Diospa Gobiernumpaqmi Bibliachöqa mas willakun. Tsë Gobiernuqa qallananchö Jehovä munanqannöllam kë Patsata juk shumaq huertaman tikratsimunqa. Këchömi yachakunki Diospa Gobiernun ima kanqanta, gobernëkämunqantana, imatana rurashqa kanqanta y ichikllachöna imata ruramunampaq kaqta.

1 KAQ: ¿Imatan Diospa Gobiernun, y pitaq gobernaqnin?

Diospa Gobiernunqa ciëluchömi, y Jehovämi tsë Gobiernuta patsätsishqa. Jesustam tsë Gobiernuchö gobernanampaq churashqa (Mateu 4:17; Juan 18:36). Jesus gobernanampaq kaqta Bibliachö willakurmi kënö nin: “Imëyaqpis gobernanqa, y Gobiernunqa manam imëpis ushakanqatsu” (Lücas 1:32, 33). Diospa Gobiernunchö gobernaq karmi Jesusqa entëru Patsachö nunakunata gobernanqa.

2 KAQ: ¿Pikunawantaq Jesusqa gobernanqa?

Pikunawan Jesus gobernayänampaq kaqta willakurmi Bibliachö kënö nin: ‘Llapan kastapita, idiömapita, markapita y nacionkunapitam gobernayanqa’ (Apocalipsis 5:9, 10). Patsachö Jesus kanqan tiempupitaqa mëtsika millon nunakunam pëpa qateqnin tikrayashqa. Tsënö kaptimpis, 144 mil nunakunallam Jesuswan ciëlupita gobernayämunqa (leyi Apocalipsis 14:1-4). Wakin kaqkunaqa Jesucristu Patsata gobernamuptinmi mana wanurna kawakuyanqa (Salmus 37:29).

3 KAQ: ¿Imanirtan Diospa Gobiernunqa kanan witsan gobiernukunanötsu?

Nunakunaqa munarpis manam atska tiempupa gobernëta o allita rurëta puëdiyantsu, y wakin gobernaqkunanäqa manam nunakunapaq yarpachakuyantsu. Diospa Gobiernunqa manam tsënötsu kanqa, Jesusllam imëyaqpis gobernanqa. Teyta Diosmi “juk gobiernuta churamunqa. Tsë gobiernutaqa manam ni pï ushakätsinqatsu, ni manam pëpa rantin juk markakunapita gobernantikuna gobernayanqatsu” (Daniel 2:44). Jesusqa entëru Patsachö nunakunatam gobernanqa, y llapankunatapis igualpam tratanqa. Pënölla kuyakoq, yachanëpaq y alli ruraq kayänampaqmi llapan nunakunata yachatsinqa (leyi Isaïas 11:9).

4 KAQ: Diospa Gobiernunllanam entëru Patsata gobernanqa

Jesusnöqa manam ni mëqan gobernantipis gobernëta puëdintsu. Leyiyë Mateu 28:18 ima ninqanta y këpaq parlayë:

• ¿Imanirtan Jesusqa wakin gobernantikunapita mas puëdeq?

Kanan witsan gobernaqkunaqa wallka tiempullapam gobernayan. Manam entëru Patsatatsu gobernayan, sinöqa markankunata o nacionninkunallatam. Peru Diospa Gobiernunqa manam tsënötsu kanqa. Leyiyë Daniel 7:14 ima ninqanta y këkunapaq parlayë:

• ¿Imanirtan alli kanqa Diospa Gobiernunllana imëyaqpis gobernanqan?

• ¿Imanirtan alli kanqa Diospa Gobiernunllana entëru Patsata gobernanqan?

5 KAQ: Llapan gobiernukunam ushakäyanqa

¿Imanirtan necesitantsik Diosnintsikpa Gobiernun nunakunata gobernananta? VIDEUTA rikäyë y këpaq parlayë:

VIDEU: ¿Imatan Diospa Gobiernun? (wakin kaqlla) (1:41)

• Nunakuna gobernarnin, ¿ima mana allikunatataq rurayashqa?

Leyiyë Eclesiastes 8:9 ima ninqanta y këpaq parlayë:

• ¿Imanirtan necesitantsik Diospa Gobiernun nunakunata gobernananta?

6 KAQ: Diospa Gobiernunchö gobernaqkunaqa musyayanmi imakunapa pasanqantsikta

Jesusqa Patsachö kawashqa karmi imakunapa pasanqantsikta y imanö sientikunqantsikta alli musyan (Hebrëus 4:15). Jehoväqa ‘llapan kastakunapita, idiömakunapita, markakunapita y nacionkunapitam’ 144 mil nunakunata akrashqa Jesuswan gobernayänampaq (Apocalipsis 5:9).

• Diospa Gobiernunchö gobernamoqpaq kaqkuna imakunapa pasanqantsikta entiendiyanqanta musyarnin, ¿imanötan sientikunki? ¿Imanir?

7 KAQ: Diospa Gobiernumpa leyninkunaqa manam nunakunapa leyninkunanötsu

Gobiernukunaqa nunakunata cuidayänampaq y yanapayänampaqmi leykunata patsätsiyan. Diospa Gobiernunchö kawaqkunapaqpis leykuna kanmi, y llapankunam cumpliyänan. Leyiyë 1 Corintius 6:9-11 y ima ninqanta y këkunapaq parlayë:

• Jehovä mandakunqan leykunata llapankuna cäsukuyaptinqa, ¿imanöraq nunakuna kawakuyanqa?a

• Jehoväpa Gobiernunchö kawaqpaq kaqkunaqa, ¿imanirtan leyninkunata cäsukuyänan?

• ¿Imanötan musyantsik Jehovä mandakunqankunata mana cäsukoqkunapis cambiëta puëdiyanqanta? (Rikë 11 kaq versïculuta).

KËTAM YACHAKURQUNKI

Diospa Gobiernunqa ciëluchömi, y entëru Patsachö nunakunatam gobernanqa.

¿Yarpankiku?

• ¿Pikunatan Diospa Gobiernunchö gobernayanqa?

• ¿Imanirtan Diospa Gobiernunwanqa ni mëqan gobiernupis igualantsu?

• Gobiernunchö kawaqpaq kaqkuna, ¿imanö kayänantataq Jehovä munan?

MASTA YACHAKUY

Diospa Gobiernun mëchö kanampaq kaqta Jesus yachatsikunqanta leyï.

“¿Diospa Gobiernunqa shonquntsikchöku këkan?” (jw.org päginachö yarqamoq)

¿Imanirtan Jehoväpa testïgunkunaqa kanan witsan gobiernukunata cäsukurpis, Diospa Gobiernunta mas cäsukuyan?

Diospa Gobiernuntam cäsukuyarqan (1:43)

Jesuswan gobernayämunampaq Jehovä akranqan 144 mil nunakunapaq Bibliachö ima ninqanta yachakuy.

“¿Pikunatan ciëluta ëwayanqa?” (jw.org päginachö yarqamoq)

¿Imatan carcelchö këkaq juk warmita yanaparqan Diospa Gobiernunllachö nunakuna alli kawakuyänampaq kaqta creinampaq?

“Entëru Patsachö justicia kanapaq kaqtam yachakurqä” (¡Musyatsikoq!, noviembri 2011)

Diospa Gobiernunqa 1914 watachömi ciëluchö gobernar qallarqan, y tsë watapitaqa llapan gobiernukunam ushakäyänan tiempuchöna këkäyan. Peru, ¿imanötan musyantsik 1914 watachö Diospa Gobiernun gobernar qallanqanta? Këchömi yachakunki tsë watapaq Bibliachö imata willakunqanta, y tsë watapita kananyaq entëru Patsachö imakuna pasakunqanta y nunakuna imanö portakuyanqanta.

1 KAQ: ¿Imatataq Bibliachö willakurqan?

Daniel libruchöqa willakurqannam “qanchis tiempukuna” pasariptin Diospa gobiernun gobernar qallanampaq kaqta (Daniel 4:16, 17, nöta). Tsë qanchis tiempukunapaqmi Jesusqa “nacionkunapaq dispunishqa tiempu” nirqan, y Patsachö Jesus kawanqan witsanqa manaran tsë “dispunishqan tiempu” ushashqaraqtsu karqan (Lücas 21:24). Tsë “qanchis tiempukuna” o “dispunishqa tiempuqa” 1914 watachömi usharqan.

2 KAQ: 1914 watapitaqa, ¿imakunatan pasëkan, y imanötan nunakuna portakuykäyan?

Discïpulunkunam Jesusta kënö tapuyarqan: “¿Imëtan tsëkuna pasanqa, y ima señalta rikartan këkämunqëkitana y ushanan tiempuchöna kawëkäyanqäta musyayäshaq?” (Mateu 24:3). Tsëmi Jesusqa nirqan ciëluchö gobernar qallëkuptin Patsachö guërrakuna kanampaq kaqta, mëtsëchö mikuy pishinampaq kaqta, patsa feyupa kuyunampaq kaqta y maskuna pasanampaq kaqta (leyi Mateu 24:7). Y Bibliachöqa willakurqannam “ushanan tiempuchöqa” nunakuna mas mana alli portakuyaptin ‘mana aguantëpaqnö tiempukuna’ kanampaq kaqta (2 Timoteu 3:1-5). 1914 watapitam imëka mana allikunaqa mas pasakuykan.

3 KAQ: ¿Imanirtan kanan tiempuqa imëka mana allikuna mas pasakuykan?

Jesus gobernar qallëkuptinmi ciëluchö juk guërra karqan. Tsë guërrachömi Jesusqa Satanaswan y demoniunkunawan pelyayarqan. Bibliachömi willakun guërrachö Jesus ganarirnin Satanastawan angelninkunata Patsaman jitarkamunqanta (Apocalipsis 12:9, 10, 12). Satanasqa ichikllachöna ushakänampaq kaqta musyarmi alläpa cölerashqa këkan. Tsëmi entëru Patsachö imëka mana allikunata rurar nunakunata sufrikätsin. ¡Peru Diospa Gobiernunqa ichikllachönam llapan mana allikunata ushakätsinqa!

MASLLA YACHAKUSHUN

4 KAQ: 1914 watachö Jesus gobernar qallanampaq kaqtam Bibliachö willakurqan

VIDEU: 1914 watam ciëluchö Jesus gobernar qallarqan (5:02)

Babiloniata gobernaq Nabucodonosor suëñunqampaqmi Diospa willakoqnin Daniel nirqan Nabucodonosorpa gobiernunchö y Diospa Gobiernunchö cumplikänampaq kaqta (leyiyë Daniel 4:17).a

Leyiyë Daniel 4:20-26 ima ninqanta, tsëpitana cada recuadruchö dibüjukunata rikärir këkunapaq parlayë:

• A) ¿Imatataq Nabucodonosor suëñurqan? (Rikäyë 20 y 21 kaq versïculukunata).

• B) ¿Imatan tsë jatun montita o qeruta pasanan karqan? (Rikäyë 23 kaq versïculuta).

• C) “Qanchis tiempukuna” pasariptin, ¿imatan pasanan karqan? (Rikäyë 26 kaq versïculuta).

Nabucodonosor suëñunqan y Diospa Gobiernun

BIBLIACHÖ WILLAKUNQAN (Daniel 4:20-36)

Gobiernu

A) Jatun monti o qeru

Gobernëta dejan

B) “Qanchis tiempukuna” pasanqanyaq “montita o qeruta mutur ushakätsiyë”

Yapë gobernan

C) “Gobernaq kutinki”

Nabucodonosorpa gobiernunchö cumplikanqan:

• D) ¿Pipa gobiernuntataq tsë jatun monti o qeru rikätsikurqan? (Rikäyë 22 kaq versïculuta).

• E) ¿Imëtan gobernëta dejarqan? (Leyiyë Daniel 4:29-33).

• F) ¿Imatan pasarqan “qanchis tiempukuna” ushariptin? (Leyiyë Daniel 4:34-36).

NABUCODONOSORPA GOBIERNUNCHÖ CUMPLIKANQAN

Gobiernu

D) Babiloniachö gobernaq Nabucodonosor

Gobernëta dejan

E) Nabucodonosorqa 606 wata (J.m.sh.)b pasarinqanllachömi löcu tikrarqan, y qanchis watapam gobernëta dejarqan

Yapë gobernan

F) Juiciunman kutirirmi Nabucodonosorqa yapë gobernarqan

Diospa Gobiernunchö cumplikanqan:

• G) ¿Pikuna gobernayanqantataq tsë jatun monti o qeru rikätsikurqan? (Leyiyë 1 Crönicas 29:23).

• H) ¿Imëtan gobernëta dejayarqan? ¿Imanötan musyantsik Jesus Patsachö kanqan witsan mana gobernayanqanta? (Leyiyë Lücas 21:24).

• I) ¿Mëchötan y imëtan Jesus gobernar qallarqan?

DIOSPA GOBIERNUNCHÖ CUMPLIKANQAN

Gobiernu

G) Israelïta gobernaqkunam Diospa markanta gobernayaq

Gobernëta dejan

H) 607 watam (J.m.sh.) Jerusalenta ushakätsiyarqan, tsëmi israelïta gobernaqkunaqa 2.520 watapa gobernayarqannatsu

Yapë gobernan

I) 1914 watam ciëluchö Jesus gobernar qallarqan

5 KAQ: 1914 watapitaqa imëka mana allikunam mas pasakuykan

VIDEUTA rikäyë.

VIDEU: 1914 watapitaqa imëkam pasakuykan (1:10)

Jesusqa willakurqannam gobernar qallaptin imakuna pasanampaq kaqta. Leyiyë Lücas 21:9-11 ima ninqanta y këpaq parlayë:

• Këchö Jesus willakunqankunapitaqa, ¿imakuna cumplikaqtataq rikarqunki o wiyarqunki?

Apostol Pablupis willakurqanmi ushanan tiempuchö nunakuna imanö portakuyänampaq kaqta. Leyiyë 2 Timoteu 3:1-5 ima ninqanta y këpaq parlayë:

• Kë textuchö ninqannöku, ¿kanan witsan nunakuna portakuyan?

6 KAQ: Jesus gobernëkämunqanta musyanqantsikqa, ¿imata ruranapaqtan yanapamantsik?

Leyiyë Mateu 24:3, 14 ima ninqanta y këkunapaq parlayë:

• ¿Imatan rikätsikun Jesus gobernëkämunqantana?

• ¿Imanötan qampis Diospa Gobiernumpita yachatsikunkiman?

Ichikllachönam entëru Patsata Jesus gobernamunqa. Leyiyë Hebrëus 10:24, 25 ima ninqanta y këpaq parlayë:

• “Dios nunakunata juzganan tiempu” chämunanna këkaptinqa, ¿imatataq llapantsikpis ruranantsik?

KËTAM YACHAKURQUNKI

Bibliachö willakunqan y imëkakuna pasëkanqanmi rikätsimantsik Diospa Gobiernunchö Jesus gobernëkanqantana. Tsë gobiernuman confiakunqantsiktaqa rikätsikuntsik tsë Gobiernupita nunakunata yachatsirnin y reunionkunaman ëwarmi.

¿Yarpankiku?

• ¿Imatan pasarqan Daniel libruchö qanchis tiempukunapaq willakunqan cumpliriptin?

• ¿Imanirtan ninkiman 1914 watachö Diospa Gobiernunchö Jesus gobernar qallanqanta?

• ¿Imanötan pitapis yacharatsinkiman Diospa Gobiernunchö Jesus gobernëkanqantana?

MASTA YACHAKUY

1914 watapita imëka mana allikuna mas pasakunqanta willakuyanqanta leyi.

“Imëka mana allikuna mas miranqan tiempu” (¡Musyatsikoq!, abril 2007)

Mateu 24:14 imanö cumplikanqan juk nunata imanö yanapanqanta leyi.

“Beisbol pukllëmi alläpa gustamaq” (Täpakoq, 3 kaq 2017)

¿Imanirtan nintsik Daniel librupa chusku kaq capïtulunchöqa Diospa Gobiernumpaq parlëkanqanta?

“¿Imëtan Diospa gobiernunchö Jesus gobernar qallarqan? (1 kaq)” (Täpakoq,1 de octubri 2014)

¿Imanirtan nintsik Daniel librupa chusku kaq capïtulunchö ‘qanchis tiempukunapaq’ willakunqan 1914 watachö ushanqanta?

“¿Imëtan Diospa gobiernunchö Jesus gobernar qallarqan? (2 kaq)” (Täpakoq, 1 de noviembri 2014)

Jesusqa ciëluchö gobernëkannam, y ichikllachönam Patsatapis gobernamunqa. Këchömi yachakunki tsë Gobiernu imakunata ruramunampaq kaqta y imanir tsëkuna kushikuypaq kanqanta.

1 KAQ: ¿Imatataq Diospa Gobiernun ruramunqa yamë y alli kawakunapaq?

Armagedon guërrachömi mana alli nunakunata y gobiernukunata Jesus ushakätsinqa (Apocalipsis 16:14, 16). Tsënömi cumplikanqa Diosnintsik Bibliachö kënö änikunqan: “Ichikllanam faltan mana alli nunakuna ushakäyänampaq” (Salmus 37:10). Jesus gobernaptinqa entëru Patsachö nunakunam yamë y alli kawakuyanqa (leyi Isaïas 11:4).

2 KAQ: ¿Imanöraq kanqa Diospa voluntänin Patsachö cumplikäriptin?

Diospa Gobiernunchöqa “Allita ruraq nunakunapaqqa kë patsam herenciankuna kanqa, y tsëchömi imëyaqpis alli kawakuyanqa” (Salmus 37:29). ¡Ima shumaqraq kanqa mana alli nunakuna manana kayaptin, llapan nunakuna kuyanakuyaptin, mana qeshyayaptin y Jehovällata imëyaqpis sirwir kawakuyaptin!

3 KAQ: Mana alli ruraqkunata ushakäratsirqa, ¿imatataq Diospa Gobiernun ruranqa?

Llapan mana alli ruraqkunata ushakäratsirqa waranqa watapam Jesus gobernanqa. Jesusmi 144 mil ciëlupita gobernamoqpaq kaqkunawan llapan nunakunata jutsannaq këman chäyänampaq yanapayanqa. Waranqa wata Jesus gobernar ushariptinmi entëru Patsa juk shumaq huertaman tikranqa. Tsëchömi Jehoväta cäsukoq nunakunaqa kushishqa imëyaqpis kawakuyanqa. Y Jehovällanam llapampa gobernaqnin kanqa, tsënömi Diospa jutinta llapankuna respetayanqa (Mateu 6:9, 10). Llapankunam rikäyanqa Jehovälla alli gobernaq kanqanta. Tsëpitanam Satanasta, demoniukunata y gobiernumpa contran churakaqkunata Jehovä ushakäratsinqa (Apocalipsis 20:7-10). Diosnintsikpa gobiernunchöqa yamë y kushishqam imëyaqpis kawakushun.

MASLLA YACHAKUSHUN

4 KAQ: Diospa Gobiernunqa llapan gobiernukunatam ushakätsinqa

“Nunaqa, nuna mayinta dominarpis kikinllam mana allichö ushan” (Eclesiastes 8:9). Llapan gobiernukuna mana allita rurayanqantam Jehoväpa Gobiernunqa altsamunqa.

Leyiyë Daniel 2:44 y 2 Tesalonicensis 1:6-8 y ima ninqanta y këkunapaq parlayë:

• Jehoväwan Jesusqa, ¿imatataq gobiernukunata y yanapaqninkunata rurayanqa?

• ¿Imanirtan ninkiman Jehoväwan Jesus gobernamurqa llapantapis allillata rurayänampaq kaqta?

5 KAQ: Jesusllam alli gobernaqqa

Jesus gobernarqa imëkatam ruramunqa llapan nunakuna kushishqa kayänampaq. VIDEUCHÖ rikäyë nunakunata yanapanampaq Diospa poderninwan Jesus imëkakunata ruranqanta.

VIDEU: Jesus gobernar imakunata ruramunampaq kaq (1:13)

Jesusqa Patsachö këkar nunakunata yanapanqannöllam gobernarpis ruramunqa. Qateqnin recuadruchömi Jehovä ruramunampaq kaqkunata willakun. Tsëchö änikuykunapitaqa, ¿mëqantan mas gustashunki? Llapan textukunata leyiyë.

6 KAQ: Diospa Gobiernunchöqa kushishqam kawakushun

VIDEU: Ichikllachönam shumaq Patsachö kawakushun (4:38)

Leyiyë Salmus 145:16 ima ninqanta y këpaq parlayë:

• ¿Ima ninkitan llapankunata Jehovä bendicinampaq kaqta musyarnin?

KËTAM YACHAKURQUNKI

Diospa Gobiernunqa Patsatam juk shumaq huertaman tikratsinqa. Tsëchöqa cäsukoq nunakunallam kawayanqa, y Jehovällatanam imëyaqpis sirwiyanqa.

¿Yarpankiku?

• ¿Imatataq Diospa Gobiernunqa ruranqa Jehoväpa jutin respetashqa kanampaq?

• ¿Imanötan musyantsik Diospa Gobiernun Jehovä änikunqankunata cumplimunampaq kaqta?

• Jehovä llapan änikunqampitaqa, ¿mëqan cumplikänantataq mas munanki?

MASTA YACHAKUY

Armagedon guërrapaq Bibliachö ima ninqanta yachakuy.

“¿Imatan Armagedon guërraqa?” (jw.org päginachö yarqamoq)

‘Alläpa sufrimientu’ kanqan witsan imakuna pasanampaq kaqta yachakuy (Mateu 24:21).

Bibliachö alläpa sufrimientu tiempupaq parlarqa, ¿imapaqtan parlëkan? (jw.org päginachö yarqamoq)

Diospa Gobiernunchö kawar imata rurayänampaq kaqman juk familia pensëkanqanta rikë

Shumaq Patsachöna këkanqëkiman pensë (1:50)

Juk nunata Diospita yachakunqan imanö yanapanqanta musyanëkipaq “Imëkata musyëta munarmi yarpachakurqä” neqta leyi.

“Bibliam yanapashqa jukläyana kawakuyänampaq” (Täpakoq, 1 de enëru 2012)