¿Imatataq llapantsikpaq Diosnintsik munan?

IMËKA mana alli rurëkunata, guërrakunata, terrorismuta y tsënö mana alli noticiakunatam rikantsik o wiyantsik radiuchö, televisionchö, periödicuchö y Internetchö. Y itsachi qampis pasëpa qeshyapäkïkanki o pïnikipis wanukushqa kaptin alläpa sufrikanki.

Y itsapis yarpachakur kënö ninki:

• ¿Tsë llapampa pasayänätatsuraq Dios munan?

• ¿Pillaraq problëmäkunachö shumaq yanapëkamanman?

• ¿Imëllapis Patsachö yamë kawakï kanqatsuraq?

Kënö tapukïkunapa respuestantaqa Bibliachömi tarinki.

IMËKA ALLIKUNATA DIOSNINTSIK RURAMUNAMPAQ KAQTAM BIBLIAQA NIN.

• Manam ni pipis nanatsikunqanatsu, edäyanqanatsu ni wanunqanatsu (Revelacion [Apocalipsis] 21:4).

• “Cöjukunapis luychunöran cörriyanqa” (Isaïas 35:6).

• “Wiskukunapa nawinkunam kichakärinqa” (Isaïas 35:5).

• Wanushqakunam kawariyämunqa (Juan 5:28, 29).

• Manam pipis qeshyanqanatsu (Isaïas 33:24).

• Manam mallaqë kanqanatsu (Salmus 72:16).

  

BIBLIAQA SHUMAQMI YANAPASHUNKI

Itsa kë librupa qallanan päginankunachö leyinqëkiqa mana creipaqnö kanman. Peru rasumpam kanqa, porqui Bibliam yachatsimantsik tsëkunata Diosnintsik ruramunampaq kaqta.

Y kanan witsankuna kushishqa kawakunapaqpis Bibliaqa yanapamantsikmi. Itsachi familiëkichö problëmakuna kaptin, qellë pishiptin o alläpa qeshyapäkurnin yarpachakur këkanki. O itsachi pïnikipis wanushqa kaptin alläpa llakishqa këkanki. Tsëqa Bibliapita yachakunqëkim yanapashunki, y mas kushishqam kawakunki, porqui kënö tapukïkunapitam yachakunki:

• ¿Imanirtaq sufrintsik?

• ¿Imatataq rurashwan problëmakunapa pasarnin?

• ¿Imatataq rurashwan familiantsikwan kushishqa kawakunapaq?

• ¿Mëtataq wanurir ëwantsik?

• ¿Imëllapis wanushqakuna kawariyämunqatsuraq?

• ¿Imanirtaq confiakushwan Diosnintsik imëka allikunata ruramunampaq kaqman?

Kë libruta leyikanqëkim rikätsikun Biblia imata yachatsikunqanta musyëta munanqëkita. Y shumaq yachakunëkipaqmi kë libruqa yanapashunki. Cada pärrafupa tapukïninkunam yanapashunki Bibliata mas alleq entiendinëkipaq. Waranqëpayan nunakunam Jehoväpa testïgunkunawan Bibliapita shumaq yachakuyashqa. Y qampis shumaq yachakurinëkitam munayä. ¡Diosnintsik bendicïkushï Palabran Bibliapita shumaq yachakurinëkipaq!