¿Llapan religiontatsuraq Dios chaskin?
Nunakuna niyanqan:
▪ “Llapan religionpis Diosmanmi chätsikun.”
▪ “Ima religionchö karpis, alli kaqta ruranantsikllam masqa precisan.”
Jesus nenqankuna:
▪ “Kichki punkupa yeykuyey; anchum punku, i jayaqmi näni oqrakeyman apaq, i atskaqmi kayan tseypa yeykoqkuna; kichkim punku, i llanum näni kaweyman apaq, i wallkallam kayan tareqkuna.” (Mateo 7:13, 14, QKW.) Rikanqantsiknöpis, Jesusqa manam creirqantsu llapan näni o religión Diosman apakonqanta.
▪ “Atscaq[mi] niyämanqa: ‘Teyta, Teyta, noqacunam jutiquicho yachatsicushqa cayä; jutiquichomi nunacunapita supëcunata qarquyarqä; y jutiquichomi atsca milagrucunatapis rurayarqä’ nir. Tseno niyämaptinnam nishaq: ‘¡Qamcunataqa manam reqiyaqtsu! ¡Llapequi mana alli ruraqcuna, nopapita witicuyë!’” (Mateo 7:22, 23.) Nunakuna Cristutam qatï niyaptimpis manam llapantatsu Jesusqa chaskin.
MËTSIKAQ nunakunam religionninchö yachakuyanqanta y costumbrenkunata alläpa kuyayan. Pero ¿imatataq rurayänan Biblia nenqannö tsë yachatsikïkuna mana kaptenqa? Nunakunapa costumbrenllata qati mana alli kanqantam Jesus rikätsikorqan unë religiösotukoq nunakunata kënö nir: “Tseno yachatsicurmi, Dios mandacushqancunata juc cuchuman churarir, quiquiquicunapa costumbriquicunallata ruraquicayanqui”. Tsëpitanam Dios kënö nenqanta yarpätsikorqan: “Que nunacunaqa shimincunallanwanmi respetamaq tucuyan; Peru shonquncunachoqa manam yarpäyämanpistsu. Nunacunapa costumbrincunallata yachatsicuyaptinmi, adorayämanqanpis sirwintsu” (Mateo 15:1-9; Isaías 29:13).
Tsëpis manam musyanantsikllatsu, ruranqantsik kaqmi masqa precisan. “Tse mana alli yachatsicoqcuna ‘Dioswanmi quecä’ niyanmi; peru rurenincunawanmi musyatsicuyan Dioswan mana rasonpa cayashqanta”, tsënömi Bibliaqa nin wakin nunakunapaq (Titu 1:16). “Diosnintsic munashqanta mana cäsushpa quiquincunapa munenincunallata ruracoq. Allapa relijiosu tucurmi, Diostapis ardella sirweq tucuyanqa; peru rurenincunawanqa Diosnintsicta juc cuchumanmi churariyan” nerqanmi kanan witsampaqpis. Tsëpitanam, “tseno nunacunawanqa ama juntaquïtsu” nerqan (2 Timoteu 3:4, 5).
Tsëpis, manam llapan shonquwan Diosta kuyananllatsu. ¿Imanir? Llapan shonqüwanmi Diospa kaqta rurä nirpis, pë mana gustanqanta rurëkashwanmi. Tsëmi Diosta alliraq reqinantsik (Romanos 10:2, 3). Diosta kushitsita munarqa, rasumpa kaqtam yachakunantsik y Biblia nenqannömi kawanantsik (Mateo 7:21). Tsëmi rasumpa kaq religionqa yanapakun alli kaqta rurayänampaq, rasumpa kaqta musyayänampaq, y shumaq portakoq kayänampaq. Y llapan hunaqkuna Dios munanqanta rurëmi shumaq portakïqa (1 Juan 2:17).
Diospita imata Biblia yachatsikonqanta más musyëta munaptikeqa, Jehoväpa testïgonkunawan devaldilla wayikichö yachakunëkipaqmi niriyaq.
[6 kaq päginachö ninqan]
Rasumpa kaq religionqa yanapakun alli kaqta rurayänampaq, rasumpa kaqta musyayänampaq, y shumaq portakoq kayänampaqmi