Jehoväpaqqa llapampis puëdikanmi

ALLÄPAM TRABAJAYAQ KAYÄ

Tokmak (Kirguistan) markapa amänun markachömi 1937 wata yurikurqä. Familiäqa kirguis kastapitam y kirguis idiömatam parlayä. Teytäkunaqa fundu trabäjuchömi alläpa trabajayaq. Y tsë markachöqa trabajayanqampitaqa mikïtam qoyaq y qellëtaqa watachö juk kutillam pagayaq. Mamänïpaqqa manam fäciltsu karqan panïtawan noqata atiendiyämänampaq. Noqaqa pitsqa watallapam escuëlaman ëwarqä, y tsëpitaqa teytäkunanömi trabajar qallëkurqa.

Täräyanqä markachöqa waktsa këmi alläpa kaq, tsëmi wanayanqäkunata tariyänäpaqqa alläpa trabajayaq kayä. Tsëmi jövin karqa, Diosnintsik imanir kamamanqantsikmanqa pensaqtsu kä. Peru manam pensarirqätsu Jehoväpa shumaq yachatsikïninkuna vïdäta imanö cambiarinampaq kaqtaqa. Ichiklla willariyasqëki Kirguistan markaman Jehoväpita yachatsikï imanö chämunqanta. ¡Yurikunqä sitiuchömi qallarirqan!

NACIONNIMPITA QARQUSHQAKUNA DIOSPITA YACHATSIKÏTA APAYÄMUN

1950 watakunapam Kirguistan markachöqa Jehoväpita yachatsikï qallakarqan. Peru tsëta lograyänampaqqa manam fäciltsu kashqa. Tsë witsanqa, Union Soviëtica nishqanmanmi Kirguistan markaqa perteneceq. Jehoväpa testïgunkunaqa polïtica asuntukunamanqa manam mëtikuyaqtsu (Juan 18:36). Tsërëkurmi gobiernu comunistapa chikeqnintanö rikarnin chikir qatikachäyarqan. Peru musyanqantsiknöpis, Diospita nunakuna yachakuyänantaqa manam ni ima gobiernupis michëta puëdintsu. Llapan kawënïchömi rikarqö Jehoväpaqqa llapampis puëdikanqanta (Mar. 10:27).

Testïgukunata tsënö chikir qatikachäyanqanmi yanapakurqan entëru Kirguistanman Diospita yachatsikï chänampaq. ¿Imanötaq tsëqa pasakurqan? Gobiernupa chikeqninkunataqa Siberiamanmi apayaq. Y tsëpita libri yarqoqkunaqa mëtsikaqmi Kirguistanman ëwakayämoq. Wakinkunaqa Testïgum kayarqan. Jukqa karqan 1919 watachö yurikoq Emil Yantzen panim. Pëtaqa Seberiamanmi apayänaq y tsëchömi Jehoväpita yachakunaq. Y 1956 watachö libri yarqurirnam, nacionnin Kirguistanman kutikamurqan, y täranqä markamanmi täraq ëwakamurqan. Y 1958 watam Kirguistanchö punta kaq congregacion patsakärirqan.

Tsëpita juk watanö pasariptinmi Victor Vinter wawqi Sokuluk markaman ëwakamurqan. Pëqa alläpam sufrishqa kanaq. Gobiernuta mana yanapanqanrëkurmi ishkë kutipa condenayarqan y joqta watapam prësu karqan. Jina tsëpitanam yapë chunka watapa prësuriyarqan, jina pitsqa wata masmi nacionnimpita qarquriyarqan. Testïgukunata tsënö chikïkäyaptimpis, Jehoväpita yachatsikïqa mas nunakunamanmi charqan.

JEHOVÄPITA YACHAKUYÄ

1963 watapaqqa 160 Testïgukunanam Kirguistanchö kayarqan. Mëtsikaqmi kayarqan Alemaniapita, Ucraniapita y Rusiapita. Tsëchömi këkarqan 1924 wata Alemaniachö bautizakushqa Eduard Warter wawqipis. Pëtaqa 1940 watakunachömi näzikuna campo de concentracion nishqanman mandariyänaq, y tsëpita juk ishkë watakunallatanam Union Soviëticapita comunistakuna markampita qarquriyänaq. Tsëmi kë wawqiqa 1961 watachö Kant markaman ëwakamurqan, tsë markaqa täranqä markapa amänunllachömi këkarqan.

Jina Kant markachöqa Elizabeth Fot panim tärarqan, y pëqa jirapakurmi trabajaq. Alli jiraq kaptinmi precisaq nunakuna jiratsikoq ëwayaq. Y juk jiratsikoqqa juk fiscalpa warmin Aksamai Sultanalieva warmim karqan. Y juk kutim Elizabethta tapupar qallëkunaq imanir kawanqantsikpaq y nunakuna wanuptin ima pasakunqampaq. Elizabethqa Bibliawanmi contestarirqan. Y tiempuwanqa Aksamai warmiqa alli yachatsikoq Testïgum tikrarirqan.

Tsë witsanmi Moldavia nacionpita Nikolai Chimpoesh wawqita congregacionkunata watukanampaq nombrariyarqan. Y cäsi 30 watakunapam watukakur yanapakurqan, jina publicacionkuna copiakänampaq y repartikänampaqmi encargädu karqan. Nikolai rurëkanqanta autoridäkuna cuentata qokuriyaptinmi, wawqi Eduard Warter kënö nirqan: “Tapupäyäshuptikiqa, ‘publicacionkunataqa Brooklyn oficïnapitam apatsiyäman’ ninkilla. Guardiataqa de frenti rikanki, ama mantsapakunkitsu” (Mat. 10:19).

Tsëllanam Nikolaitaqa guardiakuna Kant markaman qayaratsiyarqan. Nikolaimi kënö yarpan: “Juk guardiam tapumarqan publicacionkunata mëpita jorqayanqäpaq, y noqanam ‘Brooklyn oficïnapitam mandayäman’ nirirqä. Manam ni ima nimëtapis puëdirqantsu, tsëpitaqa ëwakunäpaqmi nimarqan y mananam masqa qayatsimarqannatsu”. Kë valienti Testïgukunaqa, täranqä Kirguistanpa norti kaq lädunkunachömi yachatsikur sïguiyarqan. Y 1980 watakunachönam familiäkunapis Jehoväpita musyariyarqan. Warmïmi puntataqa wiyarirqan.

WARMÏ QALLËKUN JEHOVÄPITA YACHAKUR

Warmïqa Naryn sitiupitam. Y 1974 watachömi panïpa wayinchö reqirirqä. Rikänakurirqa chipyëpam gustanakuriyarqä, y tsë junaqllam casakuriyarqä.

Juk junaqmi 1981 watachö warmïqa mercäduta ëwanqampita cärruchö kutïkämurnin qallananchö willakunqänö juk warmi parlaqta wiyarinaq. Tsëmi masta musyëta munarnin tapurqan jutinta y mëchö täranqanta, y pëqa jutinllata willarirninmi warmïta tapurinaq mëchö täranqanta, porqui tsë witsankunaqa Testïgukuna yachatsikuyänanqa prohibïdum karqan. Warmïqa alläpa kushishqam wayiman chäramurqan.

Y kënömi nimarqan: “Alläpa shumaq noticiatam wiyarqö. Juk warmim nimashqa nunakuna manana wanuyänampaq kaqta, y chukaru animalkunapis manshuna kayänampaq kaqta”. Y noqaqa manam creirqätsu, y “ojalä shamïkunman maslla parlapämänapaq” nirirqällam.

Tsë warmipaqa Apunmi jutin kanaq y kima killa pasarinqanchömi watukayämarqan. Tsëpitanam kirguis kastapita kaq Testïgukunapis watukayämarqan. Kë panikunam yachatsiyämarqan Jehoväpita y nunakunapaq imata ruramunampaq kaqpita. De paraíso perdido a paraíso recobradoa nishqan libruwanmi yachatsiyämarqan, y tsë libruqa Tokmak markachö jukllëllam karqan, tsëmi kikïkunapa kanampaqqa makiparaq copiayarqä.

Yachatsiyämanqanchöqa Genesis 3:15 textuchö këkaq profecïapitam parlapäyämarqan, y Diospa Gobiernunchö Jesus gobernamuptin cumplikärinampaq kaqtam niyämarqan. ¡Tsëta musyarirqa yachatsikuyänäpaqmi decidiriyarqä! Tsëtaqa llapankunapis musyayänanmi (Mat. 24:14). Biblia yachatsikunqankunata musyarirqa rasllam cambiar qallëkuyarqä.

PAKËLLAPAM REUNIONKUNATA RURAYÄ Y BAUTIZAKUYÄ

Tokmak markapita juk Testïgu, juk casakï fiestaman invitayämaptin ëwayanqanchömi, cuentata qokuriyarqä Testïgukunaqa jukläya kayanqanta. Manam upyayarqantsu y alläpa shumaqmi portakuyarqan. Peru mana Testïgu kaqkuna casakuyanqan fiestaman ëwayanqächöqa alläpam upyayaq y mana allim portakuyaq.

Jina Tokmakchö rurayanqan reunionkunamampis ëwayarqämi, mana tamyaptinqa bosqui rurinchömi rurayaq. Policïakuna qatiräyämaptinmi juk wawqita imëpis churayaq rikachakamunampaq. Y tamyaptinqa juk wayichömi reunionta rurayaq, y policïaqa juk ishkë kutim yurimurqan imata rurëkäyanqäta musyapakurnin. Y bautizakuyäna junaqqa masran cuidakuyarqä (Mat. 10:16). Bosqui rurinchömi discursu kanan karqan, tsëmi ichikllapa ichikllapa chäyarqä y Jehoväpaq juk cancionta cantarirmi discursuta wiyayarqä. Y tsëpitanam bautizakuyarqä Chu nishqan mayuchö. Tsëqa karqan 1982 wata juliu killam.

JUK MARKACHÖ YACHATSIKUYÄ

1987 watachömi juk wawqi nimarqan Diospita yachakïta alläpa munaq juk nunata watukanäpaq, y tsë nunaqa Balykchy markachömi täränaq. Tsëmanqa trenwan 4 hörataraqmi chäyaq kayä. Atska kutipana tsë markachö yachatsikurirmi cuentata qokuriyarqä mëtsikaq nunakuna Diospita yachakïta munayanqanta. Tsëmi decidiriyarqä tsëchö mas seguïdu yachatsikuyänäpaq.

Balykchy markataqa warmïwanmi semäna ushëkuna ëwayaq kayä, tsëchömi yachatsikuyaq kayä y reunionkunatapis rurayaq kayä. Publicacionkunataqa ishkë papa costalkunawanmi apayaq kayä y juk killallachömi chipyëpa ushakäreq. Hasta trenchöpis ëwar y kutimurmi nunakunata parlapäyaq kayä.

Balykchy markaman seguïdu ëwayänäpaqqa alläpa gastum karqan, y qellënïkunaqa manam karqanllatsu. Peru yachatsikïta munayanqäta Jehovä musyarninmi alläpa bendiciyämarqan (Mal. 3:10). ¿Imanötaq bendiciyämarqan? Juk wawqim pasäjïkunawan yanapayämaq. Y ëwar qallayanqäpita puwaq wata pasariptinllam 1995 watachö juk congregacion patsakärirqan. Jehoväpaqqa llapampis puëdikanqantam rikäyarqä.

WAMRÄKUNATA Y WAKINTAPIS YACHATSIYÄ

1992 watachömi anciänu kanäpaq nombrarayämarqan, y kirguis kastachöqa noqam punta kaq anciänu karqä. Tokmak markachö këkaq congregacionchöqa tukïnöpam yanapakurqä, hasta kirguis kastapita jövinkunatapis Jehoväpitam yachatsirqä. Y kananqa, tsë jövinkunapitaqa jukqa yanapakïkan Sucursalta Rikaqnömi y ishkaqmi precursor especial kayan. Jina reunionkunachöpis yanapakuyaqmi kayä. Porqui 1990 watakunachöqa publicacionkunaqa rüsu idiömallachömi kaq y reunionkunapis tsë idiömallachömi rurakaq. Y kirguis idiömata parlaq wawqikuna y panikunam masqa kayaq, tsëmi reunion hörachö kirguis idiömachö entienditsikurnin yanapakurqä. Tsëmi yachatsikïkunataqa maslla entiendiyarqan.

Jina warmïwanqa wamräkunatapis alleq yachatsitam procurayarqä. Reunionkunaman y yachatsikoqpis pushayaqmi kayä. Textukunata dememoria yachakïmi wamräkunataqa alläpa gustaq, y warmi wamrä Gulsayrataqa alläpam gustaq cällikunachö nunakunata Bibliapita yachatsi. Wamräkuna y willkäkunapis congregacionchö yanapakurmi imëpis ocupädu kayashqa. Isqun wamräkunapita y chunka juk kawëkaq willkäkunapitaqa, chunka joqtam Jehoväta sirwiyan o teytankunawan reunionkunaman ëwayan.

KANANQA ALLÄPA JUKLÄYANAM

1990 watapita witsëpaqa librinam yachatsikïta y reunionkunatapis rurëta puëdiyä. Tsënö kanqanta musyarirqa, 1950 wata witsankunachö yachatsikushqa wawqikuna y panikunaqa alläpachi espantakuyanman.

1991 watachömi juk jatun asamblëaman Kazajistanpa Alma-Ata (kananqa Almaty) markanta warmïwan viajayarqä. Y 1993 watachönam Biskek markapa Estadio Spartak nishqanchö punta asamblëäkuna rurakarqan. Juk semänapam publicadorkuna tsë estadiuta limpiayarqan, tsëmi tsë estadiupa encargädun nunaqa alläpa kushikurnin cobrayämarqannatsu.

Jina 1994 watachönam kirguis idiömachö publicacionkunata imprimir qallëkayämurqan. Kanan witsanqa Biskek markachö këkaq sucursalchömi kirguis idiömaman traduciyämun. Y 1998 watapitam Jehoväpa testïgunkunaqa reconocïduna kayä. Kananqa 5.000 Testïgukunanam kayä. Y 83 congregacionkuna y 25 grüpukunam chïnu, ingles, kirguis, rüsu, sëñas, turcu, uigur y uzbeku nishqan idiömakunachö kan. Wawqikuna y panikuna jukläya jukläya costumbriyoq karnimpis, llapankunam juk shonqulla Jehoväta alabayan. Porqui pëmi kananqa llapampis jukläyana kanampaq permitishqa.

Waktsa familiapitam kä y pitsqa watallam escuëlamampis ëwarqä. Tsënö kaptimpis Jehovämi jukläya nunaman tikratsimashqa. Y anciänu kanäta, y noqapitapis mas yachaq nunakunata yachatsinätam permitimashqa. Awmi, Jehoväqa mana pensanqantsikkunatam ruran. Tsëkunata rikanqämi yanapaman Jehoväpita yachatsikurnin sïguinäpaq (Mat. 19:26).