Mana alli rurëkunapa qepanchö, ¿pitaq këkan?

RUANDA nacionchö 1994 wata alläpa wanutsinakïkuna kanqanta y ONU nishqampa tröpankuna tsëta mana michëta puëdeyanqanta yarparmi, tsë tröpakunata mandaq nuna nirqan, imëka Diablupa makinta tsaripäreq cuenta tsëkuna pasananta haqinqanta. Huk nunapis tsë pasakunqankunata rikashqa karmi kënö nirqan: “Huk uchkullachö mëtsika wanushqa nunakunata Ruanda nacionchö rikashqa kaqqa, manachi ni imanöpapis ninmantsu Satanás mana kanqantaqa”. Tsëqa, ¿Diabluku tsënö imëka mana allikuna pasanampaq ruran?

Pï më nunakunam creiyantsu alläpa llakikïpaq wanutsinakïkuna y maqanakïkuna kanampaq tsë mana alli espíritu ruranqanta. Wakinnam niyan imanöpa kë mana alli rurëkuna kanqanta musyanapaqqa, kikintsikpa mana alli munënintsikkunata rikänantsik precisanqanta. Y wakinnam niyan hinantin Patsata makinkunachö katsiyänanrëkur kapoqyoq y puëdeq nunakuna mëtsika watakunapana pakëllapa tukï mana allikunata patsätsir këkäyanqanta. Hina wakinkunaqa gobiernokunata y wakin mandakoqkunatam tumpayan mana allikuna y tukï hipakïkuna kanqampita.

Y qamqa, ¿ima ninkitaq? ¿Imanirtaq ushakätsita tïrëkäyaptimpis tukï mana alli rurëkuna, maqanakïkuna, animalpuranö wanutsinakïkuna y tukï hipakïkuna kan? ¿Imanirtaq nunakunaqa willakuyanqanta mana wiyakurnin kikinkunalla ushakëninkuna ashikäyan? ¿Pitaq kë rurëkunapa qepanchö këkan? Rasumpëpaqa, ¿pipa makinchötaq kë Patsa këkan? Itsa respuestanta musyarirqa mantsakäkunkiman.