Kuyakoq këqa piñakïtam ushakäratsin
PAÍSES Bajoschö täraq George y Manon Jehoväpa testïgonkunam juk chakwanta Diospa Gobiernompita parlapäyarqan, tsënam pëqa mana alli tratarqan. Pëkunaqa, ishkë kuti viudayashqanta, wamranta wanupakunqanta y artritis qeshyawan antsëkanqantam musyariyarqan. Parlëkäyaptin paqwë piñashqallana mana karpis, shumaqllapaqa manam pëkunata tratarqantsu.
Tsënö kaptimpis, japallanlla kar alläpa piñashqa kanqantanö chakwanta rikarmi, Georgeqa warmin Manonta nirqan wëtata apakurkur kutiyänampaq. Tsëtam rurayarqan, y Rei jutiyoq warmiqa alläpam kushikurqan. Tsë hora atiendita mana puëdermi juk junaq kutiyänampaq nirqan. Y quedayanqan junaq kutiyaptinnam pipis punkuta kichapurqantsu. Atska kuti asheqnin ëwarpis manam wayinchö tariyarqantsu o taripäkurqanchö. Tsëmi chaskita mana munanqanta höraqa pensayarqan.
Juk junaqnam Georgeqa wayichö Reita taririrqan. Watukayänan junaq wayinchö mana tariyanqampita mana piñakunampaqmi warmiqa nirqan y hospitalchö kanqantam willarirqan. Tsëpitanam kënö nirqan: “Manam pensariyankillapistsu ishkëki ëwakuyanqëkichö imata ruranqäta. ¡Bibliata leirmi qallëkurqä!”. Tsënö shumaq parlakuyanqanchömi warmiqa Bibliapita yachatsiyänanta munarirqan.
Bibliata yachakunqanmannömi, Reiqa piñashqalla kawakoq warmipita, juk kuyakoq y kushishqa warmiman tikrarirqan. Wayimpita yarqïta mana puëderpis yachakunqankunapitaqa llapan watukaqninkunatam parlapar qallëkurqan. Qeshyarmi reunionkunamanqa seguido ëwëta puëdeqtsu, tsënö karpis alläpam kushikoq wawqikuna y panikuna watukaqnin ëwayaptinqa. 82 watanta cumplinqan junaqmi ishkë junaq kaq asamblëaman ëwarqan y Diosllapaqna kanqanta rikätsikur bautizakurirqan.
Rei wanurinqampita juk ishkë killakuna pasariptinllam taririyarqan kikin qellqanqan kuyëllapaq palabrakunata. Tsëchömi, pïninnaq y chakwanyashqa këqa alläpa llakikïpaq kanqanta qellqarqan, jina rikätsikurqanmi kuyakoq kë alläpa precisanqanta. Manonmi këta nin: “Qellqanqan palabrakunaqa ichikllapam waqaratsimarqantsu, y alläpam kushikö kuyëpa tratayänäpaq Jehová yanapayämanqampita”.
Awmi, Jehová kuyakoq y llakipäkoq kanqanmi yanapamantsik noqantsikpis pënölla kanapaq (Efe. 5:1, 2). ‘Diospa sirweqnin carnin cuyacoq canqantsicta ricatsicurmi’ yachatsikunqantsikchö más nunakunata o runakunataqa yanapashun (2 Cor. 6:4, 6).