Rasumpa kaqta mana yachatsiyaptin y shumaq kawayänampaq mana yanapayaptinmi atskaq nunakuna (runakuna) iglesiankunaman ëwayannatsu. Tsëqa, ¿imanirtaq Jehoväpa testïgunkunapa reunionninkunaman ëwankiman? ¿Imachöraq yanapayäshunki?

Kushikïpaqmi kuyakoqkunawan juntarëqa. Punta cristiänukunapa tiempunchöqa atska congregacionkunam kayarqan, Diosta adorayänampaq, Bibliata estudiayänampaq y yanapanakuyänampaqmi juntakäyaq (Hebrëus 10:24, 25). Diosta sirweq cristiänu mayinkunawan juntakarmi familiankunawannö sientikuyaq (2 Tesalonicenses 1:3; 3 Juan 14). Kanan witsan reunionnïkunapis tsënöllam, y pëkunanöllam alläpa kushishqa sientikuyä.

Bibliapa musyatsikïninkunata rurëqa alläpam yanapakun. Biblia ninqannömi unë tiempuchöqa Diospa markan juntakäyaq pëpita yachakuyänampaq, tsënöllam kanan witsanqa ollqupis, warmipis, wamrapis juntakäyä Biblia ninqanta kawënïkunachö imanöpis rurayänärëkur alli maestrukuna yachatsikuyanqanta wiyakuyänäpaq (Deuteronomiu 31:12; Nehemïas 8:8). Llapan tsëchö këkaqkunam tapukïkunawan respuestakuna kaptin parlakuriyan y canticutapis cantëta puëdiyan, tsënöpam cada ünu rikätsikuyan Dios ruramunampaq kaqman creiyanqanta (Hebrëus 10:23).

Diosman mas markäkunapaqmi (yärakunapaqmi) yanapakun. Apostol Pablum tiempunchö juk congregacionman kënö cartakurqan: “Allapam munecü shamur [...] Jesusman marcäquinintsiccho mas callpata qonacur jucnintsic jucnintsic yanapanacu[napaq]” (Romänus 1:11, 12). Reunionkunachö cristiänu mayïkunawan shumaq parlakuriyanqämi markäkïnïkunata alliyätsin y tsëmi yanapayäman alli cristiänu kayänäpaq.

¿Imanirtaq sharamunkitsu reunionnïkunaman imanöpis kayanqäta rikänëkipaq? Shumaqmi chaskiriyashqëki. Y manam qellëta mañakuyätsu.

• ¿Imanötaq reunionnïkunaqa?

• ¿Imakunachötaq reunionkuna yanapakun?

Mëläya feyu nänita y karuta, achachëta o tamyata ëwayänä kaptimpis, Testïgukunaqa manam reunionnïkunaman ëwëta jaqiyätsu. ¿Imanirtaq cristiänu mayïkunawan juntakëta precisaqpaq churayä mana allikunapa pasëkar o trabäjuwan utishqa këkarpis?

Shumaq kawayänäpaqmi yanapayäman. Reunionkunaman ëwë alläpa precisanqampaq parlarmi, apostol Pablu “jucnintsic jucnintsic yanapanacur” këkäshun nirqan (Hebrëus 10:24). Yanapakushun ninanqa “wakinkunapaq yarpachakïmi”. Këchöqa apostol Pablu nikan cristiänu pura mas reqinakunapaq y wakinkunapaqpis yarpachakunapaqmi. Congregacionchö wakin cristiänukunata mas reqirmi cuentata qokuriyä, wakinkunapis noqakunanölla tukï problëmakunata pasar imanö venciyanqanta y tsëta musyëmi alläpa yanapayäman.

Imëpis kuyanakuyänäpaqmi yanapakun. Reunionkunachöqa manam reqinakushqäkunallawantsu kayä, sinöqa rasumpa alli amïgukunawanmi. Jina höraqa kushikuyänäpaqmi imëkata rurar juntakäriyä. ¿Imachötaq yanapayäman tsënö juntakäriyanqä? Mas kuyanakuyänäpaqmi. Tsëmi cristiänu mayïkuna ima problëmakunapapis pasayaptinqa alläpa kuyanakurnin ras yanapariyä (Proverbius 17:17). Congregacionchö llapankunawan alli amïgu karmi rikätsikuyä ‘jucnïcuna jucnïcuna shumaq yanapanaquïta’ munayanqäta (1 Corintios 12:25, 26).

Allichi Diospa munëninta rurëkaqkunallata amïgu kayänëkipaq ashinkiman. Y Jehoväpa testïgunkunachömi tsënö alli amïgutaqa tarinki. Noqakunawan juntakänëkita imapis michäshunëkita ama jaqitsu.

• ¿Imanirtaq alläpa alli cristiänu mayïkunawan juntakäyanqä?

• ¿Imëraq congregacionnïkunata reqinëkipaq shamunkiman?

Punta cristiänukunapa tiempunchöqa, reunionkunachö canticukunatam cantayaq, Diosmanmi mañakuyaq, Bibliata leyiyaq, yachakuyaq, y manam nunakunapa (runakunapa) costumbrinkunata qatiyaqtsu (1 Corintios 14:26). Reunionnïkunaman shamurqa unë tiempuchö rurayanqantanöllam rikanki.

Bibliapita precisaq yachatsikïkunatam yachatsikäyämun. Semäna ushëkunam cada congregacion juntakäyan 30 minütullachö yachakunapaq discursuta wiyayänampaq, y tsëchöqa yachatsikayämun kawënintsikchö Biblia imanö yanapakunqanta y imanö tiempukunachö kawanqantsiktam. Y tsëchöqa Bibliäkunachö textuta leyir qatiyänäpaqmi niyämun. Tsëpitanam, Täpakoqpita Yachakunapaq reunion qallarin, y juk höram duran, tsëchöqa llapäkunam parlakurita puëdiyä. Kë revistam tukïnöpa yanapakun Diospa Palabran ninqanta kawënïkunachö rurayänäpaq. Jinantin Patsachö 110.000 mas congregacionkunaqa tsë yachatsikïllatam llapäkuna igual yachakuyä.

Mas alli yachatsikoq kayänäpaq yanapakïkuna. Jina semänachömi juntakäyä kimaman rakishqa reunionpaq y jutinqa, Cristiänunö Kawakunapaq y Yachatsikunapaq neqmi, këqa cada killa yarqamoq Reunionchö Yachakunapaq kaqpitam. Reunionqa qallan, “Örutanö Bibliachö ashinapaq” neqwanmi, këmi yanapamantsik Bibliata mas reqinapaq; y tsëtaqa puntallapitanam cristiänukuna leiyashqa. Tsëpitanam, “Mas alli yachatsikoq kanapaq” nishqanchö demostracionkunata rurayämun nunakunata Bibliawan imanö yachatsinapaq, y kë yachatsikïta dirigimoq wawqinam alli leiyänäpaq y demostracionkunata mas alli rurayänäpaq yanapayäman y escuëlata dirigeqnam discursaqkunata yanapayäman alli leyiyänäpaq y mas alli discursukunata rurayänäpaq (1 Timoteu 4:13). Y “Dios munanqannö kawanapaq” neqchönam, Bibliapita yachakuyanqäkunata kawënïkunachö imanö rurayänäpaq kaqta yachakuyä. Këchöqa, tapukïkunawan y respuestakunawanmi Bibliapita maslla yachakuyä.

Reunionnïkunaman ëwarqa alläpam gustarinki Bibliapita alläpa alli y shumaq yachatsikayämunqanta rikar (Isaïas 54:13).

• ¿Imatataq rikanki Jehoväpa testïgunkunapa reunionninkunaman ëwarqa?

• ¿Mëqan reunionnïkunamantaq puntata shamïta munankiman?

¿Rikankiku kë follëtuchö Jehoväpa testïgunkuna shumaq vistishqa reunionnïkunaman ëwëkäyanqäta? ¿Imanirtaq alläpa precisan shumaq vistishqa y limpiu kayänä?

Diosnintsikta respetarmi. Rasun kaqchöqa, Diosnintsikqa manam janampa shumaq kanqanllapitatsu pitapis kuyan (1 Samuel 16:7). Tsënö kaptimpis, shumaq vistishqa Diosta adorayänäpaq juntakarqa, pëta y cristiänu mayïkunata respetayanqätam rikätsikuyä. Këman pensarishun, juk juezwan parlëta munarqa, ¿manatsuraq carguyoq kanqanta respetar shumaq vistishqa y limpiu ëwashwan? Tsënö kaqllam reunionkunaman shumaq vistishqa y limpiu ëwarqa ‘llapan patsapa Jueznin’ Jehovä Diosta y Yachatsikuyänan Wayita respetëkäyanqäta rikätsikuyä (Genesis 18:25).

Yachakuyanqänö kawayanqäta rikätsikuyänäpaqmi. Bibliaqa cristiänukunata consejan, “sensillullata y normalllata” vistikuyänampaqmi (1 Timoteu 2:9, 10). “Sensillullata” vistikïqa, qarantsik rikakïkaq röpakunawan mana vistikïmi. Y “normalllata” alli juiciuwan vistikïqa yanapakun lluta, y feyu röpakunawan mana vistikunapaqmi. Bibliapa kë musyatsikïninkunam yanapakun shumaq vistikunapaq kikintsik röpantsik alli akranapaq. Shumaq vistikushqam “nunacuna musyayanqa salbamaqnintsic Diospa yachatsiquinin imano shumaq cashqanta” y tsënöpam shumaq vistikïnintsikwan Diosnintsikta alabëkäshun (Tïtu 2:10; 1 Pëdru 2:12). Reunionkunaman shumaq y alli vistishqa ëwanqantsikta rikarmi, nunakuna (runakuna) allita parlayanqa Diospa markampaq.

Limpiu y alli vistishqa kanapaqqa, manam alläpa chaniyoq ni mushoq röpawanraqtsu vistikunantsik. Roparëkurqa ama qelanëtsu reunionkunaman ëwëta.

• ¿Imanirtaq alläpa precisan shumaq vistishqa Diosta adoraq ëwayänä?

• ¿Bibliapa ima musyatsikïninkunataq yanapayäman röpata alli akrayänäpaq?

Jehoväpa testïgunwan Bibliapita yachakïkarqa puntallapitanachi yachakuyänëkipaq kaqta preparakunki. Jina tsënöllam reunionkunachö mas yachakunëkipaqpis puntallapitana preparakunëki. Juk horariuta ruranqëkim yanapashunki mas yachakunëkipaqqa.

Mëchö y imë höra preparakunëkipaq kaqta rikë. ¿Imë hörataq mas yachakïta puëdinkiman? ¿Tempränulla manaraq trabäjöman ëwar, tardikunapa o wamrakuna punukäriyaptinku? Jina mana alläpa tiempïki kaptimpis, ichikllatapis tiempïkitaqa rakiri yachakunëkipaq y ama dejëtsu imapis michäshunëkita. Mana alläpa bülla kanan sitiuta ashi y upiratsi radiuta, televisionta y telëfonutapis. Estudiar manaraq qallar mañakunqëkim yanapashunki llapan yarpachakïnikikunata qonqarinëkipaq y Diospa Palabranllaman mas pensanëkipaq (Filipensis 4:6, 7).

Precisaq kaqllata markë y parlakurinëkipaq alistakï. Puntataqa yarpachakï imapita yachakunëkipaq kaqman. Y rikäri yachakunëkipaq kaqpa tïtulunta o capïtulunta, y cada subtïtulu yachakunëkipaq kaqwan imanö igualanqanta rikäri, jina tsënölla rurë fötukunawan dibüjukunawampis, y tsëpitana precisaq yachatsikïkunata rikätsikoq tapukïkuna leyiri. Y tsëpitana cada pärrafuta leyi, y tapukïninkunapa respuestanta ashi. Yurimoq textukunata leyi, y yachakïkanqëkita imanö yanapanqanta rikë (Hëchus 17:11). Respuestanta taririrqa, marcari juk o ishkë palabrakunallatapis yarpätsishunëkipaq. Tsënöpam reunionkunachö munarqa makikita pallarirkur o joqarkur ichikllatapis parlakurinki.

Reunionkunachö cada semäna tukïpita yachakunqëkim, Bibliapita mas yachakunëkipaq yanapashunki (Mateu 13:51, 52).

• ¿Imanöraq juk alli horariuta rurankiman preparakunëkipaq?

• ¿Imanötaq preparakunkiman reunionkunachö parlakurinëkipaq?

Unë tiempupita patsëmi, Jehoväqa munashqa familiakuna juk rätullapis juntu kayänanta, pëpa kaqchö mas poquyänampaq, y mas kuyanakuyänampaq (Deuteronomiu 6:6, 7). Tsënöpam, Jehoväpa testïgun familiakunaqa semänachö tiemputa jorqayä Diosta adorayänäpaq y necesitäyanqämannö yachakuyänäpaq. Soltëru kaqkunapis tsë hörachöqa Diosta adorëta puëdiyanmi pëpita mas yachakur.

Jehoväman mas witinapaqmi yanapakun. “Dios Yayata mas cuyarnin payman witiyay, paypis mas llaquiyäshurniqui gamcunaman mas witimunanpag” (Santiägu 4:8, NTCN). Jehovä imanö kanqanta, y rurëninkunapitaqa mas yachakuntsik Palabran Bibliachömi. Familiachö Diosta adorëta fäcil-lla qallanëkipaqqa, Bibliatam leyinkiman, quizä tsëpaqqa qatinkiman Yachatsikunapaq Diospa Escuëlanchö progrämata. Cada ünum Bibliata wallka wallkallatapis leyiriyanman, nïkurnam yachakuyanqampita llapankuna parlakuriyanman.

Familiachö mas kuyanakunapaqmi yanapakun. Casädukuna, teytakuna y wamrakunaqa masmi kuyanakuyan Bibliata juntu estudiar. Llapantsik shuyaranqantsik y kushikïpaq Familiachö Diosta Adorana Höram kanman. Quizä tsëpaqqa, Täpakoq y ¡Despertad! revistakunapa tëmankunapita o jw.org nishqan päginapita teytakuna akrariyanman wamrankunapa ëdänimpaqnö, quizä colegiuchö ima problëmakunapa pasayänampaq kaqta y imanö altsayänampaq kaqta. O itsa JW Broadcasting (tv.jw.org) vidëtapis rikäriyanman y familiankunawan parlakuriyanman. Jina reunionchö cantanapaq kaq canticukunatapis cantariyanmanmi y usharirnam kushishqa imallatapis mikuriyanman.

Semänachö Diosta adoranapaq tiempökunata rakiyanqäqa yanapayäman Diospa Palabranta familiachö kushishqa yachakuyänäpaqmi, pëqa alläpam bendiciyäman kallpachakuyanqäta (Salmu 1:1-3).

• ¿Imanirtaq semänachö tiempökunata rakiyä familiachö Diosta adorayänäpaq?

• ¿Imatataq teytakuna rurayanman tsë höra shumaq kanampaq?

¿Rikankiku këchö kushishqa këkaqkunata? Asamblëäkunaman ëwaqkunam kayan. Jehoväqa unë tiempuchö sirweqninkunata nirqan watachö kima kuti juntakäyänampaqmi, tsënöllam noqakunapis alläpa kushikuyä asamblëäkunachö atskaq juntakar (Deuteronomiu 16:16). Tsëmi, watachö kima asamblëakunata rurayä: juk junaq kaq asamblëata ishkë kuti, y kima junaq jatun asamblëata. ¿Imachötaq yanapayäman?

Cristiänu mayïkunawan mas kuyanakuyänäpaqmi yanapakun. Israelïtakunaqa alläpam kushikuyarqan ‘atskaq juntakashqachö’ Jehoväta alabarnin, noqakunapis tsënöllam alläpa kushikuyä atskaq cristiänu mayïkunawan juntu Jehoväta adorarnin (Salmu 26:12; 111:1). Tsënö reunionkunam yanapayäman juk congregacionpita y hasta juk nacionpita Testïgukunawan reqinakuyänäpaq. Pullan junaqnam llapäkuna tsë localchö juntu mikuyä, tsëmi yanapayäman mas reqinakuyänäpaq y kuyanakuyänäpaq (Hëchus 2:42). Tsëchömi rikäyä entëru Patsachö “Diosman creyicoq” cristiänu mayïkunawan alläpa kuyanakuyanqäta (1 Pëdru 2:17).

Diospa kaqchö mas poquyänäpaqmi yanapakun. Diospa Palabranta ‘yachatsir entienditsiyanqanqa’ israelïtakunata alläpam yanaparqan (Nehemïas 8:8, 12). Noqakunapis alläpam estimayä asamblëakunachö yachatsikayämunqankunata. Llapan yachatsikïkunapis Bibliallapitam. Shumaq discursukunawan y demostracionkunawanmi yachatsiyäman Diospa munëninta imanö rurayänäpaqpis. Jina kë mana alli tiempukunachö cristiänu mayïkuna problëmankunata imanö venciyanqampita willakarayämunqanmi alläpa yanapayäman. Jinamampis, jatun asamblëakunachöqa Bibliapitam shumaq yachatsikayämun, actuacionkunata rurar unë tiempuchö vistikuyanqan röpakunawannö. Llapan asamblëakunachömi Diosta sirwita munaqkunaqa bautisakuyan.

• ¿Imanirtaq asamblëakunaqa alläpa kushikïpaq?

• ¿Imanöraq yanapashunkiman mëqan asamblëäkunallamampis ëwanqëki?

Manaraq wanurmi Jesusqa kënö nirqan: “Llapan nunacunata alli willaquinïta willayänequi[m] presisan; tsenopa nunacuna Diospa mandaquininman yecuyänanpaq, y jinantin [entëru] nasioncunacho tse alli willaquita musyariyaptinnam, que patsapa ushenin chäramonqa” (Mateu 24:14). ¿Imanöraq entëru Patsachö yachatsikuyanman karqan? Jesus Patsachö këkar ruranqannölla rurarmi (Lücas 8:1).

Wayinkunamanmi nunakunata watukayä. Jesusqa alli willakïta wayin wayin yachatsikuyänampaqmi discïpulunkunata yachatsirqan (Mateu 10:11-13; Hëchus 5:42; 20:20). Kë punta yachatsikoqkunataqa mëyaq yachatsikuyänampaq kaqtapis Jesus willarqanmi (Mateu 10:5, 6; 2 Corintios 10:13). Tsënöllam kanan witsampis yachatsikuyänäpaq alli churanakushqa këkäyä, y cada congregacionpam mëyaq yachatsikuyänampaq territoriunkuna kan. Tsënöpam Jesus mandayämanqan yachatsikïta “maytsaychö” nunakunata (runakunata) yachatsir cumplikäyä (Hëchus 10:42, NTCN).

Më tsëchö taräyanqanmanmi chëta procurayä. Jesusqa yachatsikurqan nunakuna kayanqanchömi, lamar kuchunkunachö o pösupita yakuta jorqayänankunachö (Marcus 4:1; Juan 4:5-15). Noqakunapis tsënöllam Bibliapita më tsëchö yachatsikuyä: cällikunachö, rantikuyanqankunachö, parquikunachö o telëfonupapis. Jina Diosman creiyanqäpita yachatsiyämi vecïnökunata, trabajaq y estudiaq mayïkunata y kastäkunatapis. Tsënöpam “salvakuyänampaq alli willakïta” më tsëman chätsiyashqä (Salmu 96:2).

Pillatapis Diospa Gobiernumpita willarinëkipaq y shamoq tiempuchö imanö yanapanampaq kaqman pensari. Kë alli willakïta ama kikikillapaqqa pakarätsitsu. Sinöqa pï mëtapis willari.

• ¿Ima ‘alli willaquitataq’ yachatsikunantsik?

• ¿Imanötaq Jehoväpa testïgunkunaqa Jesusnölla yachatsikïkäyä?

Juk precursorqa imëka pipis mana chänanman näni kichaq cuentam yachatsikïchö puntachö këkan y tsënöpa wakinkunapis qatiyänampaq. Jesuspis precursormi karqan, y Patsamanmi Teytan kachamurqan alli willakïta yachatsikunampaq, y salvamänapaq nänita kichanampaq (Mateu 20:28). Kanampis pë ruranqannöllam rurëkäyä y llapan tiempökunawanmi nunakunata yanapayä Diospita yachakuyänampaq (Mateu 28:19, 20). Wakinkunaqa precursor kayänampaqmi churapakäyashqa.

Llapan tiempunwan Diosta sirweq. Jehoväpa testïgunkunaqa llapämi alli willakïta yachatsikuyä. Tsënö kaptimpis wakinkunaqa precursor regular kayänampaqmi churapakäyashqa, tsënöpa killachö 70 höra yachatsikuyänampaq. Tsërëkurmi wakinkunaqa pullan junaqyaqlla trabajayan. Wakinkunanam precursor especial kayanampaq akrashqa kayan, y yachatsikoqkunata necesitäyanqan markakunamanmi mandayan, pëkunaqa 130 höra o masmi killachö yachatsikur kayan. Precursorkunaqa sencïllullam kawayan y Jehovä yanapanampaq kaqmanmi markäkuyan (yärakuyan) (Mateu 6:31-33; 1 Timoteu 6:6-8). Peru killachö 70 o 130 höra yachatsikïta mana puëdeqkunaqa, precursor auxiliar këtam puëdiyan, pëkunaqa 30 o 50 höram killachö yachatsikuyan.

Precursorqa Diosta y nuna mayinkunatam kuyan. Jesusnöllam cuentata qokuyä Diospa kaqchö nunakuna alläpa mana alli kawëkäyanqanta (Marcus 6:34). Peru musyayämi shamoq tiempuchö Dios ruramunampaq kaqta musyayanqan yanapanampaq kaqta. Precursortaqa yanapan nuna mayinta kuyanqanmi llapan tiempunwan y kallpanwan Diospita yachatsinampaq (Mateu 22:39; 1 Tesalonicenses 2:8). Tsënö alli yanapakoq kanqanmi yanapan Diosta kuyar kushishqa kawanampaq y markäkïnin (yärakuynin) mas alliyänampaq (Hëchus 20:35).

• ¿Imataq juk precursorqa?

• ¿Imanirtaq wakinkunaqa llapan tiempunkunawan yachatsikuyan?

Diospita yachatsikuyänampaq escuëlakunata patsätsiyanqampitam Jehoväpa testïgunkunaqa unëpitana reqishqa kayan. Tsë escuëlakunaqa, llapan tiempunkunawan Diospita yachatsikoq cristiänukunatam “mas alleq” yachatsikuyänampaq yanapan (2 Timoteu 4:5).

Precursorkunapaq Escuëla. Juk watana precursor regular këkaq cristiänukunaqa, Yachatsikuyänan Wayichö joqta junaqpa rurayanqan escuëlamanmi ëwëta puëdiyan. Tsë escuëlaqa precursorkunata yanapan, Jehoväman mas witiyänampaq, mas alli yachatsikoq kayänampaq, y precursor këchö alli tsarakuyänampaqmi.

Diospa Gobiernumpita Yachatsikoqkunapaq Escuëla. Kë ishkë killa duraq escuëlaqa, yachatsikoqkunata wanayanqan sitiukunaman yanapakoq ëwayänampaq listu këkaq y unëna sirweq precursorkuna mas yanapakïta chaskiyänampaqmi. Pëkunaqa, patsachö kawashqa alli yachatsikoq Cristunömi, “¡këchömi noqa këkä! Noqata kachamë” niyan (Isaïas 6:8; Juan 7:29). Karupa yanapakoq ëwarqa itsa kayäpunqanllawan kawakïta yachakuyänan precisanqa. Itsa tsëchö nunakunapa costumbrinkuna, mikïninkuna y maskunapis jukläyana kanqa. Jina höraqa itsa juk idiöma parlëta yachakuyänampis precisanqa. Tsë escuëlamanqa 23-65 watayoq soltëru ollqukuna y warmikuna y casädukunam ëwëta puëdiyan. Tsëchöqa yanapakoq ëwayanqanchö alli yanapakuyänampaq y Jehoväpa markanchö masta rurayänampaqmi atska yanapakïta chaskiyan.

Escuela Bíblica de Galaad de la Watchtower. Hebrëu idiömachö “Galaad” palabraqa, “willakoq” ninanmi. 1943 watachö tsë escuëla qallanqampitaqa, puwaq waranqapitapis mas cristiänukunatam misionërunö yanapakur “jinantin mundu cuchunyaq” yachatsikïta chätsiyänampaq mandayashqa (Hëchus 13:47). Perüman misionërukuna chäyänan witsanqa, manam ni juk congregacion karqantsu. Peru kananqa, waranqa congregacionpitapis masnam kan. Y Japonman misionërukuna chäyänan witsanqa, chunkaqnöllam Testïgukuna kayarqan. Peru kananqa, 200.000 Testïgukunapitapis masnam kayan. Tsë escuëlachöqa pitsqa killapam Diospa Palabrampita y maskunapita alli yachakuyan. Y tsëmanqa, Diospa kaqta rurëchö alli yanapakuyänampaq yachatsikïkunata chaskeqmi precursor especialkuna, Galaad escuëlaman manaraq ëwashqa misionërukuna, sucursalchö yanapakoqkuna y congregacionkunata watukar pureq cristiänukuna ëwëta puëdiyan.

• ¿Imapaqtaq precursorkunapaq escuëla?

• ¿Pikunapaqtaq Diospa Gobiernumpita Yachatsikoqkunapaq Escuëla?