Diospa amigon kashun wiñeypaq

Amigota tarinampis, tsepeq mana oqranampis allapa sasam. Diospa amigon keta munarqa, hina, amigon kanqantsikta mana oqreta munarqa, sinchikushwanmi, tseqa atska bendiciontam tarishun. Jesusmi nerqan, peman creeqkunata: “Razonpa kaqmi librayäshunki” (Juan 8:32). ¿Ima nitaraq munarqan?

Kanampitana libre kawakushun. Satanaspa mana alli yachatsikïnimpita, ulikïnimpita, librakushwanmi. Manam qamqa, wakin mana Jehovata reqeqnotsu, allapa llakikunki (Romanos 8:22). Diospa amigonkunaqa manam wakinnötsu kayan “wanïta mantsar” (Hebreos 2:14, 15).

Diospa Paraisonchoqa librenam kakushun. ¡Imano allapa shumaqchöraq kawakushun! Kë Patsa paraisoman tikrariptenqa mananam kanqanatsu guerrakuna, qeshyakuna, wanutsikoqkunapis. Manam kanqatsu waktsayepis ni mallaqepis. Librakäshunmi tsatsayepitapis, wanïpitapis, llakikipitapis manam ni imatapis mantsashunnatsu. Bibliaqa Diosnintsikpaq kenomi nin: “Makikitam kichëkanki, llapan kawaqpa munëninta qonekipaq” (Salmo 145:16).

Diospa amigonkunaqa wiñeypam kawayanqa. Diospa amigon kë munaqkunataqa, huk shumaq wiñeypaq kawetam qaranqa (Romanos 6:23). Mä yarpakurki imanöraq tse wiñeypaq kawecho kankiman.

Tiempontsik kanqam imekata ruranapaqpis. Munashwanchi guitarra toqueta, llapan munashqantsiktapis yachakita, shumaq dibujokuna ruretapis, carpintero ketapis. Tükilaya animalkunata, plantakunata reqita munankimanchi, llapan wakin marcakunatawan nunankunatawan. Wiñë kaweyoq karninmi kë llapan munanqantsikta rurashun.

Tiempontsik kanqam atska amigokunata tarinapaq. Wiñeypaq kawarninmi reqishun wakin Diospa amigonkunata. Hina reqishunmi llapan yachayanqanta, alli rurëninkunata, tsepeqmi amigon keman chashun. Noqantsikmi pekunata kuyashun, pekunapis noqantsikta kuyamäshunmi (1 Corintios 13:8). Wiñeypaq kawarninmi, llapan Patsacho täraqkunawan amigo tikrashun. Kë llapampitapis mas alliqa kanqa, Jehová Dioswan kuyakïnintsik chachaqyanqanmi. ¡Diospa amigon kashun wiñeypaq!