëta imanö ruranapaq kaqta yachakurishun.

15, 16. ¿Imakunatataq rurashwan reunionman shamoqkuna noqantsikwan yachakäyänampaq?

¹⁵ Wakinqa reunionkunaman shayämun imanö kanqanta musyëta munarllam o pipis invitashqa kaptinmi. Imanöpa shamushqa kaptimpis pëkunaman witïkurmi shumaq parlapar chaskinantsik. Peru manam lluta tapuparninqa penqakatsishwantsu. Tsëpa rantinqa pëwan juntum jamakurishwan o täkurishwan, y Bibliankuna y yachakuykanqantsik publicacionkunatapis makyarishwanmi o manaqa kikintsikpa kaqtam rikäratsishwan. Rikärishun salonman ëwaq juk nunata juk wawqi imanö chaskinqanta: Tsë nunam yarpan reunionman ëwanqan kutichö mantsapakuykar chanqanta, tsënöqa mantsapakurqan reunionpaqnö röpan mana kanqanta pensarmi. Peru juk wawqim shumaq parlaparnin chaskirqan y kënömi nirqan: “Ama yarpachakuytsu salonman shayämunällapaqmi kënöqa vistikuyä, wayïkunachö o juk rurënïkunachöqa noqakunapis juk röpatam churakuyä”. Tsë nunaqa tiempuwanqa Bautizakurqanmi y tsë wawqi shumaq parlaparnin chaskinqantaqa kananyaqmi yarparëkan. Peru yarpänantsikmi, salonman ëwaqkunata shumaq chaskirnimpis, manam asuntunkunamanqa mëtikunantsiktsu (1 Pëd. 4:15).

¹⁶ ¿Ima mastataq rurashwan reunionman shamoqkunata chaskirnin? Alliraqmi pensanantsik imatapis manaraq parlar, tsënöpa mana llakitsinapaq y yapëpis kutimuyta munanampaq. Tsëmi reunion manaraq qallaptin o ushariptin parlakurnin, comentarnin, discursarnin o demostracionkunata rurarqa creenciankunapaq mana allita parlashwantsu (Tïtu 2:8; 3:2). Jinamampis manam creiyanqankuna mana alli kanqanta o pantashqa këkäyanqanta nishwantsu (2 Cor. 6:3). Tsënöllam discursaqkunapis tsëta imëpis cuentachö katsiyänan. Jinamampis Testïgu kaqkunalla entiendinqantsik kaq palabrakunata nirqa shumaqmi entienditsikayämunan.

17. ¿Imatataq ruranantsik Diospita yachakuyta munaqkunata tarirqa?

¹⁷ Kananqa imëpitapis masmi nunakunata Diosnintsikpita yachatsinantsik, ¿imanir? Diospita yachakuyta munaqkunaqa kayanraqmi (Hëch. 13:48). Tsëmi Diospita yachakuyta munaqkunata tarirninqa Bibliapita yachatsinapaq jinan höra ninantsik y reunionnintsikkunamampis invitanantsik. Tsënöpam pëkunata yanapëkäshun ‘kawëman chätsikoq llanu nänipa’ ëwaq cuenta mana wanurna kawakuyänampaq (Mat. 7:14).