‘Wayïtam puëdir mana puëdirpis puritseq kä’

1929 wata agostu y septiembri killachömi chunka waranqapitapis mas yachatsikoqkuna entëru Estädus Unïdus nacionpa Diospita yachatsikoq yarquyarqan isqun junaqkunapa. Y 250.000 librukunatawan follëtukunatam qarakuyarqan. Jina tsëchöqa juk waranqanö colportorkunam (llapan tiempunkunawan yachatsikoqkuna) yanapakuyarqan. ¡Atskaqmi yapakashqa kayarqan! 1927 watapita hasta 1929 watayaq, kayanqampita kima kuti mas yapakäyanqantam “espantakïpaq” Bulletina nishqan willakurqan.

1929 wata ushënam alläpa sasa o aja tiempu qallakïkurqan. Martis 29 de octubri junaqmi, Estädus Unïdus nacion qellë asuntuchö problëmaman chäkurirqan, y entëru Patsamanmi tsë problëmaqa charqan. Atska waranqa bancukunam fracasariyarqan. Jina chakrakunachö y jatusaq fabricakunachöpis manam trabäju karqannatsu. Tsëmi atska millon nunakuna trabäjunnaq quedayarqan. 1933 watachömi jaqa kayanqampita cada junaq waranqa wayikunata bancukuna embargayarqan.

¿Imanötaq tsë sasa tiempuchö llapan tiempunkunawan Diosta sirweqkuna vïdata pasayarqan? Wakinkunaqa cärrunkunallachömi wayichönö täräyarqan. Alquilerta ni impuestuta mana pagayaptinmi, Diospa kaqchö masta rurayänampaq tsënö wayichö tärayanqanqa yanaparqan.b Y asamblëakunaman ëwarpis manam hotelta alquilayaqnatsu. 1934 watachö yarqamoq Bulletinnam yachatsikurqan cärru wayinkunallachöna yakunkuna, cocïnankuna, ëllunalla cämankuna y cuartunkuna qoñuränampaq imanö rurayänampaq kaqta.

Cösa tanteaq më tsëpita precursorkunaqa kikinkunam wayinkuna rurar qallëkuyarqan. Victor Blackwellmi kënö nir yarpan: “Noëqa manam barcu rurëta yacharqantsu y noqapis manam cärru wayi rurëta yacharqätsu”. Tsënö karpis wayin rurarqanmi.

Averypawan Lovenia Bristowpapis cärru wayinkuna kayäpurqanmi. Averym kënö nirqan: “Imëka tortüga caparazonniwan pureqnömi, wayïta puëdir mana puëdirpis puritseq kä”. Pëkunaqa Harvey y Anne Conrow-wanmi precursornö yanapakuyarqan, pëkunapapis cartonpita perqayoq y alquitranwan llushipashqa cärru wayinkuna kayäpurqanmi. Cada juk sitiuman apayaptinmi cartonkuna shikwakureq. Averym kënö nir yarpan: “Tsënö cärru wayitaqa manam puntata ni tsëpitapis rurayashqatsu”. Peru Harvey y Anne y wamrankunapaqnam, “pëkunaqa alläpa kushishqa kawakoq familiam kayan” nin. Harvey Conrownam kënö qellqarqan: “Manam ni imapita pishipäyarqätsu, Jehovä kuyakïwan imëpis cuidayämaptinmi, imapaqpis mana yarpachakurlla pëta sirwiyarqä”. Tsëpita tiempuwannam, Conrow familiapita chuskoq Galaad Escuëlaman ëwayarqan y Perüchömi misionërunö sirwiyarqan.

Battaino familiakunapis llapanmi precursor kayarqan. Giusto y Vincenza wamrayoq kayänampaq kaqta musyarirnam, punta tärayanqan carpapitapis mas “shumaq hotel wayitanö” autunkunata tikratsiyarqan. Warmi wamranwanmi alläpa kuyayanqanchö yanapakuyarqan, Estädus Unïduschö täraq Italia nunakunata Diospita yachatsirnin.

Yachakïta munaq nunakunatam atska tariyarqan, peru waktsakuna y trabäjunnaq këkaqkunaqa publicacionkuna chaskiyanqampita qellëwan yanapakïta manam puëdiyaqllatsu. Tsëmi qellëpa rantin, kayäpunqanllawan publicacionkunata trokayaq. Yachakïta munaq nunakuna 64 cläsi cösaskunata qoyanqantam ishkaq precursörakuna yupayarqan. “Juk tiendachö imëkata yupayanqan listanömi” listankuna karqan.

Fred Andersonmi juk nunata chakrachö taririrqan, y tsë nunam librukunata munar mamänimpa lentisninwan trokëkunampaq nirqan. Qateqnin kaq chakrachönam juk nuna publicacionkunata munarqan, peru “lentisnïmi leyinapaq kantsu” nirqanmi. Peru vecïnumpa lentisninwanqa leyita puëdirqanmi, tsëmi librukunapita y lentispita imallawampis yanapakunampaq kushishqa awnikurqan.

Herbert Abbottmi autunchö wallpa jaulata puritseq. Kima o chusku wallpata taririrnam mercäduman apar rantikureq, y tsëwannam gasolïnata ranteq. Pëmi kënö nir willakun: “¿Imëllaqa qellëninnaq kayarqätsuraq? Awmi, peru tsë qelanatsiyämantaqa manam dejayaqtsu kayä. Autükunapa gasolïnan kaptinqa, Jehoväman markäkurmi (yärakurmi) yanapakur sïguiyaq kayä.”

Jehoväman markäkuyanqan y mana qelanäyanqanmi tsë cristiänukunata yanaparqan tsë mana alli tiempuchö alli tsarakuyänampaq. Alläpa vientuntin tamya këkuptinmi, Maxwell y Emmy Lewisqa safakuyarqan (qeshpikuyarqan) cärru wayinman manaraq monti seqikaptin (ishkiptin). Maxwellmi kënö nir willakun: “Tsëkuna pasanqanqa manam ni imanöpa michäyämarqantsu, Diospaq rurëkäyanqäta jaqiritaqa manam ni ichikllapis pensayarqätsu. Atskam Diospa kaqchö rurëpaq karqan, y tsëkunachö yanapakïtam pensayarqä”. Mana qelanarllam Maxwellwan Emmyqa wakin cristiänukunapa yanapakïninwan cärru wayinkunata altsariyarqan.

Kanan witsan sasa o aja tiempuchö kawarpis, tsënö alli tsarakoq kanqantsikpitam Jehoväpa testïgunkunaqa reqishqa kantsik. Imanö kaptimpis, tsë precursorkunanöllam Jehovä këyaqllana nimanqantsikyaq yachatsikur sïguinapaq listu këkantsik.