¿Ëkaq Testïgukunatataq reqinki? Quizä wakinnïkunaqa vecïnïkikuna, trabajaq o estudiaq mayikikuna kayä, o Bibliapita imëllapis parlapäyarqoq. ¿Rasumpaqa pitaq kayä, y imanirtaq creiyanqäpita pï mëtapis parlapäyä?

Wakinkunanöllam kayä. Noqakunachöqa, waktsapis y imëkayoq tukï nacionpita ollqukuna y warmikunam kayan. Wakinnïkunapaqa religionnïkuna karqanmi, y wakinnïkunaqa Diosman manam creiyarqätsu, peru Testïgu këman manaraq tikrarqa, llapäkunam Bibliata alli estudiayarqä (Hëchus 17:11). Yachakuyanqäkuna alli kaptinmi, Diosta sirwiyänäpaq kikïkuna akrayarqä.

Biblia ninqannömi kawayä. Llapannöpis imëka problëmayoq kar y jutsa ruraq karmi, llapan kawënïkunachö Biblia ninqanta rurëta procurayä, tsënöpam kawënïkuna alläpa mejorashqa (Salmu 128:1, 2). Tsëmi Bibliapita yachakuyanqäpita pï mëtapis parlapäyä.

Dios munanqannömi kawayä. Tsëkunata Bibliapita yachakuyanqämi yanapayäman respetakuyänäpaq, kuyakoq y sänu kayänäpaq, autoridäkunata wiyakuyänäpaq, familiachö alli kawakuyänäpaq y alli kaqllata rurayänäpaq. Clärum musyayä “llapan nunatapis Dios iwallla ricamanqantsicta”. Tsëmi, më tsë markapita karpis kuyanakuyä y polïticamampis mëtikuyätsu. Wakinkunanölla karpis alläpa jukläya kuyakoq markam kayä (Hëchus 4:13; 10:34, 35).

• ¿Imanö nunakunataq (runakunataq) Testïgunkunaqa kayä?

• ¿Imakunatataq Biblia yachatsiyämashqa?

Atskaqmi pensayan Testïgukunaqa mushoq religion kayanqäta. Tsënö kaptimpis, 2.700 pasaq watakunachöqa rasumpa kaq Diosta sirweqkunataqa ‘testïgukuna’ nirmi reqiyarqan (Isaïas 43:10-12). Y 1931 watapita qepamanqa Bibliata Estudiaqkuna nirmi reqiyämarqan. Tsëqa, ¿imanirtaq Jehoväpa testïgunkuna nirna jutïkuna churayarqä?

Dios pï kanqanta musyatsikuptinmi. Diospa jutin Jehoväqa, Bibliachö atska waranqa kutim yurin, unë tiempuchö qellqayanqankuna rikätsikunqannöpis. Peru Bibliata juk idiömaman tikratseqkunaqa, tsë jutita churayänampa rantinmi Señor o Dios nirlla churayashqa. Tsënö kaptimpis, rasumpa kaq Diosqa, jutin Jehovä kanqanta willarmi Moisesta kënö nirqan: “Këmi imëyaqpis jutï” (Exodu 3:15). Tsënöpam rikätsikurqan wakin dioskunapita jukläya kanqanta. Tsëmi Diospa jutinwan reqishqa këtaqa alläpa kushikuyä.

Rurayanqätam rikätsikun. Diosta kuyaq Abelpita qallëkurmi atskaq nunakuna (runakuna) Jehoväman creiyanqanta willakuyarqan. Tsëpita watakuna pasanqanmannömi Noë, Abrahan, Sära, Moises, David y wakinkunapis “testïgunö” yapakäriyarqan (Hebrëus 11:4–12:1, NTCN). Imanömi juk testïgu rikanqanta justiciachö jukta defendir rasun kaqta willakun, tsënö kaqllam noqakunapis Diosnïkunapita rasun kaqta willakuyä.

Jesus ruranqantam rurayä. Bibliam Jesuspaq “rasumpacagta parlag cumplïdu testïgu” nin (Apocalipsis 3:14, NTCN). Kikinmi nirqan Teytampa jutinta musyatsikunqanta y ‘rason caqta willacoq’ Patsaman shamunqanta (Juan 17:26; 18:37). Tsëmi rasumpa qateqninkunaqa Diospa jutinwan reqishqa kayänan y tsëpita willakuyänan. Tsëtam Jehoväpa testïgunkunaqa rurëta procurayä.

• ¿Imanirtaq Bibliata Estudiaq jutïkuna kanqampita, Jehoväpa testïgunkuna nirna churayarqä?

• ¿Imëpitanataq Jehoväpa testïgunkunaqa Patsachö kayan?

• ¿Pitaq mas reqishqa Jehoväpa testïgunqa?

Bibliaqa willakurqannam Cristu wanuriptin punta cristiänukunapa tiempunchö mana alli yachatsikoqkuna yuriyämunampaq kaqta y pëkunaqa Diospa Palabrantam mana alli yachatsikïkunawan takuyänan karqan (Hëchus 20:29, 30). Y tsënöllam pasakushqa: mana alli yachatsikoqkunam yachatsikïninkunata Jesuspa yachatsikïnintawan takur qallëkuyarqan, tsënöpam cristiänutukoqkuna yurir qallëkuyarqan (2 Timoteu 4:3, 4). Y noqakunaqa, ¿imanirtaq Bibliapita yachakuyanqä rasumpa kanqanta creiyä?

Tiempunam rasumpa kaqta Jehovä musyatsikunampaq. Diosqa willakushqanam karqan ushanan tiempukunachö “rasumpëpa yachëqa, atskayanqam” nir (Daniel 12:4). 1870 watachömi, rasumpa yachatsikïta asheqkuna cuentata qokuriyarqan iglesiakunachö yachatsikuyanqan Biblia yachatsikunqannö mana kanqanta. Tsënöpam Biblia yachatsikunqanta alli estudiar qallëkuyarqan y Jehovämi santu espïritunwan yanaparqan.

Alli shonquyoq nunakunam Bibliata estudiayarqan. Tsë punta Bibliata Estudiaqkunaqa juk tapukïta rurëkurmi, Biblia tsëpaq imata yachatsikunqanta alli estudiayaq, y tsënöllam kanan witsampis estudiayä. Juk textuta mana entiendirqa, juk textukunatanam ashiyaq tsëta alli entiendiyänampaq, y juk textukuna tsë tapukïninkunata yanapanqanta taririrqa apuntayaqmi. Tsënö estudiayanqanmi yanaparqan mana alli rurëkunata y creenciakunata jaqiriyänampaq. Y kikin Biblia yachatsikunantam jaqiyarqan y tsënöpam rasumpa kaq yachatsikïkunata musyariyarqan, Diospa jutimpaq, Gobiernumpaq, nunakunapaq y Patsapaq Dios imata munanqampaq, wanur mëchö këkäyanqanta y wanushqakuna kawariyämunampaq kaqta (Juan 8:31, 32).

1879 wata witsampaqnam, cuentata qokuriyarqan rasumpa kaqta më tsëpa willakuyänan tiempuna kanqanta. Tsë watallachömi jorqamur qallayarqan kananyaq yarqëkämoq Täpakoq. Jehovä Diospa Gobiernumpita Willakoq revista. Kanan witsanqa 240 nacionkunachö y 750 idiömachönömi Diospita yachatsikïkäyä. ¡Manam ni imëpis më tsëman kanannöqa rasun kaq yachatsikï chashqatsu!

• ¿Imataq pasarqan rasumpa kaq yachatsikïwan Cristu wanuriptin?

• ¿Imanötaq musyakarqan Diospa Palabrampita rasun kaq yachatsikï?

Atska watapam Testïgunkunaqa tukïläya Bibliakunata imprimiyarqä, utilisäyarqä y yachakï munaqkunata dejapuyarqä. Peru tiempuwannam alli yachatsikoq Bibliatana necesitäyarqä, “rasonpa caq yachatsiquicunata” fäcil-lla nunakuna (runakuna) yachakuyänampaq, y tsëtam Diosnintsikqa llapampaq munan (1 Timoteu 2:3, 4). Tsëmi 1950 watachö pï mëpis raslla entiendiyänampaq ingleschö Traducción del Nuevo Mundo nishqan Bibliata wakinta rurar qallayarqä, y tsëtam original kaqtanölla 130 idiömapitapis masman tikratsiyashqa.a

Fäcil-lla entiendina Bibliatam necesitäyarqä. Idiömakunaqa tiempu pasanqanmannömi cambiarëkan, y atska Bibliakunam ni pï manana parlanqan palabrakunawan qellqaran, tsëmi alläpa sasa (aja) entiendinan. Jina qepallataran tariyashqa punta original kaq qellqayanqankunata, tsëmi yanapakun hebrëu, arameo y griëgu idiömakunachö Bibliata entiendinapaq.

Diospita rasumpa kaq yachatsikoq Bibliatam necesitäyarqä. Bibliata juk idiömaman tikratseqkunaqa manam pensayanqanmannötsu Dios qellqatsinqan palabranta tikratsiyänan, original kaq ninqantanöllam rurayänan. Tsënö kaptimpis, atska Bibliakunamanmi Diospa jutin Jehoväta churayashqatsu.

Diosta alabaq Bibliatam necesitäyarqä (2 Samuel 23:2). Traducción del Nuevo Mundo nishqan Bibliachöqa qellqayanqan originalchö yurinqannöllam cäsi qanchis waranqa textukunaman Diospa jutinta churayashqa, y tsëtam ura kuchu fötuchö rikanki (Salmu 83:18). Y atska watapa alli estudiëkur rurayämunqan kë Bibliatam, Diospa pensëninta yachatsikuptin kushishqa leyintsik. Traducción del Nuevo Mundo nishqan Biblia idiömëkichö kapushuptiki o mana kapushuptikipis, Diospa Palabranta llapan junaqkuna leinëkipaqmi niriyaq (Josuë 1:8; Salmu 1:2, 3).

• ¿Imanirtaq necesitäyarqä Traducción del Nuevo Mundo nishqan Bibliata?

• ¿Imatataq llapan junaqkuna rurayanman Diospa munënimpita musyëta munaqkunaqa?