4 Perdonanakuyë

¿IMA NINANTAN?

Perdonakoq këqa manam mana allita ruramanqantsikta mana kaqpaq churëtsu. Tsëpa rantinqa, shonqupita patsë perdonar ruramanqantsikta mana yarparäkuymi.

BIBLIACHÖ YACHAKUNQANTSIK: “Jukniki juknikikuna aguantanakurnin sïguiyë, y ofendinakurpis jukniki juknikikuna perdonanakuyë” (Colosensis 3:13).

Aronmi kënö nin: “Kuyakoq karqa manam mana alli ruranqanllatatsu rikarantsik, sinöqa allikunata ruranampaq kallpachakunqantam”.

¿IMANÖTAN YANAPAMANTSIK?

Mana perdonakoq karqa, qeshyapäkushunmi y llakishqallam kashun. Y casädu kawakuynintsikchöpis manam kushishqatsu kashun.

Juliam kënö nin: “Juk kutin nunä llakitsimarqan, tsëpitanam perdonta mañamarqan. Peru noqaqa manam tsë höra perdonarqätsu, sinöqa junaqkuna pasaptinran. Jinan höra perdonashqa kaptïqa, manam familiachö llakikuyämantsu karqan”.

¿IMATATAN RURANKIMAN?

KËKUNAMAN YARPË:

Warmiki o nunëki llakitsishuptikiqa:

• ¿Mana imapis nïkunanku kanki?

• ¿Perdonta mañashunëkitaraqku munanki o tsënöllaku qonqarinki?

WARMIKIWAN O NUNËKIWAN PARLANËKIPAQ

• ¿Tsë hörallaku perdonanakuyanki?

• ¿Imatatan rurayankiman jinan höralla perdonanakuyänëkipaq?

KËKUNAM YANAPASHUNKI:

• Warmiki o nunëkiqa manam llakitsishuynikita munartsu imatapis ruran.

• Bibliachöqa nin, “llapantsikmi mëtsika kuti pantantsik” o mana allita rurantsik (Santiägu 3:2).

Kimberlim kënö nin: “Ishkantsik pantarqa fäcilmi perdonakuy. Peru juknin kaqlla pantashqa kaptinqa, manam fäciltsu perdonakoq kë. Tsëmi perdonakoq kanapaqqa, humildi kanqantsik yanapamäshun”.

BIBLIACHÖ YACHAKUNQANTSIK: “Asuntukunata raslla altsëta tïrë” (Mateu 5:25).