3 Respetanakuyänëkim

¿IMA NINANTAN?

Respetanakoq casädukunaqa, ima kaptimpis juknimpaq juknimpaq yarpachakuyanqantam rikätsinakuyan. Diez claves para transformar tu matrimonio librum kënö nin: “Respetanakoq casädukunaqa imapis pasakuptin manam upällatsu quedakuyan. Tsëpa rantinqa, altsayänampaqmi parlayan. Respëtuwanmi wiyanakuyampis y imatapis juntu rurayänampaqmi kallpachakuyan”.

BIBLIACHÖ YACHAKUNQANTSIK: “Kuyakoqqa [...] manam kikimpa munëninllatatsu ashin” (1 Corintius 13:4, 5).

Mïcam kënö nin: “Noqaqa warmïta respetanqäta rikätsi kuyarnin, mana llakitsirnin y shumaq tratarninmi”.

¿IMANÖTAN YANAPAMANTSIK?

Mana respetanakoq casädukunaqa mana allipa y lluta parlapänakurmi kikinkunapura llakitsinakuyan. Tsëpaqmi yachaq nunakunaqa niyan, tsënö mana allipa parlapänakuyqa rakikëman chätsikunqanta.

Brayanmi kënö nin: “Warmikita llakitsipa, wiyapätsipa y burlakuypa parlapaptikiqa, pëqa manam qamman markäkamunqanatsu o yärakamunqanatsu”.

¿IMATATAN RURANKIMAN?

KËKUNAMAN YARPË:

Warmikita o nunëkita imanö parlapanqëkiman yarpë. ¿Imanötan kë semäna parlaparqunki? Tsëpitana kë tapukuykunaman yarpë:

• ¿Ëka kutitan mana allipa parlaparqunki, y ëka kutitan shumaq parlaparqunki?

• ¿Respetarqunkiku?

WARMIKIWAN O NUNËKIWAN PARLANËKIPAQ

• ¿Imachötan rikakun respetanakuyanqa?

• ¿Imachötan rikakun mana respetanakuyanqa?

KËKUNAM YANAPASHUNKI:

• Imakunachö majëki respetashunëkita munanqëkita kimata qellqë. Tsë qellqayanqëkita makyanakuyë y tsëta rurayänëkipaq kallpachakuyë.

• Majëki imakunata ruranqan gustashunqëkita qellqë y tsëkunarëkur kuyanqëkita nï.

Mëganmi kënö nin: “Kuyarnin y kushishqa kananta munarmi, nunätaqa llapan shonqüwan respetä. Manam imëkata rurar-raqtsu respetanqätaqa rikätsinä, sinöqa cada junaqmi”.

Respetakoq kanqëkitaqa warmiki o nunëkim rikänan. Y manam kikikitsu respetakoq kanqëkitaqa ninkiman.

BIBLIACHÖ YACHAKUNQANTSIK: “Ankupäkoq këta, alli këta, qollmi shonqu këta, yachanëpaq këta y alläpa pacienciayoq këta imëka röpatanö vistikuyë” (Colosensis 3:12).