¿Musyarqëkiku?

Chikeqninkunapa puntankunachö këkarninqa, ¿imanirtaq Estëbanqa mantsakarqantsu?

JUDÏUKUNAPA Precisaq Cortinchömi Estëbanqa këkarqan, tsë cortichöqa 71 nunakunam yanapakuyaq. Pëkunapita wakin kaq nunakunaqa, alläpa respetashqa y autoridäyoqmi kayarqan. Pëkunataqa mandakoq kaq sacerdöti Caifasmi qayatsishqa karqan, pëqa pasaq killakunallachöran Jesusta wanutsiyänampaq mandakushqa karqan (Mat. 26:57, 59; Hëch. 6:8-12). Tsë cortichö këkaqkunaqa, Estëbanpa contran parlayänampaqmi uli testïgukunata apayarqan. Peru Estëbanpa qaqllan imëka juk angelpa qaqllannö kanqanta rikëkurqa, alläpam espantakuyarqan (Hëch. 6:13-15).

Tsënö nunakunapa puntanchö këkarnin y mana allikunapa pasëkarninqa, ¿imanirtaq Estëbanqa mantsakarqantsu? Porqui cortiman mälas manaraq apayaptinmi, pëqa Diospa santu espïritun yanapaptin congregacionchö yanapakur alläpa ocupädu këkarqan (Hëch. 6:3-7). Jina Diospa santu espïritunqa, juiciuchö këkanqan höra yachakunqankunata yarpänampaqpis yanaparqanmi (Juan 14:16). Tsë precisaq cortichö imanö defendikunqantaqa, Hëchus librupa 7 capïtulunchömi leyintsik. Tsëchöqa Hebreu Idiömachö Qellqayanqan Diospa Palabranchö këkaq 20 textukunata yarpänampaqmi, santu espïritu yanaparqan (Juan 14:26). Y Diospa derëcha kaq lädunchö shëkaqta juk suëñuchönö Jesusta rikanqanmi, Estëbantaqa Diosman mas markäkunampaq yanaparqan (Hëch. 7:54-56, 59, 60).

Itsa chikimaqnintsikkunaqa, Estëbantanölla chikirnin sufritsimäshun o mana allipa tratamäshun (Juan 15:20). Peru Bibliapita seguïdu yachakushqa y Diosta sirwirnin ocupädu kashqaqa, Jehoväpa santu espïritun yanapamänatam jaqikäshun. Y tsëqa, imëka mana allikunapa pasashqapis alli tsarakunapaq y tranquïlu sientikunapaqmi yanapamäshun (1 Pëd. 4:12-14).